Juda lädućhu Amasiasmi mandacun
14
Chay Israel lädućhu Joacazpa chulin Joas ishcay wataña mandacuyaptinmi Juda lädućhu Joaspa chulin Amasias mandacuyta allaycula.
2 Ishcay ćhunca picha (25) watayümi mandacuyta Amasias allaycula.
Ishcay ćhunca isun (29) watam Jerusalenpïta mandacula.
Mamanñatacmi Jerusalen malcayu Joadan śhutiyu cala.
3 Amasiasꞌa Tayta Diospa śhunꞌunpänümi lulaycula.
Ñatac awquillun Davidnuꞌa manamá lulayculachu.
Imaćhüpis papänin Joas lulaśhannümari lulaycula.
4 Chaymi ulꞌucunäćhu taytachacunaman uycunancunacta mana chincachilachu.
Jinaptinmi malcaca chaycunaman jinalla uycapäcula,
insinsiucunactapis cañaycapäcula.
5 Amasias mandacuyninćhu tacyälul mandacü papäninta wañuchï puydïcunätam lluy wañüchila.
6 Ñatac Moisespa camachicuyninćhu isquirbïsha caśhanmannümi wañuchïcunäpa chulintá nï wañuchilachu.
Tayta Diosmari camachicuyćhu nin:
“Chulicunäpa juchanpïta taytacunaca manam wañupäcunmanchu;
nïtac taytacunäpa juchanpïtapis chulicunaca manatacmi wañupäcunmanchu.
Juchanpïta-camam quiquincuna wañupäcunan” nil.a
7 Amasiastacmi Caćhi Pampaćhu pilyal ćhunca walanga (10,000) Edom läducunacta wañüchila.
Chaynütac Sela malcactapis llallilculmi Jocteel śhutiwan ćhuläla.
Chay śhutiwanmi canancamapis lisisha cayan.
8 Juc muyunćhümi Israel lädup mandacünin Jehupa willcan,
Joacazpa chulin Joasman willacüta caćhäla.
Paymanmi nichila:
“Licanacunapä cayman śhamuy” nil.
9 Niptinmi Israel lädup mandacünin Joas nichila:
“Libano muntićhu cä caśham,
Libanućhu cä cedrocta nin:
‘Wamla chuliquita walaśhnïwan casarachiy’ nil.
Niyaptinpis Libanućhu cä juyu munti uywacuna,
chayninpa pasalshi caśhacta jaluypa lluy pawäña.
10 Rasunpa,
Edom läducunäta llallïlulmari nunatucülälinqui.
Chayurá nunatucüśha wasillayquićhu quïdaculcayꞌari.
¿Imapïmá quiquillayqui mana allinniquita ashiyanqui,
jinaman Juda lädup mana allinnintapis?”
nil.
11 Niptinpis Amasias manam uyalïtuculachu.
Jinaptinmi Juda lädućhu cä Bet-semesman Amasiaswan pilyamü Israel lädup mandacünin Joas lila.
12 Chayćhu Israel läducunäwan Juda läducunaca llallichiculculmi wasinta-cama ayiculcan.
13 Chay Bet-semesćhümari Israel lädup mandacüninca,
Juda lädup mandacünin Amasiasta chalalcul,
Jerusalenta prïsu puśhacula.
Paymari Joaspa chulin,
Joacazpa willcan cala.
Jerusalenpa murällantañatacmi Efrain puncupi aśhta Isquina puncucama paćhac pusä ćhunca (180) mitructa tunïla.
14 Jinaman Tayta Diospa alawana wasinćhu cä ürucunäta,
illaycunäta,
lluy ima sirbichicunapä ima cäcunactapis,
chaynütac palasyućhu lluy cänincunactapis apaculcäla.
Jinaman mandacücäpa chulincunacta prïsu chalalcälilmi Samariaman cuticulcäla.
15 Ñatac Joas mandacuyninćhu lluy lulaśhancuna,
llallishancunapis,
Juda lädup mandacünin Amasiaswan pilyaśhancunapis Israel läducunap mandacünincunap isquirbishan librunćhümi cayan.
16 Joas wañucuptinmi Israel läducunap mandänincuna pampaläśhan Samariaman pampälälila.
Chayurá paypa pudirnin chulin Jeroboamñam mandacü cala.
17 Chaynütac Israelpa mandacünin Joacazpa chulin Joas wañucuśhanpïta Juda lädup mandacünin Joaspa chulin Amasias,
ćhunca pichayu (15) watalämi cawsala.
18 Ñatac Amasiaspa mandacuyninćhu lluy lulaśhancuna Juda lädup mandacünincunap isquirbishan librunćhümari cayan.
19 Amasiaspa cuntran Jerusalen nunacunaca śhalcäläliptinñatacmi Laquis malcaman pay ayicula.
Chaymanpis atipäculmi chayćhu wañülächila.
20 Jinalculmi cawalluman ćhulcalcälil Jerusalenman cutichipäcula.
Chay awquilluncuna pampaläśhan Davidpa Malcan nishanmanmi pampälälila.
21 Chaypïtam Juda lädu lluy nunacunaca Amasiaspa pudirnin mandacü cananpä chulin Azariastaña ćhulälälin.
Pay ćhunca sütayu (16) watayüllalämi cayäla.
22 Paymi papänin wañucuśhanpïta Elat malcacta śhalcalcachil Juda lädup maquinman cutiycachila.
Israel lädućhümi Jeroboam II mandacun
23 Chay Juda lädućhu Joaspa chulin Amasias ćhunca pichayu (15) wataña mandacü cayaptinmi Israel lädućhu Joaspa chulin Jeroboam mandacuyta allaycula.
Paymi tawa ćhunca jucniyu (41) wata mandacula.
24 Ñatac lulaynincuna Tayta Diospa ñawquin manamá allinchu cala.
Nabatpa chulin Jeroboam Israel läducunäta juchapacachishan lulaycunacta jinallamari lulaycula.
25 Jeroboamtacmi Israel lädup culindancunacta cutiycachila Hamatman yaycunan lädupi aśhta Araba Lamarcäcama.
Chaynu lulaśha cananpämi israelcunap Tayta Diosnin Amitaipa chulin Jonaswanb willacachimula.
Gat-hefer malcaćhümari willacü Jonas yaćhala.
26 Tayta Diosñatacmi lluy Israel uyway nunapis,
mana uyway nunapis llaqui-llaquicta pasapäcuśhanta licala.
Cay Israel läducta manañamá mayanpis yanapaycünin calachu.
27 Ñatac cay pachäpïta Israel lädup śhutin chincachisha cananta mana munalmi Joaspa chulin Jeroboamwan Tayta Dios salbaycula.
28 Ñatac Jeroboampa mandacuyninćhu lluy lulaśhancuna,
sumä munaywan lulaśhancuna,
lluy pilyaśhancunaćhu Juda lädup maquinćhu cä Damasco,
Hamat malcacunacta Israel lädup maquinman cutiycachimuśhancunapis Israel lädu mandacünincunap isquirbishan librunćhümari cayan.
29 Jeroboam wañucuptinmi Israel lädup mandacünincuna pampaläśhancäman pampälälila.
Chayurá paypa pudirnin chulin Zacariasñam mandacüca cala.