Micaiapa taytachancunactam Dan ayllucunaca apaculcan
18
Chay timpu Israel caśhtacunaca mana mandacüniyümi cayalcäla.
Dan ayllucunäpisa Israel caśhtacunäćhu allpan mana tücachisha calmi mayćhu yaćhananpäpis ashishtin pulipäcula.
2 Chaymi Dan ayllucunaca Zorawan Estaol malcacunäpi picha sumä-cama nunancunacta caćhala,
tuquicta licapämunanpä:
“Lipäcul chay allpacunäta sumäta licapäcamuy” nil.
Chaymi paycuna Efrainpa ulꞌuncunaman yaycapäcul Micaiap wasincama ćhälälin chayćhu jamapaculcänanpä.
3 Chay Micaiap wasinman sircaycuyalcalmi müsu Levi ayllu caśhanta tantiälälin.
Chaymi yaycaycälilña nin:
“¿Mayantan cayman puśhämuśhulanqui?
¿Imactam cayćhu lulayanqui?
¿Imamanmi śhamulanqui?”
nil.
4 Niptinmi müsuca imanuypa Micaia licaycuśhantapis,
chaynutac sasirdütin cananpä mincacuśhantapis willaycula.
5 Paycunañatacmi nipäcun:
“Chayurá má,
Tayta Diosta tapuycälipamay cay lipäcuśhäćhu imanuy capäcunäpäpis” nil.
6 Niptinmi sasirdütica:
“Jawcalla lipäcuy.
Tayta Diosmi may lipäcuśhayquićhüpis yanapaycälishunqui” nin.
7 Chaypïmi picha licä śhamücunaca Lais läducta liculcäla.
Chayćhümi licälälin chayćhu yaćhäcunaca Sidon lädup custumrinmannu chalapacüśha,
jawca,
mana tantiapacul cayalcäta.
Lluy imacunapapis janallanćhümari,
mayanpapis mana tupaycuśha capäcuña.
Paycuna Sidon läducunäpi calućhu yaćhapäculmari mayanwanpis mana jucllachanaculcäñächu.
8 Chaypïta picha licäcunaca Zorawan Estaol malcacunäpi cä malca-masincuna caśhancäman cutiycäläliptinmi:
“¿Imanuymi cälun?”
nipäcun.
9 Niptinmi paycunañatac:
“Chay allpacunäta lluymi licälälimú.
Allinmi caña.
¡Lishunña camacaycämunapä!
¿Amcuna manachun imallactapis lulapäcunqui imatá?
Amari jucmanyayalcaychu;
acuchunb lishun chay allpacta duyñuchacaycamü.
10 Chayman ćhälälilmari talïlälinqui quiquillanman chalapacälälisha,
jatućhä-cama ćhaclayüta,
ima aycapis mana pishiycüta.
Chayta quiquin Tayta Diosmari maquinchicman ćhulaycämun” nin.
11 Chaymi Zorawan Estaol malcacunäpi capäcuśhanpi süta pachac (600) Dan ayllu nunacuna sumä armädu-cama yalülälin.
12 Juda läduman ćhälälilñatacmi Quiriat-jearimpa inti jiꞌalpunan lädućhu jamapäcula.
Chayta canancamapis “Dan ayllucunap jamapäcuśhan” nipäcunmi.
13 Chaypïta Efrainpa ulꞌuncunaman pasaculcalmi Micaiap wasinman ćhälälin.
14 Chayćhümi Lais malcap allpanta licamü picha nunacunaca ayllu-masincunacta nin:
“Manamá yaćhapäcunquichu cay wasićhu chalicunpis,
uchuchä taytachancunapis,
jinaman labräśha illaypi fundïsha taytachancunapis caśhanta.
Chayurá imacta lulananchictapis yaćhayalcanquiñamari” nil.
15 Chay Micaiap wasinćhu yaćhä Levi müsu caśhancäman yaycälälilmi:
“¿Imanuyllam cayanqui?”
nipäcula.
