2 Ocoziasñatacmi^b Samariaćhu palasyunpa altuśhninpa bintananpïta palpülul däñacülun.

Chaymi nunancunacta caćhala Ecron malcap taytachan Baal-zebubman tapuchï:

“Cay dañädunpi allinyanꞌachun icha manachun” nil.

3 Ñatac Tayta Diospa anjilninmi Tisbe lädu Eliasta nin:

“Samaria mandacücäpa caćhamuśhan nunancunaman talipalculmi ninqui:

‘¿¡Ecron malcap taytachan Baal-zebubman tapucü linayquipä Israel lädućhu manachun Tayta Dios can imatá!?’

nil.

4 Chaymari Tayta Dios nin:

‘Cämaćhu caśhayquipïta manañam śhalcunquiñachu.

Aśhwanpa wañucunquiñam’ ” nil.

Niptinmi chaynüta Elias lulaycula.

5 Chay caćhaśhan nunancuna cutïlälimuptinmi mandacüca nin:

“¿Imapïmi cutïlälimunqui?”

nil.

6 Niptinmi paycuna nin:

“Juc nunam talipalcul nipäman:

‘Caćhamuśhuśhayqui mandacücäman cutilcul nipäcuy Tayta Dios caynu nishanta:

¿¡Ecron malcap taytachan Baal-zebubman tapucü linayquipä Israel lädućhu manachun Dios can imatá!?

Chaymi cämaćhu caśhayquipïta manaña śhalcunquiñachu.

Aśhwanpa wañucunquiñam’ ” nil.

7 Nipäcuptinmi mandacüca:

“Chay talipalcul nishuśhayqui nunacunaca ¿imanuymi caña?”

nin.

8 Niptinmi nipäcun:

“Millwasapa capütanwan,

cuyrupïta luläśha wiyawninćhu watacuyümi caña” nin.^c

Niptinmi mandacüca:

“Aaa,

Tisbe malcayu Eliasćha cala” nin.

9 Chaymi Eliasta ashichimü pilyäcunap jucnin puydïninta picha ćhunca (50) pilyänintinta caćhälun.

Ćhänanpämi Eliasñatac ulꞌup puntanćhu täcuyäña.

Chaymi puydïca nin:

“Tayta Diospa willacünin jiꞌalpamuy;

mandacücämi ayayächimuśhunqui” nil.

10 Niptinmi Elias nin:

“Tayta Diospa willacünin rasunpa captiꞌa janay pachäpïta nina jiꞌalpaycamul amtawan picha ćhunca (50) nunayquicunactam lupälälishunqui” nil.^d

Chay ürallam janay pachäpïta nina jiꞌalpaycamul puydïcäta picha ćhunca (50) pilyänintinta lupäla.

11 Chaymi mandacüca jucnin puydïtañatac picha ćhunca (50) pilyänintinta caćhälun Eliasta ashipämunanpä.

Chaymi Eliasta talilcul puydïca nin:

“Tayta Diospa willacünin jiꞌalpamuy;

mandacücämi ayayächimuśhunqui” nil.

12 Niptinmi Elias:

“Tayta Diospa willacünin rasunpa captiꞌa janay pachäpïta nina jiꞌalpaycamul amtawan picha ćhunca (50) nunayquicunacta lupälälishunqui” nin.

Chay ürallam janay pachäpïta nina jiꞌalpaycamul puydïcäta picha ćhunca pilyänintinta lupäla.

13 Chaypïtapis mandacüca juc puydïtañatacmi picha ćhunca (50) pilyänintinta caćhälun.

Paymi Eliasta talilcul puntanman unꞌulacuycul mañacücuyan:

“Tayta Diospa willacünin ama chaynu callaychu,

cay nunallayquita,

chaynütac picha ćhunca (50) nunallayquip cawsaynïta llaquipaycallämayꞌari.

14 Punta śhapämü puydïcunäta picha ćhunca nunantincamactam janay pachäpïta nina jiꞌalpaycamul lupälun.

Canan yaꞌapa cawsaylläta llaquipaycallämayꞌari” nil.

15 Chayćhümi Eliasta Tayta Diospa anjilnin nin:

“Ama manchacuychu;

paywan jiꞌalpuy” nil.

Niptinmi puydïcäwan Elias jiꞌalpapämula mandacücäman.

16 Ćhayculmi mandacücäta Elias nin:

“Tayta Diosmi nin:

¿¡Ecron malcap taytachan Baal-zebubman tapuchï caćhanayquipä Israel lädućhu manachun Tayta Dios cala imatá!?

Chaymari cämaćhu caśhayquipïta manaña śhalcunquiñachu;

aśhwanpa wañucunquiñam” nil.

17 Chaynu Tayta Dios Eliaswan willachishannümi mandacüca wañucula.

Ñatac Ocoziaspa chulin mana captinmi wawꞌi-caśhan Joramña pudirnin mandacü cala.

Cay pasala Josafatpa chulin Joram ishcay wataña Juda läducta mandacuyaptinmi.

18 Ñatac Ocoziaspa mandacuyninćhu lluy lulaśhancuna Israel lädu mandacünincunap isquirbishan librunćhümari cayan.