Acab llallisha cananpämi Micaias willacun
22
Canan má,
quimsa watam israelcunäwan Sirio läducunaca manaña pilyapäculachu.
2 Chay quimsa watäćhüñatacmi Juda lädup mandacünin Josafat lila,
israelcunäpa mandacünin watucü.
3 Chayćhümi Israelpa mandacüninta yanapänincunacta nin:
“Yaćhapäcuśhayquinüpis Galaad lädu Ramot malca yaꞌanchicpam cala.
Chayurá ¿yaꞌanchic imactam lulayanchic Siriap mandacünin cutiycachimänanchicpä?”
nil.
4 Chaypïtam mandacü Josafatta Acab nin:
“¿Galaad lädu Ramot malcawan pilyaśhäman liwshimanquimanchun?”
nil.
Niptinmi Josafat:
“Yaꞌapis,
chaynütac pilyänïcunapis ampa pilyäniquicunam;
cawallücunapis ampa cawalluyquicunamari.
5 Ñatac puntactá Tayta Diospa ima munaynin caśhantapis tapuycuylä” nin.
6 Chaymi Israelpa mandacünin willacünincunacta tawa paćhactanu (400) juntuycachil nin:
“¿Galaad lädu Ramot malcawan pilyä lïmanchun icha manachun?”
nil.
Niptinmi willacücunaca nipäcun:
“Liy jinalla.
Tayta Diosmia am mandacünïpa maquinman ćhulaycamunꞌa” nil.
7 Chayćhümi Josafat nin:
“¿Tapucunanchicpä,
cayćhu manachun Tayta Diospa juc willacünin can imamá?”
nil.
8 Niptinmi Israelpa mandacünin nin:
“Juc caytá cayanlämi Tayta Diosta tapuycunanchicpä.
Ñatac imapis mana allinlla pasamänanpä willaycamaptinmi licaytapis yaꞌa mana munächu.
Payꞌa Imlap chulin Micaiasmi” nil.
Niptinmi Josafat:
“Chaynütá ama niyaychu” nin.
9 Niptinmi Israelpa mandacünin jucnin puydïninta ayalcachimul nin:
“Imlap chulin Micaiasta apuraylla puśhamuy” nil.
10 Israelpa mandacüninwan Juda lädup mandacünin Josafatñatacmi täcunanćhu-cama täcuyalcäla mandacüpa müdananwan müdacälälisha.
Paycunap ñawpäninćhümari Samariaman yaycunaćhu cä ïraćhu lluy willacücunaca willacuyalcäla.
11 Chayćhu Quenaanap chulin Sedequiasñatacmi jïrrupïta wälacunacta lulacuycul nicuyan:
“Tayta Diosmi caynu nin:
‘Cay wälacunäwan pilyapäculmi Sirio läducunäta camacaycälälinqui’ ” nil.
12 Lluy willacücunämi chay cusca Acabta nicuyalcan:
“Galaad lädu Ramot malcaman pilyä lil lluymi llallinqui.
Tayta Diosmari mandacücäpa maquiquiman ćhulaycamunꞌa” nil.
13 Ñatac Micaiasta ayamunanpä caćhaśhancäñatacmi ćhaycul Micaiasta nicuyan:
“Lluy-lluy willacücunämi mandacüca allin cananpä willacuyalcan.
Chayurá ama chaynu caychu paycunanüpis mandacüca allin cananpäri ampis niycuy” nil.
14 Niptinmi Micaias:
“Tayta Diostam licänïpä ćhulaycú.
Pay nimäśhallantamari yaꞌa niycuśhä” nin.
15 Chaypïta mandacücäman Micaias ćhäluptinmi mandacüca nin:
“Micaias,
¿Galaad lädu Ramot malcaman pilyä lïmanchun icha manachun?”
nil.
Niptinmi Micaias:
“Liy jinalla;
Tayta Diosmi maquiquiman ćhulaycamunꞌa” nin.
16 Niptinmi Israelpa mandacünin nin:
“¿Ayca cuticamamari Tayta Diosta licäninchicpä śhaycaycachil rasuncällacta nimänayquipä niycuśhayqui?”
nil.
