Moises wañucuptinmi pampälälin
34
Moisesmi Moab lädućhu cä Nebo ulꞌuman lil Pisga ulꞌup chupquinman ishpila.
Chay ulꞌucunam Jerico malcap chimpanćhu cala.
Chaypïtam Tayta Dios licachila Galaad lädupïta allacuycul Danpa,
2 Neftalipa,
Efrainpa,
Manasespa,
Judapa allpancunactapis aśhta Mediterraneo lamarcäcama.
3 Chaynütacmi licachila Neguev läductapis,
Jordan mayup pampancunactapis,
Jerico malcap pampanćhu palmïra lantacunap caśhancätapis aśhta Zoarcama.
4 Chayćhümi Tayta Dios Moisesta nin:
“Cay allpacunätam Abrahamman,a
Isaacman,b
Jacobmanc limaliculá:
‘Milayniquicunamanmi uycuśhä’ nil.
Chayman am manaña yaycunayqui captinpis quiquiqui ñawiquiwan licaycunallayquitam munalá” nil.
5 Quiquin Tayta Dios nishannümi uywaynin Moises Moab lädućhu wañucula.
6 Chaymi Bet-peor malcap chimpanćhu cä Moab lädu pampanman pampacula;
canancamapis manam mayanpis mayćhu pampaläśhantapis yaćhanchu.
7 Moises paćhac ishcay ćhunca (120) watanta liyalmi wañucula;
ñawinpis allinta licayaptinlämi,
aychanpis allinlä cayaptinmi wañucula.
8 Jinaptinmi Israel caśhtacunaca quimsa ćhunca (30) muyun Moab lädu pampanćhu waꞌapäcula.
Chaynüpam custumrinmannu llaquicuypïta waꞌapäcula.
9 Nunpa chulin Josuepa umanmanñatacmi Moises maquinta ćhulaycul sumä-sumä yaćhayta uycula.
Chaymi Israel caśhtacunaca Josueta cäsuculcäla;
jinalmi Moisesman Tayta Dios nishantanu lulapäcula.d
10 Chay muyunpïtam Tayta Diospa willacünin Moisesnuꞌa manaña calachu.
Paywanꞌa Tayta Dios cära-cäram limala.e
11 Egiptop mandänin Faraonćhu,
yanapänincunaćhu,
jinantin malcantinćhu Tayta Dios nishannu imaymana milagrucunacta Moisesllamari lulaycula.
12 Paynuꞌa manamá mayanpis sumä munayniyu calachu;
nïtac sumä-cama manchay lulaycunactapis jinantin Israelćhu lulaycuśhannuꞌa mayanpis calachu.