Israel ayllucunaca allin caycälinanpämi Moises nin
33
Tayta Diospa nunan Moisesmi wañucunallanpäña Israel caśhtaćhu ayllucunaca allin capäcunanpä caynu nin:
2 “Sinaipïmi Tayta Dios śhamula;
Seirpïtam achquilälimuśhunqui.
Paran ulꞌüpïtam achquimula;
walangantin-walangantin chuya sirbïnincunap ćhawpinćhümi śhamula;
allï maquinćhu camachicuycäta
nina walayätanu apacuśham śhamula.
3 Paymi malcanta cuyan.
Paypa japächacuśhancunaca maquillanćhümi cayan.
Chaymi paypa laśhćhunman jalupäcula;
ampïtam caminaycuśha capäcunanpäpis ćhasquiycapäcula.
4 Jacobpa milaynincunapa tücänin
cananpämi camachicuycäta Moisesman uycula.
5 Israelpaa aylluncunap mandacünincuna,
yaśhancuna juntunacuptinmi Jesurunpa
puydï mandacünin Tayta Dios cala.
6 Ruben ayllu cawsachun,
ama wañuchunchu;
milaynincuna achca-achcaman milachun” nil.
7 Juda ayllupäñatacmi caynu nin:
“Tayta Diosllay,
Juda ayllup mañacuyninta
uyaliycullay,
malcanman cutiycachiy.
Munayniquiwan ama-pacha niycuy,
ćhïnicünincunapïta yanapaycuy” nil.
8 Levi ayllupäñatacmi caynu nin:
“Masahćhub pruybaśhayquićhu,
Meribac
mayućhu paywan piñacuśhayquićhu,
Urim Turimniquitam manchacuyniyu
nunayquiman uyculanqui.d
9 Chaynütacmi maman taytanpïpis ninꞌa:
‘Manam imaypis licapäculacchu’ nil.
Wawꞌi-caśhancunactañatac:
‘Manam lisipäcucchu’ ninꞌa.
Chulincunactañatacmi:
‘Mayanćha caculcanquipis’ ninꞌa.
Paycuna mayanmanpis mana śhalcullalmá
yaćhachicuyniquita lulapäcula,
limalicuyniquita cäsuculcäla.e
10 Jacobtam tincüninman licaycuyniquita
yaćhaycachipäcula,
Israeltañatacmi camachicuyniquita.
Amtam insinsiuctapis,
uycuna pataccäćhu
cañaywan uycunacunactapis uycapäcuśhulanqui.
11 Tayta Diosllay,
maquinwan lulaśhancunäta ćhasquiycullay,
callpanchacuśhancunäćhüpis allinpä licaycullay.
Ćhïnicünincunacta camacaycüluy;
ćhïnicünincuna amaña mastá śhalcamuchunñachu” nil.
12 Benjamin ayllupäñatacmi caynu nin:
“Tayta Diospa cuyaśhan,
payćhu jawcalla cawsaycuy.
Paymi ama-pacha niycuśhunqui,
maquillanćhu jawcalla jamaycuy” nil.
13 Jose ayllupäñatacmi caynu nin:
“Tayta Dios paycunap allpanta allinpä licaycuchun,f
sïlupa allinnin shullipayninwan,
jinaman pampäpïta timpuya yacuwan.
14 Chaynütac intïpa lupayninwan allinta wayuycachishanćhüpis,
quillaca ishpichishanwanpis allinpä licaycuy.
15 Chaynütacmi unay jinantin ulꞌucunäćhu
sumä allinnin wayuynincunawan,
wiña-wiñay cä tacsha
ulꞌucunäćhu allinnin micuycunäwan allinpä licaycunqui.
16 Sarsa jaćhaćhu nina waläcäćhu yaćhäcäpa
yanapayninwanmi jinantin allpäćhu imaymana
allinnin cusichacunäwan allinpä licaycuśha canꞌa.
Lluy caycunawanꞌari Jose ayllu allinpä licaycuśha cachun.
Paymi wawꞌi-caśhancunacta allinpä licaycunanpä aclaśha cäca.
17 Joseꞌa wäcap wamä wawinnu sumä-sumämi;
munti wäcanu sumä callpasapa,
wälanwanmi lluy malcacunacta aśhta sïlup
sapinćhu cä malcacunactapis camacaycülunꞌa.
Chaynümi Manasespa milaynincuna walangantinpa cayan;
Efrainpa milaynincunapis ćhunca walangantinpa cayan” nil.
18 Zabulonpäwan Isacar ayllupäñatacmi caynu nin:
“Am Zabulon maytapis lishayquićhu cushicuy;
Am Isacar jamapäcuśhayqui carpayquicunaćhu cushicuy.
19 Ulꞌuman ishpipäcunanpämi malcäta nipäcunqui.
Chayćhümi allin lulapäcuśhanpïta uywacunacta uycälinꞌa,
lamarćhu lluy cäcunäwan cäniyu calmi cushisha capäcunꞌa,
aꞌućhu pacäśha cäniyücunäwanmi rïcuyanꞌa” nil.g
20 Gad ayllupäñatacmi caynu nin:
“¡Achca-achca ćhaclacta uycüca altuman juluycuśha cachun!
Liyunnu chayćhu alcayäcänümi
liclancunactapis umancunactapis ticshiyan.
21 Allinnin allpactam aclaycula;
puydïcunaca caycunan allpactamari chalacuycula.
Malcap puntantam ñawpala,
Tayta Dios tincüllanman
nishantam lulaycula;
malcaman
camachishannüllam lulaycula” nil.h
22 Dan ayllupäñatacmi caynu nin:
“Dan,
malta liyunnümi canqui;
Basanpïta paćhcamü liyunnümi canqui” nil.i
23 Neftali ayllupäñatacmi caynu nin:
“Allinpä licaycuśham Neftali;
Tayta Diospa llaquipaycuśham cayan.
Allpancuna lamarcäpïta aśhta chunyäcäcamam” nil.j
24 Aser ayllupäñatacmi caynu nin:
“Jacobpa lluy milaynincunapïta Asermi mas allinpä licaycuśhä.
Wawꞌi-caśhancunapapis mas cuyaśham;
ćhaquinta asaytićhu puśhpachïcämi.
25 Puncu wićhacuncunapis jïrrupïtawan brunsipïtam cayan.
Cawsaśhancama callpanpis manamá mirmanꞌachu.
26 “Jesurunpa Tayta Diosninnuꞌa manamá canchu.
Yanapäśhunayquipämi sïlüman sillacüśhanu śhayämun;
sumä munayninwan pucutaycäman sillacüśhanümari śhayämun.
27 Wiña-wuñaypä cä Tayta Diosmi pacaycüniqui.
Wiñaypa cä liclanmi yanapäniqui.
Puntayquipïtam ćhïnicüniquita alüla;
jinalculmi camacaycünayquipä camachishulanqui.
28 Israelcunaca payman chalapacüśham cawsapäcunꞌa;
Jacobpa milaynincuna jawcallam cawsapäcunꞌa.
Ćhaclayquicunaćhu trïguyquicuna üba lantayquicuna
manam pishinꞌachu,
tamyanan allpaćhümi caycälinqui.
29 Am Israel caśhta cushiculcay.
¿Amcuna Tayta Diospa salbaycuśhannu
mayan malcamá canman?
Paymá atajaycüniqui,
llallinayquipä ispädayqui cayan.
Ćhïnicüniquicunam amcunaman uyshuycälimunꞌa,
amcunañatacmi paycunacta jalutaculcanqui” nil.