Saultam mandacü caśhanpïtam Tayta Dios julun
15
Juc muyunmi Saulta Samuel nin:
“Tayta Diosmi caćhamäla Israel malcanpa mandacüninpä japächaycunacpä.a
Chayurá Tayta Dios nishanta canan uyalimay.
2 Sumä munayniyu Tayta Diosmi caynu niyäśhunqui:
‘Egiptopïta Israel caśhtacunaca śhayalcämuptin Amalec caśhtacuna mana pasachipämuśhanpïtam paycunacta yaꞌa mućhuycachishä.b
3 Chayurá Amalec caśhtacunäta camacaycälimü lipäcuy.
Ñatac amam imallantapis puchuycälinquichu.
Aśhwanpa mana llaquipayculmi manyapïta wañuchipäcunqui wayapacunäta,
walmicunäta,
chulincunacta,
iñachancunacta,
wäcancunacta,
uwishnincunacta,
camïllu uywancunacta,
aśhnuncunactapis’ ” nil.
4 Saulñatacmi Israel pilyänincunacta ayalcachil ayca capäcuśhantapis Telaim malcaćhu fintala.
Chayćhümi ćhaquiwan pulï pilyäcuna ishcay paćhac walanga (200,000) capäcula,
Juda ayllupïñatac ćhunca walanga (10,000) capäcula.
5 Jinalculmi Amalec caśhtacunäpa puydï malcanman Saul yaycuycul pampannincunaćhu pacacüśha alcapäcula.
6 Chayćhümi Ceneo caśhtacunäta Saul nin:
“Amcuná Israel caśhtacunaca Egiptopïta yalayalcämuptin llaquipaycälilanquimari.
Chayurá Amalec caśhtacunäpïta liculcayñari paycunawan cuscacta mana camacapäcunacpä” nil.
Chaymi Amalec lädupïta Ceneo läducunaca liculcäla.
7 Chaypïtam Amaleccunäta Saul llallïla Havila lädupïta allacuycul aśhta Egiptop culindanćhu cä Shur läducama.
8 Jinalmi Amalec läducunäpa mandacünin Agagta chaläla.
Lluy nunancunactañatacmi ichá ispädawan camacaycüla.
9 Chay mandacünintá Saulwan lluy pilyänincuna manam wañuchipäculachu.
Jinaman allinnin uwishnincunacta,
wäcancunacta,
uña wäcancunactapis manatacmari wañuchipäculachu.
Ima ćhaniyünincunactapis manatacmi chincachipäculachu.
Mana bälicunällactamari lluy camacaycälälila.
10 Chaypïtam Samuelta Tayta Dios nin:
11 “Mandacüpä Saulta ćhulaśhäpïta jucmanyäśham cayá.
Pay yaꞌapïta japächaculculmi nishäcunacta mana lulalachu” nil.
Chaynu niptinmi Samuel sumä llaquicülul walächi Tayta Diosta ruygacula.
12 Wäläluptin aspi-aspiylla Saulman ćhaycälilmi nipäcun:
“Carmel malcamanmi Saul licun.
Chayćhümi payta yalpapäcunanpä juc wancacta śhalcächin.
Chaypïtam muyulcul Gilgal malcaman cuticun” nil.
13 Niptinmi Saul caśhanman Samuel ćhäluptin Saul nin:
“Tayta Diosninchic allinpä licaycuśhunqui.
Tayta Dios nimäśhanta lulaycüñam” nil.
14 Niptinmi Samuel:
“¿Chayurá imatan uwishpa,
wäcap waꞌaynin uyalishäca?”
nin.
15 Niptinmi Saul:
“Amalec läducunäpïta pilyäcunaca apapämuśhanmi cayan.
Tayta Diosniquita uycälälinäpämi allinnin uwishcunacta,
wäcacunacta quïdachipäculá.
Juccunätá lluymi camacaycälälilá” nin.
16 Chaynu limayällaptinlämi Samuel nin:
“¡Upälla!
Tayta Dios cay tuta nimäśhanta willaycuśhayqui” nil.
Niptinmi Saul:
“Má,
willaycamay” nin.
17 Niptinmi Samuel nin:
“¿Manachun mana cäpa licacuyalpis Israel ayllucunäpa puydïnin caycunqui?
¿¡Manachun Tayta Dios israelcunäpa mandäninpä japächaycuśhulanqui imatá!?
