Filisteo läducunätam Jonatan camacaycun
14
Juc muyunćhümi Saulpa chulin Jonatan ispäda apä yanapäninta nin:
“Acu,
chimpaćhu cä Filisteo pilyäcunäman chimpäśhun” nil.
Papänintam ichá mana yaćhachilachu.
2 Saulñatacmi cayäla Gabaa malcap manyanćhu,
Migronćhu cä granadillap tunäninćhu.
Paywantacmi süta paćhac-yupay (600) pilyäcunäpis cayalcäla.
3 Chay Silo malcaćhu Tayta Diospa sasirdütin Ahiasmi chalicuna ćhulacüśha cayäla.
Paymi Ahitobpa chulin,
Icabodpa subrinun,
sasirdüti Elipa chulin Fineespa willcan cala.
Ñatac mayanpis manam yaćhalachu Jonatan licuśhantá.
4-5 Jonatanmi Filisteo pilyäcunäman ćhänan cala.
Chaymi wayu pasanancäpä wic lädu cay lädunćhu jatućhä-cama ulꞌu cala.
Jucnin nurti lädućhu Micmaspa chimpanćhu cäcäpa śhutinmi Boses cala;
sur lädućhu Gabaa malcap chimpanćhu cä ulꞌüpañatacmi śhutin Sene cala.
6 Chayćhümi ispäda apä yanapäninta Jonatan nin:
“Acu,
chimpaśhun cay mana siñalachicüśhacunäman.
Ichaläpis Tayta Diosninchic yanapaycamachwan.
Paypá manamá imapis sasachu.
Achcawanpis ashllawanpis payꞌa salbaycamachwanmi” nil.
7 Niptinmi ispäda apä yanapänin nin:
“Lluy pinsaśhayquita lulay jinalla.
Yanapänacpä yaꞌa listumari cayá” nil.
8 Niptinmi Jonatan nin:
“Acuchun chimpaśhun,
wic nunacuna caśhancäman licamänanchicpä.
9 Sïchuśh paycuna nimäśhun:
‘Chayllaćhu alcapämay śhapämunäcama’ nil nimaptinchicꞌa manaña lilćha chayllaćhüña alcaśhun.
10 Ñatac ‘ishpipämuy’ nimaptinchicꞌa lishunćha.
Chaynüpam yaćhaśhun llallinanchicpä Tayta Dios yanapaycamäśhanchicta” nil.
11 Chaynüpam Filisteo läducunäwan licachicälälin.
Chaymi Filisteo läducunaca licalälil nin:
“Licapäcuy,
Israel caśhtacunaca pacaläśhan maćhaynincunapi yalaćhacayalcämunña” nil.
12 Chayćhümi Jonatantawan ispäda apä yanapäninta ayacuyalcan:
“¡Cayman ishpipämuy tincüniquiman uycälinacpä!”
nil.
Niptinmi Jonatan yanapäninta nin:
“Acu lishun,
Tayta Diosmi Israel caśhtacunäpa maquinchicman ćhulaycamunꞌa” nil.
13 Chaymi Jonatan maquinwan chalapacuśhtin lätaypa ishpila;
yanapäninpis ipantam atila.
Filisteo pilyäcäta Jonatan cućhpachishancätá yanapäninmi camacalpula.
14 Chay wamä pilyaycäćhu masqui wätap uchuy patacllanćhüpis ishcay ćhunca-yupay (20) nunacunactam Jonatanwan yanapänin wañülächila.
15 Chaymi sumä manchälälin jamapäcuśhanćhu cäcunaca,
wicpa-caypa pilyä lï Filisteo läducunaca,
chaynütac täpäcunaca,
camacaycü lïcunäpis.
Chayćhütacmi pachacuyuypis pasäla.
Jinaptinmi jinantin nunacunaca sumä-sumä chucchucuyalcäla.
16 Saulñatacmi awayta nunancunacta Benjamin ayllup Gabaa malcanman ćhulala.
Paycunam Filisteo läducunaca muspäśhanu wicman-cayman ayipäcuśhanta licälälin.
17 Chayćhümi pilyänincunacta Saul nin:
“Canan-pacha listacta pasay,
mayancuna mana caśhantapis yaćhananchicpä” nil.
Chaynu listacta pasaptinmi Jonatanwan ispäda apä yanapänin mana capäcuñächu.
18 Chaymi sasirdüti Ahiasta Saul nin:
“Tayta Diospa chuya babulninta apamuy” nil.
