3 Paymari ćhunca sütayu watanta (16) liyal mandacuyta allaycula.

Picha ćhunca ishcayniyu (52) watam Jerusalenpïta mandacula.

Mamanñatacmi Jerusalen lädu Jecolias cala.

4 Papänin Amasias allin lulaśhannümari Tayta Diospa ñawquin Uziaspis allincäta lulaycula.

5 Ñatac Zacarias cawsaśhancamá Tayta Diospa munaynintamá Uzias ashiycula.

Cay Zacariasmari Tayta Diosta manchacuywan ashiycuyta yaćhaycachila.

Chayurá Tayta Diospa munayninta ashiycuśhancamá Uziasta yanapayculam.

6 Chaymi Filisteo läducunäwan Uzias pilyä lil Gat,

Jabnia,

Asdod malcacunap murällanta lluy cućhpächila.

Jinalculmi Filisteo lädu Asdodćhu malcacunacta śhalcachila malcancunaña cananpä.

7 Quiquin Tayta Dios yanapaptinmari Filisteo läducunäta,

Gur-baalćhu yaćhä Arabia nunacunäta,

Amon lädu nunacunätapis llallïla.

8 Jinaptinmi Amon nunacunaca alcabälacta Uziasman pägapäcula.

Chaynu sumä munayniyu Uzias caśhan lisisha-lisisha licalïluptinmi Egiptop culindancama yaćhälälila.

9 Chaynütacmi Jerusalenćhu täpapäcunanpä türricunacta Uzias lulachila:

Isquina nishan puncup altunninćhu,

pampaman yaluna nishan puncup altunninćhu,

chaynütac isquinap altunninćhüpis.

Jinalculmi sumäta tacyaycachila.

10 Chaynütacmi Sefela lädućhu,

pampacunäćhu achca-achca uywancuna captin,

chunyäcunäćhu türricunacta lulachila,

jinaman püsucunactapis quićhachila.

Chaynütacmi ulꞌucunäćhüpis pampacunäćhüpis talpuynincunacta übancunacta lulänincunapis cala.

Uziaspa śhunꞌunꞌa ćhaclaćhümari cayäla.

11 Chaynütacmi Uziaspa pilyänincunapis pilyuman yalapäcunanpä achca cacula,

mandacücäpa isquirbïnin Jeielwan yanapänin Maasias sinsachishanmannu.

Paycunap puydïninmi cala mandacüca ćhulaśhan Hananias.

12 Ayllućhu-cama,

alli-cama pilyä puydïnincuna ishcay walanga süta paćhacmi (2,600) cacula.

13 Paycunap puydïnincunañatacmi quimsa paćhac anćhishniyu walanga picha paćhacniyu (307,500) sumä ishpisha-cama puydïcuna caculcäla.

Paycunam mandacücäpa ćhïnicünincunawan pilyapäcunanpä capäcula.

14 Chay pilyänincunapämi Uzias lulachila:

atajachicuncunacta,

lansacunacta,

cascucunacta,

chalicu-yupaycunacta,

flïchacunacta,

waracacunactapis.

15 Chaynütacmi Jerusalenćhu sumä yaćhäcunäwan mäquinacunactapis lulachila,

difindicuyninwan flïchacunacta,

jatućha lumicunacta ćhächinanpä.

Chaycunacta malcap isquinancunaman,

türricunämanmi ćhuläla chaypi ćhächipäcunanpä.

Tayta Diospa yanapayninwan Uzias sumä munayniyüman licalïluptinmari calu-calucunaman lisisha caynin ćhäla.

16 Sumä munayniyüman licalïlulñatacmi Uzias nunatucülun.

Jinalmi cunca cuchuyninta ashicülun.

Awquilluncunap Tayta Diosninpa cuntran śhalculculmari alawana wasiman yaycülun,

insinsiu cañanaćhu insinsiucta quiquin cañaycü.

17 Jinaptinmi paypa ipanta puydï sasirdüti Azarias yaycülun Tayta Diospa pusä ćhunca (80) alli-cama sasirdüticunäwan cusca.

18 Chayćhümi Uziaspa puntanćhu atajacuycul nicuyalcan:

“Mandacü Uzias,

amchu manamá Tayta Diospa insinsiucta cañaycunayqui.

Aaronpa milaynin sasirdüticunämi chayta lulaycälinanpä japächäśha cayalcan.^b

Taytay,

cay alawana wasipïta canan-pachari yalucuy.

Caynu mana allinta lulayaptiquiꞌa,

Tayta Dios manamá altuman juluycuśhunquichu” nil.

19 Niptinmi Uzias insinsiu lupachicunacta apticüśhaña cayal sasirdüticunäpa piñacülun.

Jinaptinmi Tayta Diospa alawana wasinćhu sasirdüticunaca licapayalcaptin,

chay insinsiu cañana patacpa lädunćhu śhäcuyaptin,

lipra ishyay ulcunćhu lluy licalïlun.

20 Chaynu ulcunćhu liprayüta licälälilmi alawana wasipïta puydï sasirdüti Azarias juclla yalälächin.

Quiquinpis Tayta Dios mućhuchishanta tantiacülulmi mana-mana yalucula.

21 Wañucunancamañam mandacü Uzias lipra ishyayniyu cala.

Chaymi juc wasiman japächäśhaña yaćhala;

manañam Tayta Diospa alawana wasinmanpis yaycachishañachu cala.

Jinaptinmi chulin Jotamña palasyućhu pudirnin mandacula.

22 Ñatac Uziaspa lluy ima lulaśhancunapis allaycuyninpi camacaynincama,

Amozpa chulin willacü Isaiaspa isquirbisha librunćhümi cayan.

23 Uzias wañucuptinmi^c awquilluncuna caśhanman apapäcula.

Ñatac liprawan caśhan-laycum mandacücuna pampaläśhanpa caluscanman pampapäcula.

Chayurá paypa pudirnin chulin Jotamñam mandacüca cala.