18 ¿Manachun Tayta Dios caćhaśhulanqui chay juchasapa Amalec läducunäta camacalcul lluy chincachinayquipä?
19 ¿Imapïtamá Tayta Dios nishuśhayquita mana uyaliculanquichu?
¿Imapïtamá allinnin uywacunacta chalacuycuśhayquiwan Tayta Diospa ñawpäninćhu mana allinta lulayanquiman?”
nil.
20 Niptinmi Saul nin:
“Tayta Dios nishantá yaꞌa uyaliculämari.
Pay nimäśhanta cäsuculmari Amalec läducunäpa mandacünin Agagta puśhayämüpis,
jinaman lluy nunancunactañatac camacaycayämú.
21 Ñatac pilyäcunämi Tayta Diosniquita Gilgalćhu uycälinäpä allinnin uwishcunactawan wäcacunacta japächapäcula” nil.
22 Niptinmi Samuel nin:
“¿Tayta Dios cushicun uycuptinchicchun,
cañaywan uycuptinchicchun icha pay nishanta cäsucuptinchicchun?
Ulu uwishta uycuśhanchicpïtapis mas ćhaniyu cäsucuycämá;
cañaywan uycuśhanchicpïtapis
mas ćhaniyu uyalicuśhanchiccämá.c
23 Chayurá Tayta Diospa cuntran śhalcuyca rüjacuycunacta luläcänümi.
Mana cäsucücá taytachacunacta alawayäcänümi cayan.
Maynümi Tayta Dios nishanta ipanchälunqui;
chaynümi amtapis mandacü caśhayquipïta julüśhunqui” nil.
24 Niptinmi Saul nin:
“Juchactam lulällá.
Tayta Dios camachimäśhanta nï am nimäśhayquitapis manam cäsuculächu.
Nunacunäta manchaculmi nipämäśhanta ćhasquiculá.
25 Juchalläta canan pampachaycamalꞌari Tayta Diosta alawaycü cutilläśhun” nil.
26 Niptinmi Samuel:
“Amwan manam cutishächu.
Tayta Dios willaśhuśhayquita manam am cäsuculanquichu.
Chaymi paypis Israel caśhtacunäpa mandacünin cayniquipïta julüśhunquiña” nin.
27 Chaymi licunanpäña Samuel muyulcüluptin müdananpä manyanpi Saul chalacüluptin müdanan laćhyälun.
28 Jinaptinmi Samuel nin:
“Caytanümi Tayta Dios laćhyälun Israel caśhtacunäpa mandacünin caśhayquipïta.
Chaynu jululculmi ampïpis mas allinninmanlä ćhulaycun.
29 Israel caśhtacunäta altuman juluycü Tayta Diosꞌa manam articunchu,
nï jucmanyanchu.
Pay manamá nunallachu jucmanyänanpä” nil.
30 Niptinmi Saul nin:
“Aw,
yaꞌa juchacülümi.
Ñatac ama chaynu caychu,
malcap yaśhancunaćhu,
jinantin malcäćhu mandacütanülä licaycallämay.
Chayurá canan cutilläśhun Tayta Diosniquita alawaycunäpä” nil.
31 Chaymi Samuelwan cutipämul Tayta Diosta Saul alawaycula.
32 Chaypïtam Samuel nin:
“Amalec läducunäpa mandacünin Agagta cayman puśhamuy” nil.
Agagñatacmi cushisha śhamula:
“Rasunpa,
manañam wañuchimanꞌañachu” nil.
33 Samuelñatacmi nin:
“Ispädayquiwanmi achca-achca walmicunacta mana wawiyüta caćhayculanqui.
Chaynümi canan mamayquipis mana wawiyu quïdanꞌa” nil.
Chaynu niculmi Tayta Diospa ñawpäninćhu Gilgal malcaćhu Agagta wañulcachil uchuy-uchuyllacta Samuel cuchuy pawäla.
34 Chaypïtam Samuel licula Rama malcaman.
Saulñatacmi Gabaa malcaćhu wasinman licula.
35 Chaypïta cawsaśhancama Samuel manañam imaypis Saulta licalachu.
Jinalmi Saulpïta allicta waꞌacula.
Tayta Diosñatacmi jucmanyäla Israel caśhtacunäpa mandacüninpä Saulta ćhulaśhanpïta.