17 Niptinmi Micaias:
“Israelcunäta licayá,
ulꞌucunäćhu uwish chiꞌishactanümi,
mana michïniyütanümi.b
Chaymi Tayta Dios nin:
‘Paycunap duyñun manam canchu.
Wasinta-cama jawcalla cuticulcächun’ ” nil.
18 Chayćhümi Josafatta Israel lädup mandacünin nin:
“Ima allintamá Micaias willacula.
¿Manachun niyac,
cay nunaca mana allincunallacta willaycamäśhanta imamá?”
nil.
19 Niptinmi Micaias:
“Chay nishayquipïta Tayta Diospa nishanta canan uyalimay.
Tayta Dios dispächunćhu täcuyätam licälú.
Paypa ichünin allïnin lädunćhüñatacmi lluy pilyänincuna śhäcuyalcäña.c
20 Chayćhümi Tayta Dios nin:
‘¿Galaad lädu Ramot malcawan pilyä lil chayćhu wañunanpä mayanćha awnichinman?’
nil.
Niptinmi waquinnin jucta nipäcun;
juccunäñatacmi jucta nipäcun.
21 Chayćhümi juc ispiritu yalalcamul Tayta Diospa ñawpäninman śhaycucuycul nicuyan:
‘Yaꞌami awnïchishä’ nil.
Niptinmi Tayta Dios:
‘¿Imanuypam awnichinqui?’
nin.
22 Niptinmi ispirituca:
‘Lilculmi lluy willacünincunacta articunacta limachishä’ nin.
Niptinmi Tayta Dios:
‘Allinmi,
chayurá lilculꞌari articunanpä awnichimuy’ nin.
23 Chaymi lluy willacüniquicunap shiminman articunacta Tayta Dios ćhulälun.
Paymi camacaycüśhunayquipä camaycachin” nin.
24 Niptinmi Quenaanap chulin Sedequias aśhuycul Micaiasta cäraćhu lapyälun:
“¿Imanuypatan nimanquiman Tayta Diospa ispiritun yaꞌacta caćhaycamal amta limapäśhuśhayquita?”
nil.
25 Niptinmi Micaias:
“Nishäca rasunpa caśhanta tantianqui wasin-wasin pacacuyta pulilmi” nin.
26 Niptinmi Israelpa mandacünin nin:
“¡Micaiasta chalalcul malcap puydïnin Amonman puśhay,
chulí Joas caśhanman!
27 Chayćhümi yaꞌa mandacüca nishäta ninqui:
‘Carsilcäman wićhaycachil ash-ash yacullactawan micuyllacta ćhacapaycunqui,
pilyupi yaꞌa allin cutimunäcama’ ” nil.
28 Niptinmi Micaias:
“Sïchuśh allin cutïmuptiquiꞌa Tayta Dioschu manaćh limapämäla.
Chayurá cay nishäta amcuna yalpapäcunquimá” nin.
29 Chaypïta Israel lädup mandacüninwan Juda lädup mandacünin Josafat lipäcula Galaad lädu Ramot malcawan pilyamü.
30 Chayćhümi Josafatta Israel lädup mandacünin nin:
“Mana lisipämänanpämi juc müdanawan müdaculcul yaycuśhä;
amñatacmi jina mandacü müdanallayquiwan linqui” nil.
Nilculmi Israelpa mandacünin juc müdanawan müdaculcul pilyuman yaycula.
31 Siriap mandacüninñatacmi pilyupä cä carritancunap quimsa ćhunca quimsayu (33) puydïnincunacta niña:
“Amam jatućhäwanpis nï uchuchäcunällawanpis pilyapäcunquichu;
sinuꞌa Israelpa mandacüllanwanmi” nil.
32 Chaymi carritacunap puydïnincuna Josafatta licälälil nicuyalcan:
“Caymi Israelpa mandacüninca” nil.
Chaynu nilcul payman licuyalcaptinmi yanapapäcunanpä Josafat apalcaćhacuyan.
33 Chaynu Israelpa mandacünin mana caśhanta licälälilmari carritacunacta puśhäcunäpa puydïnincuna aticaćhayta caćhaycälälilaña.
34 Ñatac jucninmi yanꞌalninpi flïchanta ćhächishanćhu Israelpa mandacüninta ćhächin.
