Hai malcactam duyñuchacälälin
8
Ñatac Tayta Diosmi Josueta nin:
“Ama manchacuychu nï jucmanyaypischu.
Canan pilyäniquicunacta juntuycul Hai malcawan pilyapämunayquipä lipäcuy.
Chay Haipa mandäninta,
nunanta,
malcanta,
allpantapis maquiquimanmi ćhulaycamú.
2 Chayćha Jerico malcacta llallilcul mandänintinta lulapäcuśhayquinu,
Hai malcactapis mandänintinta llallilcul lulapäcunqui.
Cananmi ichá llallishayquip uywancunawan,
cänincunawan quïdaculcanquiman.
Chayurá allichaculcay wicćhu-cayćhu pacacaycälil malcap ipanpa unꞌaypi yaycälälinayquipä” nil.
3 Chaymi Hai malcaman pilyä linanpä Josue lluy nunancunawan allichaculcäla.
Chaymi quimsa ćhunca walanga (30,000) sumä pilyäcunacta aclalcul tutanpa caćhala,
4 cay nil:
“Sumäta uyalipämay,
malcap ipanman lipäculmi chayćhu pacalapäcunqui.
Chay malcapïta mana ancha calupällalmi listu-listullaña capäcunqui.
5 Parti nunacunäñatacmi yaꞌawan cusca chay malcaman aśhuycapämuśhä.
Yalälälimuptinñatacmi punta lulaśhanchicnüpis paycunapïta ayipämuśhä.
6 Chaynu ayipämuptïćha paycuna atipämanꞌa:
‘Puntanuꞌari ayiyalcan’ nil.
Chaynüpaćh malcanpïta calupälälichishä.
7 Chayćha amcuna pacaläśhayquipi yalalcälimul Hai malcacta duyñuchacaycälinqui.
Quiquin Tayta Diosmari maquiquiman ćhulaycälimuśhunqui.
8 Chayurá Tayta Dios nimäśhanchicmannu yaycaycälil malcanta lluy cañaycäläliy.
Chayta lulapäcunayquipämá caćhayalcac” nil.
9 Nilculmi Hai malcap inti jiꞌalpunan läduman pilyäcunäta Josue caćhälun.
Chaymi paycuna pacacälälila Hai malcapïta Bet-el malcaman linan läduman.
Josueñatacmi parti nunancunawan jamapäcuśhanćhu chay tuta quïdaculcäla
10 Chay wälañatacmi wäla-wälalla Josue śhalcuculcul nunancunacta alistala.
Jinalculmi Israel malcanpa yaśhancunawan lluypa puntanta lipäcula,
Hai malcawan pilyamü.
11 Chaynu nunancunawan lipäculmi Hai malcap punta lädunman ćhälälil,
nurti lädućhu jamapäcula.
Chay capäcuśhanpïta pampallañam Hai malcätawan laquila.
12 Josuemari picha walanga (5,000) pilyäcunacta inti jiꞌalpunan läduman caćhäla Hai malcapïta Bet-el malcaman linan läduman pacacälälimunanpä.
13 Chaynüpam ishcay partiman ćhulanacüśha capäcula:
Jucninmi malcap nurti lädunćhu,
juccunäñatacmi inti jiꞌalpunan lädunćhu cala.
Josueñatacmi chay tuta ćhawpi pampäcama puntala.
14 Chayta yaćhälulmi Hai malcap mandänin wälalla śhalcuculcul lluy nunancunawan mana-mana pasaculcäla Arabapa chimpan Jordan pampaćhu Israel läducunäwan pilyapäcunanpä.
Manamá yaćhalachu ipan lädućhu pacacälälisha capäcuśhantá.
15 Chaymi Josuewan Israel nunacunaca llallichicütuculcul chunyä läduman lï caminunpä ayicuyalcan.
16 Jinaptinmi Hai malcaćhu nunacunaca juntunacälälin Josueta atipäcunanpä.
Chaynüpam malcanpïta calupälälin.
17 Manamá Hai malcaćhu,
Bet-el malcaćhu juc nunallapis quïdalachu israelcunäta atiyninwan.
Chaymi Hai malcacta mana täpäniyüta caćhaycälälila.
18 Chayćhümi Tayta Dios Josueta nin:
“Chay apaśhayqui ispädayquita Hai malca läduman pallalcuy;
maquiquimanñamari ćhulaycamuśhä” nil.