(Chay muyuncuna Israel caśhtacuna caśhancäćhümi chuya babulca cayäla.)
19 Ñatac sasirdütiwan Saul limayaptinmi Filisteo läducuna caśhancäćhu mas-mastaña muspaypa-muspacuyalcan.
Chaymi sasirdüticta Saul nin:
“Amaña apamuychu” nil.
20 Nilculmi Saul lluy nunancunawan juntunacuycul pilyä pasaculcan.
Filisteo läducunäñatac sumä-sumä muspälälil quiquin-pula wañuchinacücuyalcan.
21 Jinaman puntapïtaña Filisteo allpaćhu yaćhä Israel caśhta pilyawshï lïcunäpis Jonatanman,
yanapäninmanña jucllachanacälälin.
22 Chaynütacmi Efrainpa ulꞌuncunaćhu pacalä Israel pilyäcunäpis Filisteo läducunaca ayipäcuśhanta yaćhälälil yalälälimun camacawshinanpä.
23 Chay wañuchinacuycämi Bet-aven malcäcama cala.
Chaynüpam Israel caśhtacunäta Tayta Dios salbaycula.
Saulmi limalicun
24 Ñatac chay muyun Israel caśhtacunaca sumä pishipäśha cayalcalmi mayanpis ima micuyllactapis mana mallilcapäculachu.
Jinantin malcäta Saulmi limalicüla:
“Mana allinpä licaśham canꞌa manaläpis tutalpuptin,
manaläpis ćhïnicunïcunacta cutichicuyaptí micücá” nil.
Chaymi mayan pilyällanpis manalä imallactapis miculachu.
25 Lluy pilyäcunämi ćhälälin pampaćhu mishqui cä muntiman.
26 Chay muntiman lluy yaycälälilmi licälälin yacunu mishqui unyayäta.
Ñatac limalicuśhanta manchacuypïmi mana mayanpis mallilcuyllapis mallilculachu.
27 Jonatanñatacmi mana uyalilachu papänin lluy pilyäcunäman limalicuśhanta.
Chaymi aptiläśhan garutinwan mishquiman tucsiycul śhuꞌulcula.
Chaynüpam callpan licalïmula.
28 Jucnin pilyäñatacmi nin:
“Papäniquim lluy pilyäcunäman limalicula:
‘Canan muyun imallactapis micücá mana allinpä licaśham canꞌa’ nil.
Chaymi lluy nunacunaca piswalpuyalcanña” nil.
29 Niptinmi Jonatan nin:
“Jinantin malcanchictam papäní mana allinman ćhulälun.
Licayꞌari cay mishquicta śhuꞌuluptí callpäpis licalïmun.
30 Maynülä pilyäninchiccunap callpan canman cala ćhïnicüninchiccunapi apamuśhanchicta micalcapäcuptinꞌa.
Maynu-maynütalä Filisteo läducunäta camacaycüluchwan cala” nil.
31 Chay muyunmi Israel caśhtacunaca Filisteo läducunäta camacaycüla Micmaspïta aśhta Ajaloncama.
Ñatac pilyäcunaca sumä pishipäśham cayalcäla.
32 Chaymi pilyäcunaca ćhïnicünincunapi waycamuśhanta chalacälälin:
uwishnincunacta,
wäcancunacta,
uñancunactapis.
Chaycunactam pampäćhu muꞌulcälil yawarnintinta lluy micacälälin.
33 Chay lulaśhantam waquin nuna Saulman willaycula:
“Pilyä nunacunämi Tayta Diospa cuntran lulayalcan,
yawarnintinta aycha micuśhanwan” nil.b
Niptinmi Saul nin:
“¡Amcuna pasaypi mana cäsuculmi ipanchayalcanqui!
Caycama juc jatun lumicta cućhpaywan apapämuy.
34 Jinaman lluy nunacunäta willamuy wäcanta ütac uwishninta cayman atipämunanpä.
Cayćhüćha wañulcachil micapäcunꞌa.
Chayćha mana yawarniyütaña micapäcul Tayta Diospa cuntran manaña lulapäcunꞌachu” nil.
Chaymi chay tuta wäcantin-cama lilcälil chayćhu wañuchipäcula.
35 Saulñatacmi Tayta Diospä uycuna patacta chayćhu lulaycapula.
Chaymari wamä uycuna patac lulaycuśhanca cala.
36 Chaypïtam Saul pilyänincunacta nin:
“Canan tuta Filisteo läducunäman lishun.
