Israel lädućhümi Joram mandacun
3
Juda lädućhu Josafat ćhunca pusäniyu (18) wataña mandacuyaptinmi Israel lädućhu mandacuyta allaycula Acabpa chulin Joram.
Samariaćhümari ćhunca ishcayniyu (12) wata mandacula.
2 Joramꞌa Tayta Diospa ñawquin mana allintam lulala.
Manatacmá papänin-maman lulaśhantanüchu lulala.
Payꞌa taytacha Baalpa papänin lumi śhalcachishantapis wicapälamari.
3 Chaynu cayalpis Nabatpa chulin Jeroboam Israel läducunäta juchacta lulachishannüllatacmari mana allinta lulala.
Chaycunacta manamá caćhayculachu.
Moab lädu llallisha cananpämi Eliseo willacun
4 Moab lädup mandacünin Mesa nishanmi achca uwishniyu cala.
Paymi Israel lädup mandacüninta watan-watan alcabälacta pägala paćhac walanga (100,000) malta uwishcunactawan paćhac walanga (100,000) ulu uwishcunacta millwantinta.
5 Ñatac Acab wañucuptinmi Israel lädu mandacüninpa cuntran,
Moabpa mandacünin śhalcülun.
6 Chaymi Israel lädup mandacü Joram Samariapïta yalulcul lluy pilyänincunacta juntülun.
7 Jinalculmi Juda lädup mandacünin Josafatta caynu willachimula:
“Moabpa mandacüninmi cuntrá śhalcülun.
¿Pilyä liwshimanquimanchun?”
nil.
Niptinmi Josafat nin:
“Aw,
liwshishayquim,
pilyänïcunapis ampa pilyäniquicunam,
cawallücunapis ampa cawalluyquicunamari.
8 ¿Mayannin caminupmi lishun?”
nil.
Niptinmi Joram:
“Edomman lï chunyäcäpam lishun” nin.
9 Chaynüpa jucllachanacuyculmi Israel,
Juda,
Edom läducunap mandacünincuna lipäcula.
Ñatac anćhish muyun chunyäcäta muyupäcuśhancamam pilyänincunapä,
uywancunapä yacu pishïlun.
10 Chaymi Israel lädup mandacünin nin:
“¡Aaa,
cay quimsan mandacücäta Moabpa maquinman ćhulaycamänanchicpäćha Tayta Dios ayamälanchic!”
nil.
11 Niptinmi Josafat nin:
“Tayta Diosta tapunanchicpä,
¿cayćhu manachun willacünin can imamá?”
nil.
Niptinmi Israel lädup mandacücäpa jucnin puydïnin nin:
“Safatpa chulin Eliseo cayćhu cayan,
Eliaspa yanapänin” nil.
12 Niptinmi Josafat:
“Paypam Tayta Dios niycamäśhun” nin.
Niptin-pachallam quimsan mandacüca Eliseoman pasaculcäla.
13 Ćhäläliptinmi Israel lädup mandacüninta Eliseo nin:
“¿Imamanmi yaꞌaman śhamulanqui?
Papäniquip mamayquip willacünincunamanꞌari tapucü liy” nil.
Niptinmi Israelpa mandacünin nin:
“Manam.
Tayta Diosmi quimsa mandacücäta juntüläliman Moab lädup maquinman ćhulaycapämänanpä” nil.
14 Niptinmi Eliseo:
“Sumä munayniyu Tayta Dios sirbishäca tuquictam yaćhan,
Juda lädu mandacü Josafatta allinpä licaśhäta.
Pay mana captinꞌa amta manam limapacmanchu nï licayllapis licalcucmanpischu.
15 Má,
juc arpa tucäta puśhamumay” nin.
Chayćhu arpa tucäca tucayta allacuycuptinmi Tayta Diospa munaynin Eliseoman ćhäla.
16 Chaymi Eliseo nin:
“Tayta Diosmi nin:
Cay chaqui pampacunäman yacu juntamuchun.
17 Masqui bintucta,
tamyacta mana licayalcaptiquipis cay pampaćhu yacullam cacunꞌa.
Chaymi amcuna,
uywayquicunapis upyapäcunayquipä canꞌa.
18 Caycuna Tayta Diospa manamá imapischu.
Moab läducunätapis paymi maquiquiman ćhulaycamunꞌa.
19 Lluy murälläśha malcacunacta,
sumänin malcacunactapis amcunam camacaycälälinqui,
allinnin lantacunactapis cuchülälinquim,
lluy pucyucunactapis quillpälälinquim,
ćhaclancunamanpis lumicunactam juntälächinqui” nil.
20 Chay walantinta Tayta Diosman uycuna üra Edom lädupi alli-alli yacu licalimuśhancäwanmi lluy pampacunaca ućhäla.
21 Moab läducunäñatacmi quimsa mandacücunaca cuntran śhapämuśhanta yaćhälälil lluy-lluy nunancunacta juntüla.
Pilyananpä camäśhaña lluy-lluy umricunällactamari juntüla.
Jinalculmi malcanpa culindanćhu ćhulanacüśha capäcula.
22 Walantinta Moab lädu nunacunaca wälalla śhalcapäcunanpämi yacućhu intica chipipicyayäña.
Chaymi yawartanu yacüta licälälin.
23 Jinalmi nicuyalcan:
“¡Wic yawarmari!
Cuntranchic śhamü mandacücunäćha quiquinpula pilyapäcul wañuchinacalälin.
Chayurá,
cänincunacta waycamü lishunꞌari” nil.
24 Ñatac Israel lädu jamapäcuśhanman Moab läducunaca ćhaläliptinmi paycuna pilyayta allacaycälin.
Jinaptinmi Moab läducunaca ayicuyalcan.
Israel läducunäñatacmi aticulcal lluy camacaycälälin.
25 Malcancunactapis lluymi camacaycülun,
ćhaclancunamanpis lumicunactam śhüyaycälälin,
pucyuncunactapis pampälälinmi,
lantancunactapis lluymi cuchülälin.
Kir-hareset malcallaña mana camacaycüśha quïdayaptinpis waracawan pilyäcunämi cunćhacaycälil camacaycülun.
26 Chaynu llallicuyaptinmi Moab lädup madacünin ispädawan pilyä anćhish paćhac (700) nunacunawan liculcan Edompa mandacüninwan pilyä.
Ñatac manam atipapäculachu.
27 Chaymi pudirnin mandacü cananpä wamä chulinta wañulcachil taytachanman cañaycapula,
murällap jananćhu.
Chayurá Israel läducunap cuntran sumä piñacüluptinmi malcantaña cuticulcäla.