Chalicu-yupaynin tüllaśhan cä ućhcunpamari flïchaca yaycüña.
Jinaptinmi mandacüca carrita puśhäninta:
“Flïchawanmi ćhächiman;
pilyupïta cutichimay” nil.
35 Chay anyaśh muyun pilyuca sumä-sumä cacuyaptinmi carritallanćhu śhäcuyäta mandacücäta chalalapäcula,
Sirio läducunäpä chimpanćhu.
Ñatac dañädunpi yawartayca lluy carritamanmi unyäla;
tardilpuyaptinñatacmi mandacüca wañucun.
36 Inti patac üram jinantin pilyućhu cay limay cacuyan:
“¡Malcanta-cama,
allpanta-cama cutichun!
37 ¡Mandacüca wañucunmi!”
nil.
Chaymi mandacü ayäta Samariaman apalcul pampälälimula.
38 Chaypïtam Samariap istanquinćhu carritanta paꞌapäcula;
yawarnintapis allꞌucunämi lläwapäcula.
Chayćhümari waticacunäpis paꞌaculcä cala.
Chaynüpamá Tayta Dios willachishanca lulacacüla.d
39 Ñatac Acab mandacuyninćhu lluy lulaśhancuna,
marfilpïta palasyu ishpichishancunapis,
malcacuna lulachishancunapis Israel lädu mandacünincunap isquirbishan librunćhümri cayan.
40 Chay Acab wañucuptinñatacmi chulin Ocozias pudirnin mandacü cala.
Juda lädućhümi Josafat mandacun
41 Israel lädućhu tawa wataña Acab mandacü cayaptinmi Juda lädućhu Asapa chulin Josafat mandacuyta allaycula.
42 Josafat mandacuyta allaycula quimsa ćhunca pichayu (35) watanta liyalmi.
Jerusalen malcapïta ishcay ćhunca pichayu (25) watamari mandacula;
mamanñatacmi Silhip chulin Azuba cala.
43 Papänin Asa allin lulaśhancunallactanümi Josafat lulaycü cala.
Tayta Diospa ñawquin allincällactamari lulaycula.
Ñatac malcaca uycapäcuśhan,
insinsiucunactapis cañaycapäcuśhan altunninćhu uycunacunätam ichá pampaman mana muyuchilachu.
44 Israelpa mandacüninwan Josafat allin jawcallam cawsaycula.
45 Ñatac Josafat mandacuyninćhu lluy lulaśhancuna,
pilyucunaćhu llallishancunapis Juda lädu mandacünincunap isquirbishan librunćhümari cayan.
46 Paymi papäninpa mandacuyninćhu taytachanta alawayninwan quïda waticacücunäta malcapïta alapacüla.
47 Chay timpupa Edom malcaćhu manalämi mandacü calachu;
sinuꞌa juc ćhulaśhallalämi pudirnin cala.
48 Chaynütacmi Ofirpïta üructa apamunanpä Tarsis läducunäpa barcuntanu Josafat barcucunacta lulachila.
Ñatac Ezion-geber malcaćhu barcucunaca jiꞌacalpuptinmi manaña lipäculachu.
49 Chaymi Josafatta Acabpa chulin Ocozias nin:
“Nunäcuna ampa nunayquicunawan barcuyquicunawan lipäcuchun” nil.
Josafatñatacmi mana munalachu.
50 Josafat wañucuptinmi awquilluncuna pampaläśhan Davidpa Malcan nishanman pampaśha cala.
Chulin Joramñamá pudirnin mandacüca cala.
Israel lädućhu Ocoziasmi mandacun
51 Juda lädućhu ćhunca anćhishniyu (17) wataña Josafat mandacuyaptinmi Israel lädućhu Acabpa chulin Ocozias mandacuyta allaycula.
Ishcay watam Israelćhu mandacü cala.
52 Papäninpa,
mamanpa lulaynincunacta atichilmi Tayta Diospa ñawquin mana allinllacta lulala.
Nabatpa chulin Jeroboampa lulayninta atichilmari israelcunäta juchallacta lulachila.
53 Papäninnu taytacha Baalta alawayninwan,
sirbiyninwanmi Israelcunap Tayta Diosninta piñachila.