Niptinmi maman:

“Wawillay,

Tayta Diosꞌari allinpä licaycuśhunqui” nin.

3 Chay walanga paćhacniyu (1,100) illayninta mamanman cutiycachiptinmi maman nin:

“Cay illaycäta wawí-laycum Tayta Diospä japächaycuyá.

Chaywanmi labräśhactawan fundïsha taytachacta lulächiśhä.

Chay ampäñamari canꞌa” nil.

4 Chaynu mamanman cutiycächiptinmi ishcay paćhac (200) illayta japächaycul fundïcäman apäla.

Payñatacmi labräśha fundïsha taytachacta luläla.

Chaytam Micaiap wasinman ćhulälun.

5 Chay Micaiapa wasinćhümi taytachanta alawananpä sityun cala.

Jinaman chalicuctapis,

wasinćhu uchuchä taytachacunactapis lulälam.

Jucnin chulintañatacmi sasirdüti cananpä ćhuläla.

6 Chay timpucuná Israel caśhtacunaca mana mandacüniyu capäculmi uman chalaśhanta-cama lluy lulapäcula. ^a

7 Ñatac Juda ayllup Belen malcanćhümi Levi ayllupïta śhamü juc pulicü müsu yaćhala.

8 Paymi chay Juda ayllup Belen malcanpïta yalula mayćhüpis yaćhananpä ashï.

Chaymi Efrainpa ulꞌuncunap puliyal Micaiap wasinman ćhälun.

9 Chayćhümi Micaia tapun:

“¿Maypïmi canqui?”

nil.

Niptinmi Levi müsuca:

“Juda ayllup Belen malcanpïmi callá;

mayćhüpis yaćhanäpämi ashiyällá” nin.

10 Niptinmi Micaia:

“Cay wasïćhu yaćhacuy,

caminaycüní,

sasirdütí caycunayquipä.

Watäćhu ćhunca illaytam pägaśhayquipis;

jinaman micuycunactapis müdanacunactapis uycuśhayquim” nin.

11 Chaymi Levi müsuca awnïlun Micaiap wasinćhu yaćhananpä;

jinalmi chulinnüña cala.

12 Chay müsucta sasirdütinpä Micaia ćhuläluptinñamari wasinćhu sirbila.

13 Chaymi Micaia nicula:

“Levi ayllu sasirdütí cayaptinꞌa Tayta Dios imaćhüpis allinpaćh licaycamanꞌa” nil.