Moab, Amon läducunactam Josafat llallin
20
Chaypïtam Moab,
Amon lädu nunacunaca waquin Meun läducunäpis limanacalcälil Josafatpa cuntran pilyä lipäcula.
2 Josafatmanñatacmi waquincuna willaycälila:
“Edompïta wic lädu chimpa Wañüśha Lamarpïtawan Siria lädupïmi ampa cuntrayqui achca-achca śhacayalcämun.
Hazezon-tamarćhüñam cacuyalcan.
(Hazezon-tamartam En-gadi nipäculatac)” nil.
3 Niptinmi Josafat sumä manchälul Tayta Diosta mañacula;
jinantin Juda nunacunätapis ayunapäcunanpämi nila.
4 Chaymi Judapa lluy malcancunapi śhapämul Tayta Dios yanapänanpä mañaculcäla.
5 Chaynu Juda,
Jerusalen nunacunaca juntunaculcäla Tayta Diospa alawana wasip puntanćhu muśhü patyumanmi.
Chay nunacunap ćhawpinćhu śhaycucuyculmi Josafat mañacula:
6 “Awquillücunap Tayta Diosnin,
¿manachun janay pachäćhu cä Dios canqui imamá?
¿Jinantin nasyuncunäpis manachun maquillayquićhu cayan imatá?
¿Ampa callpayquitawan munayniquita mayanmá awantaycunman?
7 Tayta Diosllay,
¿manachun Israel malcayquip ñawpäninpïta cay allpaćhu yaćhäcunäta alapacülanqui imamá?
Jinalcul ¿manachun apanacuśhayqui Abrahampa milaynincunaman wiña-wiñaypä uyculanqui imatá?a
8 Chaymari cayćhu yaćhapäcul alawana wasicta lulapäcula altuman juluycuśhunayquipä:
9 ‘Sïchuśh yaꞌanchicman ima mana allincuna,
ispädawan mućhuchicuycuna,
ishyaycuna,
micuy wanacuna śhamuptin cay alawana wasićhu caśhayqui-laycum,
ñawpäniquiman aśhuycapämuśhä.
Llaquicuynïcunaćhu ayacalcämuptïmari am uyaliycul salbaycälimanqui’ nil.
10 “Canan licayꞌari,
Amon,
Moab läducunaca jinaman Seir ulꞌućhu yaćhäcunaca yaꞌacunamanmi śhacayalcämun.
Israel malcayquita Egiptopïta julaycayämulb manamá munalanquichu,
paycuna yaćhaśhanpa pasapämunanta.
Paycunacta mana wañuchipäcunanpämari juc lädunpa malcayquita puśhaycamulanqui.
11 Chaychun cananñatac tücamäśhanchic allpapïta alapacälälimänanpä śhamuyninwan cutiycayächimachwan.
12 Chayurá Tayta Diosllay,
¿manachun paycunacta mućhuycachinqui imamá?
Chaychica-chaychica śhamücunawanꞌa manamá imanuypa pilyaytapis atipapäcüchu.
Manamari ima lulaytapis atipapäcüñachu.
Chaymi amllactaña licapayalcac” nil.
13 Jinantin Juda läducunämari walmintin chulintin aśhta uchuchäcunällapis Tayta Diospa ñawpäninćhu cayalcäla.
14 Chayćhütacmi Zacariaspa chulin Jahazielpis cayäla.
Cay Zacariasmi Benaiap chulin,
Benaiañatacmi Jeielpa,
Jeielñatacmi levita Asafpa milayninpi cä Mataniaspa chulin.
Tayta Diospa Ispiritun limachiptinmari Jahaziel nin:
15 “Jinantin Juda,
Jerusalen nunacuna,
am mandacü Josafatpis sumäta uyalipämay.
Tayta Diosmi caynu nipäcuśhunqui:
‘Caychica-caychica pilyä śhamücunäta ama manchaculcaychu nï chucchupäcuypischu.
Pilyayca manamá amcunapchu sinuꞌa quiquin Tayta Diospam.
16 Chayurá wala muyun pilyä lipäcuy.
Sis nishan wichayta ishpipämulmi Jeruel chunyäcäman manaläpis ćhänapä cä mayup patanćhu paycunacta talipäcunqui.
17 Chayćhu amcunachu manamá pilyapäcunqui.
Amcuná imactapis mana lulallal jawcalla capäcuy Tayta Dios imanuypa salbapäcuśhuśhayquitapis licapäcunayquipä.
Chayurá Juda,
Jerusalen nunacuna ama manchaculcaychu nï jucmanyapäcuychu.
Wala muyun pilyä yalapäcuy jinalla;
Tayta Diosꞌa amcunawanmi cayan’ ” nil.c
18 Niptinmi Tayta Diosta alawapäcunanpä Josafat,
jinantin Juda,
Jerusalen nunacunäpis unꞌulacaycälin pampäcama cäranpis ćhänancama.