Chay nishannüllamari Josue ispädanta pallalcula.
19 Jinaptinmi pacalapäcuśhanpïta juclla yalalcälimul malcaman yaycaycälil duyñuchacälälila.
Jinalculmi lluy cañaycälälila.
20 Ñatac Hai nunacunaca ipanta licalcapäcunanpämi malcanpi yanaypa-yanal untaylla ishpiyäña.
Jinaman chunyäcäman ayïcunäpis ticlapämulmi aticayalcämun.
Jinaptinmi may läduman ayipäcunanpäpis manaña calañachu.
21 Chaynu pacaläcunaca malcacta duyñuchacaycälil cañaycäläliptin untaylla ishpiyämütam Josuewan lluy israelcunaca licälälin.
Chaymi filtalcälimul Hai nunacunäta camacaycälälin.
22 Chay pacaläcunäpis malcapi yalalcälimulmi aticaćhayta allacaycälin.
Chaynüpam wicpa-caypa lluy cunćhäśhaa licalïlälila.
Chayćhümi israelcunaca jucllactapis mana iscapachil lluy camacaycüla.
23 Hai malcap mandacünintañatacmi cawsayäta chalalcälil Josueman puśhapäcula.
24 Chaynu israelcunaca lluy aticaćhänin Hai nunacunäta ispädawan camacalculmi malcaman yaycaycälil quïdänincunactapis wañüchila.
25 Chay muyunmi Hai nunacuna ćhunca ishcayniyu walanga (12,000) wayapawan walmicuna wañülälila.
26 Josueñatacmi ispädanta pallaläla aśhta Hai nunacunäta camacaycälälinancama.
27 Tayta Dios Josueta nishannüllamari israelcunaca malcap lluy uywancunawan,
ima cänincunawanpis quïdaculcäla.
28 Chaynüpamá Josue chay Hai malcacta lluy cañaycüla mana allinllaña juntuläcunancama.
Chaynüllam canancamapis pulumayan.
29 Chaypïta tardilpunancamam Haipa mandacüninta lantamanb cuncapi Josue walcächila.
Intica pasacalpuyaptinñam chay ayacta jululcachil malcap yaycunanman wicapaycächimula.
Jinalculmi ayap janäninman lumicunacta lluy śhüyächila.c
Chay lumicunam canancamapis cayan.
Ebal ulꞌućhümi camachicuyta Josue lïgipan
30 Chaymi Ebal ulꞌućhu israelcunap Tayta Diosninpa uycuna patacta Josue śhalcachila.
31 Tayta Diospa sirbïnin Moises israelcunäta nishantanülla,
Moisespa camachicuyninćhu nishantanüllamari lulaycula:
Mana labräśha intirun lumipïtam uycuna patac luläśha cala.d
Chayćhümi Tayta Diosman cañaywan uycunacta,
allin cawsaśhanpi uycunactapis uycapäcula.
32 Chayćhütacmi israelcunäpa ñawquin Moisespa camachicuyninta lumipi luläśha juc tablachaman caśhan isquirbila.e
33 Chaypïtam Israel nunacunaca,
paycunaćhu yaćhä juc caśhtacunäwan,
yaśhacunäwan,
puydïcunäwan,
fiscunäwan ishcay partiman laquinaculcul,
jucnin parti Ebal ulꞌup chimpanman juntunacälälila,
juccäñatac Gerizim ulꞌup chimpanman.
Israel caśhtacunaca allin capäcunanpä Tayta Diospa uywaynin Moises wamäta nishannüllamari babul läducta licapayalcal juntunacälälila.
Chay ulꞌucunap ćhawpinćhu cä pampaman Tayta Diospa limalicuśhan babulninta apayculmi Levi ayllucunäñatac śhäcapäcula.
34 Chaypïta camachicuyćhu lluy-lluy nishantam Josue lïgila:
“Caycunacta lulaptiquim allinpä licaycuśha capäcunqui;
caycunacta mana lulapäcuptiquiꞌa mana allinpämari licaycuśha capäcunqui” nil.
35 Chayćhu lluy malcaca,
walmicunapis,
uchuchäcunapis,
juc caśhtacunäpis cayalcaptinmi Josue lïgila.
Chayurá Moisespa lluy-lluy isquirbishancunämi lïgisha cala.f