16 Chay süta paćhac Dan ayllu nunacunäñatacmi sumä armädu-cama wasip puncullanćhu alcayalcäla.
17 Allpacta licä picha lïcunäñatacmi yaycaycälil chalicunta,
uchuchä taytachancunacta,
jinaman labräśha illaypi fundïsha taytachancunactapis apaculcänanpä ipichacucuyalcan.
Ñatac sasirdüti müsuwan süta paćhac (600) armädu nunacunaca puncullaćhümi cayalcäla.
18 Chaynu yaycuycul chalicunta,
uchuchä taytachancunacta,
jinaman labräśha illaypi fundïsha taytachancunactapis julayalcämuptinmi Micaiapa wasinćhu yaćhä müsu sasirdütica nin:
“¿Imactatan lulacuyalcällanqui?”
nil.
19 Niptinmi nipäcun:
“Upälla,
atimay jinalla.
Yaꞌacunap sasirdütïmi,
caminaycünïmi canqui.
¿Chay jucllay nunallap sasirdütin cayänayquitá,
manachun Israel caśhtacunap jucnin ayllunpälä sasirdütin canquiman?”
nil.
20 Chay nishanca sasirdütïpa śhunꞌunpänümi cala.
Chaymi chalicunta,
uchuchä taytachancunacta,
jinaman labräśha fundïsha taytachancunactapis apaculcul Dan ayllucunäwan liculcäla.
21 Chaynu pasapäculmi wamla chulincunacta,
uywancunacta,
cänincunactapis puntanta puntachipäcula.
22 Chay wasipi caluctaña Dan ayllucunaca liyalcaptinñam Micaiap muyülïninćhu yaćhäcunaca juntunacaycälil atipäcula.
23 Chaynu lüyaśhtin atipäcuśhanta uyalïlulmi Dan ayllucunaca muyulcälil Micaiacta nipäcula:
“¿Imatan pasaśhunqui,
caynüpaña äśhaycaćhacuyänayquipä?”
nil.
24 Niptinmi Micaia:
“Lulacuśhá taytachäcunacta apaculcul,
sasirdütïtapis puśhaculcul taplayalcaptiqui ¿jawcachun cayäśha?
Cärayquipis cañächun ‘¿imatan pasäśhunqui?’
nimänayquipäpis” nin.
25 Niptinmi Dan ayllucunaca:
“Amam lacsacayalcämanquichu;
yanꞌalätac jucní piñacülul wañülächishunquiman aylluntin imacta” nin.
26 Chaynu sumä-cama capäcuśhanta licalmi Micaia wasintaña cuticulcäla.
Dan ayllucunäñatacmi lishanman pasaculcäla.
27 Chaynu Micaiap taytacha lulaśhancunactapis,
sasirdütintapis puśhacälälisham Lais malcaman ćhälälin.
Chay malca quiquillanman chalapacälälisha jawca captinmi ispädanwan lluy camacaycälälin;
jinalculmi malcactapis cañaycälälin.
28 Chay Lais malca Sidon läducunäpïta calućhu capäculmi mayanllawanpis mana jucllachanaculcälachu.
Chaymi mana mayan śhalcüllanpis calachu.
Chay Lais malca Bet-rehob lädu pampaćhümari cala.
Chay malcacta caśhan śhalcalcachilmi chayćhu Dan ayllucunaca yaćhapäcula.
29 Chay malca “Lais” nisha cayaptinpis “Dan” nïtam śhutichälälila Israelpa chulin Dan awquilluncunap śhutinmannu.
30 Chayćhümi Dan ayllucunaca chay labräśha taytachacta śhalcälächin alawapäcunanpä.
Sasirdütinñatacmi Gersonpa chulin,
Moisespa willcan Jonatan cala.
Paypa milaynincunam Dan ayllucunäćhu sasirdüti capäcula,
Israel ayllucta prïsu puśhacunancama.
31 Tayta Dioswan tincunapä carpa,
Silo malcaćhu caśhancama chayllaćhümi cayäla Micaiap labrachishan taytachancuna.