Filisteo läducunäćhümi David yaćhan
27
Davidñatacmi ichá śhunꞌunćhu nicula:
“Cay muyuncunaćhüćha Saul wañüchimanꞌa.
Chayurá Filisteo läducunäpa malcanmanña ayicuśhä.
Chayćha jinantin Israel caśhtacunäćhu Saul ashiyämal pishipälunꞌa.
Chaynüpaćh maquinpïta libracüśhä” nil.
2 Chaymi süta paćhac (600) liwshïnin nunancunawan Gat malcaman liculcan.
Chay malcapam Maocpa chulin Aquis mandacünin cala.
3 Chaymi David lluy nunancunapis aylluntin-cama mandacü Aquispa caśhan Gat malcanćhu yaćhapäcula.
Davidmi puśhala ishcaynin walminta:
Jezreel malcayu Ahinoamta,
Nabalpi japanyäsha Carmel malcayu Abigailtapis.
4 Chaynu David Gat malcaman ayicuśhanta Saul yaćhälulmari manaña ashilañachu.
5 Davidñatacmi Aquista nin:
“Mandacü taytallay,
allinpä licaycamalꞌa ćhaclayu jucnin malcayquićhu yaćhaycunäpä awniycallämay.
Cay uyway nunallayqui mandacücäpa malcanćhu yaćhaśhanꞌa manamá allinchu” nil.
6 Niptinmi chay nishan muyunlla Siclag malcacta Aquis uycülun.
Chaymi canancamapis Siclag malcaca Judapa mandacünincunamanña tücan.
7 Chay Filisteo läducunäpa allpanćhu juc wata tawa quillayümi David yaćhala.
8 Chay Shur läduman Egiptocama una-unaypïñam yaćhapäcula Gesur,
Gez,
Amalec caśhtacunaca.
Paycunacta waycämi David lluy nunancunawan yalapäcu cala.
9 Chay malcacunäman yaycapäculmi jucllactapis mana caćhaycul walmictapis umrictapis camacaycälälï cala.
Jinaman uwishnincunactapis,
wäcancunactapis,
aśhnuncunactapis,
camïlluncunactapis,
aśhta müdanancunactapis apaculcämi cala.
Jinalculmi Aquisman cutipäcula.
10 Chayćhümi Aquis tapuycun:
“¿Canan,
may malcactam waycämunqui?”
nil.
Niptinmi David:
“Abisnintá Judapa sur lädunpïmi,
ütac Jerameelpa,
ütac Ceneo caśhtacunaca yaćhaśhancunapïtam waycämulá” nil niycü cala.
11 David manamari jucllay umrillactapis walmillactapis cawsayniyüta caćhayculachu:
“Yanꞌalmi Gatman lil ima lulaśhanchictapis willapacunman” nil.
Chay Filisteo läducunap allpanćhu yaćhapäcuśhancama chaynüllam lulaycapäcü cala.
12 Ñatac Davidmanmi Aquis chalapacula.
Chaymi nicula:
“Israel caśhta-masincunacta ćhïnicuytam David allacuycun.
Chayurá sirbïnïñaćh imaypis canꞌa” nil.