Cäsuculcaptin allinpä licaycuśha cananpïtam nin
30
“Cananꞌa yaćhapäcunquiñam cäsucuptiqui Tayta Dios allinpä licaycuśhunayquita ütac mana cäsuculcaptiqui mana allinpä licaycuśhunayquitapis.
Mana cäsuculcaptiquiꞌa Tayta Diosniqui juc lädu malcacunaman alüśhuptiquilämi cay nishäcunacta yalpapäcunqui.
2 Sïchuśh amcunapis,
chuliquicunapis mana allincunäpi wanacul Tayta Diosniqui nishanmannu llapan śhunꞌuyquiwan,
pinsayniquiwan cäsuculcaptiquiꞌa,
3 quiquin Tayta Diosniquimari llaquipaycul puśhaśha capäcuśhayquipi cutichipämuśhunqui.
Lluy malcacuna chiꞌisha capäcuśhayquipïmari caśhan juntuycälishunqui.
4 Masqui sïlup sapinćhu cä malcaman puśhaśha cayalcaptiquipis Tayta Diosniqui chaypïta cutiycachimulmi caśhan juntuycuśhunqui.
5 Chaymi awquilluyquicunap allpanman Tayta Diosniqui cutichimuśhunqui;
jinaptinmi amcunapäña caśhan canꞌa.
Chayćhu allinpä licaycuśhuptiquim awquilluyquicunapïtapis mas achca-achca milayniyüña capäcunqui.
6 “Tayta Diosniquim amcunapïtapis milayniquicunapïtapis śhunꞌuyquićhu cä mana allincunäta julülunꞌa.a
Chaymi payllactaña llapan śhunꞌuyquiwan,
llapan pinsayniquiwan cuyapäcul allin cawsapäcunqui.
7 Piñacuywan aticaćha ćhïnicüniquicunamanmi lluy mana allincunäta Tayta Diosniqui ćhaycachinꞌa.
8 Amcunañatacmi Tayta Diosman cuticalcämul cäsuculcanqui;
canan willaśhá camachicuynincunactapis lulaymanmi ćhulapäcunqui.
9 Chayćha Tayta Diosniqui allinpä licaycälil lluy lulayniquicunaćhu,
milayniquicunaćhu,
uywayquicunaćhu,
talpuyniquicunaćhu achcaman milaycachinꞌa.
Tayta Diosmari awquilluyquicunawan cushicuśhannu amcunacta yanapäśhuśhayquipïpis cushicunꞌa.
10 Chaynu caycunꞌa Tayta Diosniqui nishanta uyalicul cay librućhu isquirbïsha camachicuynincunacta,
yaćhachicuynincunacta cäsuculcaptiquim;
jinaman llapan śhunꞌuyquiwan,
llapan pinsayniquiwan payman cuticalcämuptiquimari.
11 “Cay camachicuy nishäcunaca manamá sasa-sasachu,
nïtac lulayta mana atipapäcunayquichu cayan.
12 Manamá janay pachäćhüchu cayan:
‘¿Mayanćha janay pachäta ishpïpamachwan apamunanpä?
Chayćha cäsucunapä yaćhaycachimachwan’ nil ninayquipäpis.
13 Manatacmá lamarpa juc lädunćhülächu cayan:
‘¿Mayanćha lamarcäta chimpäpamachwan apamunanpä?
Chayćha cäsucunapä yaćhaycachimachwan’ nil ninayquipäpis.
14 Aśhwanpa willacuyca lädullayquićhu,
shimillayquićhu,
śhunꞌullayquićhümi cayan cäsucunayquipä.b
15 “Chayurá canan ñawpäniquimanmi ćhulaycamú mayanninta aclapäcunayquipäpis:
allincätawan cawsaycäta ütac mana allincätawan wañuycäta.
16 Cananmi niycuc Tayta Diosniquita cuyapäcunayquipä,
munaśhanćhu pulipäcunayquipä,
camachicuynincunacta,
yaćhachicuynincunacta,
nishancunacta cäsuculcänayquipä.
Chayćha Tayta Diosniqui uycuśhuśhayqui allpaćhüña cayalcaptiqui allinpä licaycul achca milayniyüta cawsachipäcuśhunqui.
17 Ñatac cay nishäcunacta mana uyalicul juc taytachacunawan aysachiculcul alawayaptiquiꞌa,
sirbiyaptiquiꞌa,
18 mana llaquipaycuśham rasunpa camacäśha canqui.
Jinaman Jordan mayucta chimpalcul duyñuchacunayqui allpaćhu manamá unaychu yaćhapäcunqui.
19 Chayurá cananꞌari aclaycäliy cawsayta ütac wañuyta,
allincäta ütac mana allincäta.
Chaynu aclaśhayquipïta janay pachäwan cay pachämi licäca cayan.
Chayurá cawsaycätari aclaycuy amcunapis milayniquicunapis cawsapäcunayquipä.
20 Tayta Diosniquitari cuyapäcuy,
cäsuculcay,
payllaman chalapaculcaypis.
Paypa maquinćhümi cawsayniqui cayan.
Chaymi awquilluyqui Abrahamman,c
Isaacman,d
Jacobmane limalicuśhan allpaćhüpis achca timpu yaćhapäcunquiman” nil.