Manaläpis achicämuptinmi lluy-lluyta wañulcachil ima aycantapis waycämuśhun” nil.
Niptinmi nipäcun:
“Pinsaśhayquimannuꞌari lulaycuy” nil.
Niptinmi sasirdütica:
“Puntactá Tayta Diosta tapuycuśhun” nin.
37 Niptinmi Tayta Diosta Saul tapun:
“¿Filisteo läducunäta camacaycülümanchun?
¿Israel caśhtacunäpä maquinmanchun ćhulaycamunqui?”
nil.
Ñatac Tayta Diosꞌa chay muyun manam imactapis limalimulachu.
38 Chaymi Saul nin:
“Lluy pilyäcunäpä puydïnincuna cayman śhapämul ashipäcuy canan muyun mayan juchacuśhantapis.
39 Israel caśhtacunäpä salbaycünin Tayta Diosmi licäninchic cayan,
masqui chulí Jonatan juchayüca captinpis wañunꞌam” nil.
Niptinmi lluy nunacunaca imallactapis mana limalcälilachu.
40 Chaypïtam Israel caśhtacunäta Saul nin:
“Amcunam chay-lädućhu capäcunqui;
yaꞌañatacmi chulí Jonatanwan cay lädućhu capäcuśhä” nil.
Niptinmi paycuna nipäcun:
“Pinsaśhayquimannuꞌari lulaycuy” nil.
41 Jinaptinmi Israel caśhtacunäpa Tayta Diosninta Saul nin:
“Rasuncäta niycallämay,
¿mayantan cuntrayqui lulällan?”
nil.
Chayćhümi tücachishanca Jonatanman,
Saulman ćhälun.
Nunacunäñatacmi mana juchayu quïdälun.c
42 Chaymi Saul nin:
“Má canan licaycuśhuntac,
yaꞌachun icha chulí Jonatanchun juchayüca capäcú” nil.
Chayćhümi Jonatanman tücälun.
43 Chaymi Jonatanta Saul nin:
“Willamayꞌari ima lulaśhayquitapis” nil.
Niptinmi Jonatan nin:
“Apaśhá garutip puntanwanmi mishquicta śhuꞌulculá.
¿Chayllapïchun wañuchisha caśhä imamá?”
nil.
44 Niptinmi Saul nin:
“Am,
mana wañuchisha captiquiꞌa Tayta Dios yaꞌacta sumä-sumäta mućhuchimächun” nil.
45 Nunacunäñatacmi Saulta nicuyalcan:
“Imanuypatan Israel caśhtacunäta llalliyächimaptinchic Jonatan wañuchisha canman.
¡Chaynuꞌa manamá canmanchu!
Tayta Dios cawsaśhan-laycu manamá Jonatanpa jucllay ächallanpis pampäman palpuycunmanchu.
Tayta Diospa yanapayninwanmi llalliycachimälanchic” nil.
Chaynüpam nunacunaca libraycula Jonatan wañuchisha cananpïta.
46 Saulñatacmi Filisteo läducunäta manaña camacayta ćhapalachu.
Chaymi Filisteo läducunaca malcanta cuticulcäla.
47 Chaypïtam Israel caśhtacunäpa mandacünin caśhanta Saul tacyaycachil muyülïninćhu lluy ćhïnicünincunawan pilyayta allacuycula:
Moab,
Amon,
Edom läducunäwan,
Soba malcap puydïnincunawan,
Filisteo läducunäwanpis.
Lluy pilyä lishanćhüpis llallilam.
48 Chaynütacmi pilyänincunacta juntuycul Amalec läducunäta llallïla.
Chaynüpam waycacücunäpa maquinpïta Israel caśhtacta libraycula.
Saulpa aylluncuna
49 Saulpa walaśh chulincuna caycunam cala:
Jonatan,
Isui,
Malquisuapis.
Wamla chulincunañatacmi cala:
Wamäca Merab,
śhullcäñatami Mical.
50 Saulpa walminñatacmi Ahimaaspa walmi chulin Ahinoam cala.
Pilyänincunap puydïninñatacmi Abner cala.
Paymi Nerpa chulin,
Saulpa tiyun cala.
51 Saulpa papänin Ciswan Abnerpa papänin Nerꞌa capäcula Abielpa chulincunam.
52 Saulpa jinantin mandacuyninćhu Filisteo läducunäwan sumä pilyayllaćhümi cacula.
Chaymi Saul allinnin sumä nunacunäta pilyänincunapä juntula.