Sibawan Davidmi limapäcun
16
Chaypïta chay ulꞌup puntanpa David pasalcuyällalmi Mefi-bosetpa uywaynin Sibaa ćhasquïnin śhamücäwan tincülun.
Paymi ishcay sillacuna aśhnuman ishcay paćhac (200) tantacta,
culpachäśha paćhac (100) päsasta,
chaquïsha paćhac (100) ïgusta,
juc laqui bïnuctapis cargacüśha śhamuña.
2 Chayćhümi Sibacta mandacüca nin:
“¿Imapätá caycunacta apamulanqui?”
nil.
Niptinmi Siba:
“Aśhnucunaca am mandacücäpä aylluyquicuna sillaculcänanpämi.
Tantacunäwan päsas,
chaqui ïgus culpachäśhacunacá pilyäniquicuna micapäcunanpämi.
Bïnucá chunyäcäćhu piswäcunapämi” nin.
3 Niptinmi mandacüca:
“¿Mayćhütan duyñuyquip willcan cayan?”
nin.
Niptinmi Siba:
“ ‘Saulpa willcan caśhäpaćh Israel caśhtacunaca mandänin canäpä ćhulaycälimanꞌa’ nilmi” nin.
4 Niptinmi mandacüca:
“Mefi-bosetpa lluy cänincuna canan ampäñam cayan” nin.
Niptinmi Siba uyshucuycul:
“Mandacüní taytallay,
sulpä callächun llaquipayniquićhümi imaypis cayculläśhä” nin.
5 Chaypïta Bahurim malcaman ćhäluptinmi Saulpa ayllunpi cä Gerap chulin Simei śhutiyu yalämuña mandacü Davidta palaśhtin.
6 Jinaman lluy pilyäcunaca,
paycunap puydïnincuna,
täpänincuna mandacü Davidpa wicninta-cayninta liyalcaptinpis lumiwanmari chapicuyan.
7 Chay palayninćhümi Simei nin:
“¡Nuna wañuchicü pasaypi suylacära caypïta licuy!
8 Cananꞌa Tayta Diosmi mućhuycayächishunqui Saulpa aylluncunacta wañulcachil pudirnin taycucuycuśhayquipïta.
Chaymari chuliqui Absalonmanña mandacuyniquita Tayta Dios uycülun.
Nuna wañuchicü caśhayquipïtamari cay ñacaycunacta pasayanqui” nil.
9 Niyaptinmi Sarviap chulin Abisai Davidta nin:
“¿Cay wañüśha allꞌuca imanuypamá mandacü taytätalä nićhacuśhunquiman?
¡Canan-pachalla umanta witümuśhä!”
nil.
10 Niptinmi mandacüca:
“Sarviap chulincuna,
caycuna ¿imactam ucuśhunqui?
Caycuna manamá yaꞌapïchu ni ampïchu ima lulapäcunayquipäpis.
Ichapis Tayta Dios caćhamula chaynu palamänanpä.
Chaynu captinꞌa ¿mayanmá imallactapis niycunan canꞌa?”
nin.
11 Jinaman Abisaitawan lluy puydï yanapänincunactam David nin:
“Quiquïpa chulïpis wañuchiyta munayämaptinꞌa ¿imactalämá Benjamin ayllupïta alcaycüman?
Jinaꞌari palacamächun quiquin Tayta Diosćha caćhamula.
12 Ichapis ñacaynïta licaycul ñacaynïman tincüta Tayta Dios allinpä licaycamanꞌa” nil.
13 Chaypïtam David nunancunawan pasapäcula.
Simeiñatacmi ulꞌup wätanpa palaśhtin,
lumicunacta chapishtin,
pulbucunacta talcachishtin lila.
14 Chay mandacücäwan lluy liwshïnincuna sumä illacälälisha ćhalälilmari chayćhu jamapäcula.
Jerusalenmanmi Absalon yaycun
15 Absalonwan lluy Israel liwshïnincunañatacmi Jerusalenman yaycälälin.
Paycunawantacmi Ahitofelpis lila.
16 Chayćhümi Absalonta licä lil Davidpa apanacuśhan Ar lädu Husai nicuyan:
“¡Mandacüca cawsachun!
¡Mandacüca cawsachun!”
nil.
17 Niptinmi Absalon:
“¿Yaꞌaman śhamuśhayquiwan chalapacuna caśhayquitachun camalachicuyanqui imamá?
¿Davidwan allinpä apanacuśhayquitachun licachicuyanqui imatá?”
nin.
18 Niptinmi Husai:
“Paywan manamari lïmanchu.
Aśhwanpa Tayta Dios aclaycuśhancäwan,
cay malcapis,
jinantin Israelpis aclaśhancäwanmari quïdacuśhä.
19 ¿Mayantamá yaꞌa sirbishä?
¿Manachun chulinta sirbiycuśhä?
Taytayquita sirbishänümi amtapis canan sirbiycuśhayqui” nin.
20 Chaypïtañam Ahitofelta Absalon nin:
“Imacta lulanäpäpis niycälimayꞌari” nil.
21 Niptinmi Ahitofel:
“Taytayqui wasinta täpananpä caćhaycuśhan uywanacuśhan walmincunawan puñucuy.
Chaynüpamá jinantin israelcunaca tantiapäcunꞌa papäniquip sumä millachicuynin caśhayquita.
Jinäśhuptiquimari śhalcüniquicunaca masta callpanchaculcanꞌa” nin.
22-23 Chay timpucuna Ahitofelpa limapayninta Davidpis,
Absalonpis quiquin Tayta Diospa limaynintanümari licapäcula.
Chaymari wasip jananćhu chucllachälälipuptin lluy israelcunäpa ñawquin papäninpa uywanacuśhan walmincunawan Absalon puñula.b