Moisespa pudirninta Josuetam ćhulan
31
Chaypïta jinantin Israel caśhtacunätam Moises nin:
2 “Paćhac ishcay ćhunca (120) watätañam liyá;
mayman linäpäpis manañam callpá canñachu.
Jinaman Tayta Dios nimäla Jordan mayucta manaña chimpanäpämi.a
3 Tayta Diosniquiñatacmi ñawpäniquita puntanꞌa.
Chaymi lipäcuśhayquićhu cä malcacunäta camacaycul amcunaman uycapäcuśhunqui.
Tayta Dios nishannümari Josue puydïniqui calmi puśhapäcuśhunqui.
4 Chay malcacunäta Tayta Diosmi camacaycülunꞌa Amhor lädu mandacü Sehontawan,
Ogta lluy malcantinta-cama camacaycüśhannu.b
5 Chay malcacunäta Tayta Dios maquiquiman ćhulaycamuptinmi nishämannu lluy lulaycälinqui.
6 Chayurá ¡callpanchaculcay,
ama manchaculcaychu!
Ama chucchupäcuychu nï jucmanyapäcuychu.
Tayta Diosniquim imaypis amcunawan cayanꞌa;
manamá caćhaycapäcuśhunquichu,
nï unꞌapäcuśhunquipischu” nil.
7 Chaypïtam Josueta Moises ayalcul lluy Israel malcäpä ñawquin nin:
“¡Callpanchacuy,
ama manchacuychu!
Anmi cay malcäwan awquillunchiccunaman Tayta Dios limalicuśhan allpaman yaycapäcunqui.
Anmá duyñuchaculcänanpä yaycaycachïca canqui.
8 Tayta Diosmari ñawpäniquita lil amwan caycunꞌa.
Manam caćhaycuśhunquichu nï unꞌaycuśhunquipischu.c
Amari manchacuychu nï ćhinaśhyaychu” nil.
9 Cay camachicuycunacta Moises isquirbiyculmi uycula malcap yaśhancunaman,
Tayta Diospa limalicuśhan babulta apaycaćha Levi ayllu sasirdüticunäman.
10 Chaynu uyculmi Moises nin:
“Imaymana mänup shipuchicüśhacunätam anćhish watapi-cama pampachapäcunquid Chucllachacuy Fistaćhu.e
11 Chaynu Tayta Diosniqui yaćhananpä aclaśhan sityuman jinantin malcaca lipäcuptinmi cay camachicuyta llapan uyalipäcunanpä lïgipäcunqui.f
12 Chay fistaman lluy-lluymi lipäcunꞌa:
wayapacunaca,
walmicunaca,
chulicunaca,
malcayquićhu yaćhä juc caśhtacunäpis.
Chayćhu lïgishan camachicuycunacta uyalipäcul Tayta Diosniquita manchaculcayta yaćhapäcunanpä;
jinaman camachicuyta lulayman ćhulapäcunanpämari lipäcunꞌa.
13 Chayćha cay camachicuycunacta manalä yaćhä milayniquicunapis uyalipäcul Tayta Diosniquita manchaculcayta yaćhapäcunꞌa,
Jordan mayucta chimpal uycuśhan allpaćhu cawsapäcuśhancama” nil.
14 Chaypïtam Moisesta Tayta Dios nin:
“Wañuyca janayquićhüñam cacuyan.
Chaymi Josueta ayalcachimul chuya carpaćhu alcapämanqui.
Chayćhümi imacta lulananpäpis nishä” nil.
Niptinmi Moiseswan Josue chuya carpaman lipäcul chayćhu alcapäcula.
15 Chay chuya carpap puncunmanmi Tayta Dios licalïmula suytunpäśha pucutayćhu.
16 Chayćhümi Tayta Dios Moisesta nin:
“Awquilluyquicunawan jamacüñam am licunqui.
Cay malcäñatacmi waticaculcanꞌa yaycapäcuśhan malcacunap taytachancunawan.
Paycunaman limalicuśhäta unꞌayculmi jalutacapäcunꞌa.
17 Chaynu lulayalcaptin sumä piñacülulmi caćhaycüśhä.
Paycunacta unꞌäluptïmi imaymana mana allinllaña,
llaquicuyllaña intuptin nipäcunꞌa:
‘Tayta Diosninchic yaꞌanchicwan manaña cayaptinpisćha imaymana pasayämanchic’ nil.
18 Chaynu pasayalcaptinpis aśhwanpa yaꞌa pacacuycuśhämi lluy imaymana mana allinta lulaśhanpïta,
juc taytachacunaman liculcäśhanpïta.
19 “Cananꞌa cay taquicta isquirbiycul lluy malcantinta yaćhachipäcuy.
Chayta taquipäculmi yalpapäcunꞌa juchacta lulaśhanta.
20 Awquilluncunaman limalicuśhá imaypis tuqui-tuquicta wayuycachï allpaman yaycälälilmi;
jinaman maćhaycälinancama,
wirayänancama micacaycälilmi juc taytachacunaman liculcanꞌa sirbipäcunanpä.
Yaꞌactañatacmi jalutacalcamal limalicuśhätapis mana caśhanman ćhulapäcunꞌa.
21 Chay sasachacuycunaćhu,
ñacaycunaćhu cayalcaptinmi cay taqui mana allinćhu capäcuśhanta yalpachinꞌa.
Milaynincunapi taquipäculmari yalpapäcunꞌa.
Limalicuśhá allpaman paycuna manaläpis yaycuyalcaptin tuquictañam yaꞌa yaćhayá śhunꞌuncuna imacta lulay pinsapäcuśhantapis” nil.
22 Chaymi Moises chay taquicta isquirbiycul jinantin malcacta yaćhaycachila.
23 Chaypïtam Nunpa chulin Josueta Tayta Dios nin:g
“Anmi Israel caśhtacunäta limalicuśhá allpaman yaycachinqui.
Yaꞌamari amwan caśhä.
Chaymi callpanchacunqui,
ama manchacunquichu” nil.h
24 Cay camachicuycunactam juc libruman isquirbiyta Moises camacäla.
25 Jinalculmi Tayta Dios limalicuśhan babulta apä levitacunäta nin:
26 “Cay isquirbishá camachicuytam Tayta Diosniqui limalicuśhan babulman ćhulaycunqui.
Caymi ima lulaśhayquitapis cäraycuśhüniqui canꞌa.
27 Tuquictam yaćhaycú amcuna pasaypi cullu linli,
lumi śhunꞌu capäcuśhayquita.
Yaꞌapis amcunawan cawsayaptïlä Tayta Diosta jalutacuyalcalꞌa,
¡wañucuptí imanuyñaćh capäcunqui!
28 Canan má,
malcap yaśhancunactawan ayllup puydïnincunacta puntäman juntuycälimuy cay nishäcunacta uyaliycälinanpä.
Caycunapïta janay pachäwan cay pachämi licäca cayan.
29 Tuquictamari yaćhayá wañucuptí amcuna mana allincällactaña lulapäcunayquita,
yaćhachishätapis caćhaycälälinayquita.
Yaćhayätacmi Tayta Diospa puntanćhu mana allin lulayniquiwani piñachipäcunayquita;
jinaptin śhamü timpucunäćhu imaymana llaquicunacta pasachipäcuśhunayquitapis” nil.
Moisesmi taquin
30 Chaypïtam jinantin Israel caśhtacunäćhu cay taquicta allaycuyninpïta camacaynincama Moises nin: