Ajan nunap juchanpïtam Israel caśhtacunäta mućhuchina
7
Ñatac Juda ayllupïmi Ajan nisha nuna cala.
Paypa papäninmi Carmi,
awquillun Zabdi,
waśhapaqui awquillunñatac Zera cala.
Paymi amam chalapäcunquichu nishancunäta chalälul Israel caśhta-masincunacta mana allinman ćhuläla.
Chaymari Tayta Dios Israel caśhtacunäwan piñacüla.
2 Chaypïtam caynu cala:
chay Jerico malcapïtam Josue nunancunacta caćhäla Hai malcacta licamunanpä.
Chay cala Bet-aven sircaćhu,
Bet-elpa chimpan inti ishpimunan lädućhümi.
Chaymi paycuna lipäcul Hai nishan malca imanuy caśhantapis licapämula.
3 Chaypi cutïlälimulmi Josueta nipäcun:
“Manam lluy malcantinlächu linanchic,
ishcay quimsa walangallapämi chay Hai malcaca cayan.
Amaña pishipay-pishipay lluy malcaca liyächunchu;
chay malcaćhu ishcay quimsallam cayalcan” nil.
4 Chaymi quimsa walanganu (3,000) wayapacunaca Hai malcacta ishpipäcul quiquincuna lluy supayapachicälälil aticaćhachicälälimula.
5 Hai malcap puncunpïmi aśhta Sabarim läducama aticaćhälälimula.
Chay wätaćhüñatacmi llallïlälil quimsa ćhunca sütayu (36) Israel caśhtacunacta wañüchila.
Chaymi Israel caśhtacunaca pasaypi jucmanyäśha chucchucuyalcäla.
6 Jinaptinmi Josue Israel malcap yaśhancunawan llaquicuypïta müdanancunacta llaćhyapäcula,
umancunamanpis pulbucunacta jillpuculcäla.
Tayta Diospa babulnin caśhanpa puntanman pampäcama umantapis ćhulaycälilmari anyaśh muyun unꞌulapäcula.
7 Chayćhümi Josue nin:
“Tayta Diosllay,
¿imapämi cay malcayquita Jordan mayucta chimpachipamälanqui?
¿Amhor läducunap maquinman ćhulaycul camacaycälälichimänayquipächun imatá?
Allinćha canman Jordan mayup wic lädu chimpaćhu quïdacalcämuptí cala.
8 ¡Ay,
Tayta Diosllay!
¿Imanaśhätan israelcunaca ćhïnicüninpi ayiyalcämuptin?
9 Canaan lädućhu cäcunaca yaćhälälilćha juntunacaycälil lluy intümäśhun.
Chayćha licachillapäpis manaña puchuśhunñachu.
Chayurá ¿imanuyćha canꞌa sumä munayniyu cashayquica?”
nil.
10 Niptinmi Tayta Dios nin:
“¿Imanayanquilämá pampäćhu jitalayal?
¡Śhalcuyñari!
11 Israel caśhtacunaca juchactam lulälälin,
limalicuśhätamari jalutacälälin.
Camacapäcunayquipäb cäcunäpïtam chalacaycälin,
suwälälin,
artïlälin,
cänincunaman ćhulaycul pacälälinpis.
12 Chaymi Israel caśhtacunaca ćhïnicünincunawan pilyayta mana atipapäcunꞌachu.
Aśhwanpa ćhïnicüniquicunapïtam ayipäcunꞌa.
Quiquillancunamari cunca cuchuyninta ashicälälin.
Chay chalaśhanta amcunapïta mana chincachipäcuptiquiꞌa amcunawan manañam caśhächu.
13 Chayurá śhalcuyꞌari malcäta juntumunayquipä.
Wälaman yaꞌap puntäman chuya śhapämunanpäri nimuy.
Yaꞌa Israel caśhtacunäpa Tayta Diosninmi ní:
‘Am Israel caśhtacunämi camacaycunanpä cayäcäta chalälanqui.
Chayta amcunapi mana chincachipäculꞌa ćhïnicüniquicunacta manam llalliyta atipapäcunquichu’ nil.
14 “Wala wälam ayllunpi-cama aśhuycapämunqui.
Chay aclaśhá ayllumari wasin-wasin aśhuycapämunꞌa.
Chay aclaśhá wasiñatacmi cari ayllupi wasin-wasin aśhuycapämunꞌa.
Chay aclaśhá cari ayllupïñatacmi jucllap-jucllap umrinllanllan aśhuycapämunꞌa.
15 Chayćhu camacaycunanpä cayäcäta mayanpa maquinćhüpis talishäcämi lluy cänintin cañaycuśha canꞌa;
Tayta Diospa limalicuyninta jalutacuśhanpi,
jinaman Israelćhu millachicuy juchacta lulaśhanpïmari” nil.
Ajantam aylluntinta, cänintinta camacaycülun
16 Chay walantintam Josue wäla-wälalla śhalcuculcul jinantin Israel malcäta ayllu-ayllucta ayachimula.
Jinaptinmi Juda ayllu juchayu caśhanta tücälun.
17 Chaymi Juda ayllucta aśhuycachimuptin Zera aylluman tücälun.
Chay Zera ayllucta wasinpa-cama aśhuycachimuptinñatacmi Zabdicta tücälun.
18 Chay Zabdi wasinćhu lluy wayapa cäcunäta aśhuycachimuptinñatacmi Carmip chulin Ajan nunacta juchayu caśhan tücälun.
Paymi Carmip chulin,
Zabdip willcan,
Zerap waśhapaqui willcan,
Juda ayllupïta cala.
19 Chaymi Josue Ajan nunacta nin:
“Iju,
Israel caśhtap Tayta Diosnintari altuman juluycuy imam lulaśhayquita niycamäśhayquiwan.
¡Cäcällactari niycamay!”
nil.
20 Niptinmi Ajan nin:
“Rasunpam,
Israel caśhtap Tayta Diosninpa cuntran mana allinta lulällá.
Caycunactamari lulällá:
21 Jerico malcapïta julamuśhäcunaćhümi licälú Babilonia lädu tuquish chusicta,
ishcay paćhac (200) illayta,
chaynütac ćhawpi quïlu mascasca üructapis.
Chaycunacta sumä-sumä munapälulmi chalällälá.
Chaycunactam chuclläpa ćhawpinta aśhpiycul pampälá;
illaycäñatacmi chaycunap lulïninćhülä cayan” nil.
22 Niptin-pacha Josue nunancunacta Ajan nunap chucllanman caćhaptinmi wayra-wayra liculcäla.
Chayćhümi lluy pacaläcunäta,
lulïninćhu illaycätapis talïlälin.
23 Chaymi julalcälimul Josueman,
Israel caśhtacunäman apapämula.
Chayćhümi Tayta Diospa puntanman ćhulaycapäcula.
24 Chaypïmi Josue Israel caśhtacunäwan puśhaculcan Zerap waśhapaqui willcan Ajan nunacta,
illaynintinta,
chusintinta,
üruntinta,
wamla-walaśh chulintinta,
wäcantincunacta,
aśhnuntincunacta,
uwishnintincunacta,
chucllantincunacta,
lluy imapis cänintintamari Acor nishan pampäman.
25 Chayćhümi Josue nin:
“¿Imapämi mana allincäta caśhtanchicman apamulanqui?
Cananmi Tayta Dios mana allinta anmanpis ćhulaycamunꞌa” nil.