19 Chaypïta Coatpa,
Corepa milaynin levitacunaca śhalcacalcälilmi Israelpa Tayta Diosninta callpa-callpawan alawäcuyalcan.
20 Chay walantintam Tecoa chunyäcaman wälalla liculcänanpä śhalcälälin.
Chaynu yaluyalcaptinmi Josafat nin:
“Judaćhu,
Jerusalenćhu cä nunacuna sumäta uyalipämay:
Tayta Diosninchicman chalapaculmi libraycuśha caśhun.
Willacücunäta uyaliculcalꞌa allinmi caycälinqui” nil.
21 Chaynu lluy nunacunäwan limayculmi taquipäcunanpä waquinninta ćhulaycula.
Paycunam japächäśha müdanawan müdacälälisha pilyäcunäpa puntanta lipäcula alawaśhtin cay nil:
“Tayta Diosta altuman julaycäliy;
llaquipäcuynin wiña-wiñaypämi” nin.d
22 Chaynu taquiyta allacaycäliptinmi Tayta Dios pantächin Judapa cuntran śhamü Amon,
Moab lädu nunacunäta,
Seir ulꞌupi śhamücunätapis.
Jinaptinmi quiquin-pula wañuchinacuyta allacaycälin.
23 Amon Moab lädu nunacunämari Seir lädu nunacunäta wañülächin camacaycälälinancama.
Chaynu Seir läducunäta wañulcälichilmi quiquin-pulañatac wañuchinacälälin.
24 Juda nunacunäñatacmi chunyäcäta licanapä cä chupquiman ćhaycul chay achca-achca pilyäcunäta licälälin pampaćhu wañüśha maśhtalayalcäta.
Manamá jucllayllapis puchuycuñächu.
25 Chaymi Josafat lluy nunancunawan liculcan wañüśhacunäpa ima cänincunactapis apacalcämü.
Chaymi alli-alli uywacunacta,
müdanacunacta,
aläjacunacta,
lluy ima ćhaniyünincunactapis pudiracaycälila apaytapis mana atipänancama.
Chaynu achca-achca cacuptinmi quimsa muyunlä utuy-utuy cayalcäla.
26 Tawayänan muyuncäćhüñatacmi Beraca nishan pampaman juntunacaycälil Tayta Diosta alawapäcula.
Chaymi chay sityucta canancamapis Beracae nipäcun.
27 Chaypïtam Juda,
Jerusalen nunacunaca mandacünin Josafatwan cushisha-cushisha Jerusalenta cutipämula ćhïnicünincunapïta Tayta Dios libraycuśhanpi.
28 Jerusalenman ćhaycälilmi arpacunacta,
pandirïtacunacta,
curnitillacunacta tucaśhtin Tayta Diospa alawana wasinman yaycapäcula.
29 Chaynu quiquin Tayta Dios israelcunäpa ćhïnicünincunawan pilyaśhanta yaćhälälilmi,
jinantin pachäćhu malcacunaca Tayta Diosta manchaculcäla.
30 Chaynu quiquin Tayta Dios lluy malcacunäwan jawcacta cawsaycachiptinmi Josafatpa gubirnun jawca caycula.
Josafatpa mandacuyninmi camacan
31 Chaynümi Juda lädućhu Josafat mandacuyta allaycula quimsa ćhunca pichayu (35) watanta liyal.
Jerusalen malcapïta ishcay ćhunca pichayu (25) watamari mandacula;
mamanñatacmi Silhip chulin Azuba cala.
32 Papänin Asa allin lulaśhancunallactanümi Josafat lulaycü cala.
Tayta Diospa ñawquin allincällactamari lulaycula.
33 Ñatac malcaca uycapäcuśhan,
insinsiucunactapis cañaycapäcuśhan altunninćhu uycunacunätam ichá pampaman mana muyuchilachu.
Malcaca manalämari awquilluncunap Tayta Diosninman llapan śhunꞌunwan cutiycapäculalächu.
34 Ñatac Josafat mandacuyninćhu allaycuyninpi camacaynincama lluy lulaśhancuna isquirbïsha cayan Hananipa chulin Jehup librunćhümi.
Cay librupis Israel lädu mandacünincunap isquirbisha cä jucnin librunmari.
35 Chaypïta Juda lädup mandacünin Josafatmi jucllachanacülun mana allincunallacta lulä Israel lädup mandacünin Ocoziaswan.
36 Chaymi Tarsis läduman lipäcunanpä barcucunacta lulapäcula,
Ezion-geber malcaćhu.
37 Jinaptinmi Maresa lädu Dodavap chulin Eliezer Josafatpa cuntran caynu willacula:
“Ocoziaswan jucllachanacuśhayquipïmi cay lulaśhayquita Tayta Dios camacaycülunꞌa” nil.
Chay nishanmannu barcucunaca mana caśhanman muyüluptinmari Tarsisman manaña liyta atipapäculañachu.