Josué
Josue Isquirbishan
Tayta Diosmi Josueta nin
1
Tayta Diospa uywaynin Moises wañucuptinmi yanapänin Nunpa chulin Josueta Tayta Dios nin:
2 “Uywayní Moises wañucunñam.
Chaymi amña lluy Israel caśhtacunäwan Jordan mayucta chimpapäcunqui,
amcunaman uycuśhac allpaman yaycapäcunayquipä.
3 Moisesman limalicuśhänüllamari may allpaman ćhaquiqui jaluycuśhantapis maquiquiman ćhulaycamuśhä.
4 Chay upäcuśhac allpap culindanmi canꞌa:
chunyäcäpïta,
Libano nishancäpïta aśhta jatun Eufrates mayücama,
chaynütac Mediterraneo lamar inti jiꞌalpunan läducama;
lluy caycuna Het caśhtacunäpa allpanmari.
5 Cawsaśhayquicama manamá mayanpis llalliycuśhunquichu.a
Moiseswan caśhänümi amwanpis caycuśhä;
manam caćhaycuśhayquichu nï unꞌaśhayquichu.b
6 Callpanchacuy,c
ama manchacuychu.
Awquilluyquicunaman limalicuśhá allpacta anmi aypuycunqui.
7 Aśhwanpa callpanchacuy,
ama manchaliychu.
Uywayní Moises uśhuśhayqui camachicuycäta lulayman ćhulaycuy.
Amamá uchuyllapis iwilcälinquichu,
ima lulaśhayquicunaćhüpis allin yaluycuśhunayquipä.
8 Cay camachicuycämi tutapapis muyunpapis shimiquićhu caycunꞌa.
Jinalmi lluy nishancunäta manchacuywan lulaycunqui.
Chayćha ima lulaśhayquipis allin caycunꞌa.
9 Chayurá callpanchacunayquipämi,
mana manchacunayquipämi niycuc.
Yaꞌa Tayta Diosniqui mayćhu captiquipis amwan cayaptiꞌa amari manchacuychu nï jucmanyaypischu” nil.
10 Niptinmi malcap puydïnincunacta Josue nin:
11 “Caśhta-masinchiccuna jamapäcuśhanman lil lluyta nimuy:
‘Tayta Diosninchic umänanchicpä allpa limalicamäśhanchiccäman quimsa muyunpïtam Jordan mayüta chimpaśhun.
Chaypämi millcapayquicunacta alistaculcänayqui’ ” nil.
12 Chaynütacmi Ruben,
Gad ayllucunäta,
jinaman Manases ćhawpi ayllucunätapis Josue nin:
13 “Yalpapäcuy,
Tayta Diospa uywaynin Moises nipäcuśhuśhayquita:
‘Tayta Diosninchicmi jamapäcunayquipä cay allpacta upäcuśhulanqui’ nil.
14 Canan sumä allin-cama pilyä umricunaca armädu-cama Israel caśhta-masiquicunacta liwshipäcuy yanapapäcunayquipä.
Jordan mayucta manalä chimpal Moises tücachishuśhayqui malcaćhüñatacmi walmiquicuna,
chuliquicuna,
lluy uywayquicunapis quïdapäcunꞌa.
15 Chayurá uycuśhuśhayqui allpaman cutipäcamunqui amcunacta uycupäcuśhuśhayquinu wawꞌi-caśhayquicunactapis jawcayayta Tayta Dios uycuptinlämi,
jinaman amcunanüpis duyñuchacaycäliptinlämi.
Chaylämari Tayta Diospa uywaynin Moises inti yalamunan lädu Jordan mayup cay lädunćhu uycuśhuśhayqui allpaman cutipäcamunqui duyñuchaculcänayquipä” nil.d
16 Niptinmi nipäcun:
“Lluy nipämäśhayquitaćh lulapäculläśhä;
mayta caćhapämaptiquipis lipäcuśhäćha.
17 Moisesta imaćhüpis lluy cäsupäcuśhänümi amtapis cäsupäcuśhayqui.
Ñatac Tayta Diosniqui Moiseswan caśhannu amwanpis caycuchun jinalla.
18 Mayanpis camachipamäśhayquip cuntranman śhalcul mana cäsucücá wañuchisham canꞌa.
Amñatac sumäpa tacyaycuy mana manchacullal”e nil.