Lipra ishyaypïtam nin
13
Chaypïtam Moisestawan Aaronta Tayta Dios nin:
2 “Mayanpapis aychanćhu sacsämuptin,
ishuytämuptin,
yulälla paćhpaśhtämuptin ütac lipranu sacsamuptinꞌa puśhanqui sasirdüti Aaronman ütac jucnin sasirdüti chulinmanmi.
3 Chayćhümi sasirdütica sacsamüca ima caśhantapis licanꞌa.
Sïchuśh chay dañädućhu wachaca yuläyanꞌa ütac chay dañäduca jiꞌalpunꞌa lipra nishan ishyayñamá.
Chaymi sasirdütica tuquicta licaycul anlapäña licaśha caśhanta niycunꞌa.
4 “Ñatac chay yulä paćhpaśhtämüca mana jiꞌalpuśha captinꞌa nïtac wachanpis mana yuläyamuptinꞌa sasirdütïmi chay nunacta wićhalächinꞌa anćhish muyun.
5 Chay anćhish muyunca yapa tuquicta licaycuptin sacsayca jinalla cayal mana milaptinꞌa yapam anćhish muyuntac wićhalächinꞌa.
6 Chaypïta anćhish muyuncäćhu yapam tuquicta licaycunꞌa.
Chayćhu sacsayca mana milal chincatyayaptinꞌa chuya caśhantañamari sasirdütica niycunꞌa.
Paćhpaśhtayllamari cala.
Chaymi müdanancunacta täśhaculcul chuyanchäśhaña caycunꞌa.
7 “Ñatac licaycul chuya caśhantaña niycuptinpis sacsayca masta milacuyaptinꞌa yapañatacmi sasirdütiman licaycunanpä linꞌa.
8 Chayćhu sasirdütica licalcul rasunpa sacsayca milaśhanta tantiälulꞌa anla nuna caśhantañam niycunꞌa;
lipra ishyaywanñamari cayan.
9 “Mayanpis sacsay ishyaywan cäcá sasirdütimanmi puśhaśha canꞌa.
10 Chayćhu sasirdütica tuquicta licaycuptin sacsaynin rasunpa yulä cayaptinꞌa,
wachanpis yuläyäśhaña cayaptinꞌa,
jinaman llullu aychanpis camalayämuptinꞌa,
11 minïsha sacsay ishyayñam aychanćhu cayan.
Chayćha sasirdütica anla nuna caśhantaña niycunꞌa;
manañamari wićhananñachu anlaña cayaptinꞌa.
12 “Sïchuśh chay yulä sacsayca rätulla ćhaqui puntanpi aśhta uma puntan-cama miläluptinꞌa,
13 sasirdütïmi tuquicta licaycunꞌa.
Chaynu jinantin aychanćhu caśhanta licaycul sasirdütïmi chuya caśhantaña niycunꞌa.
Chay sacsayca yuläman muyuśhanpamari chuyanchaycuśhaña caycunꞌa.
14 Ñatac chay ishyäcäćhu llullu aycha camalacämuptinꞌa anlapäña licaśhamari canꞌa.
15 Chay llullu aychacta sasirdütica tuquicta licaycul anla caśhantañamá niycunꞌa.
Llullu aychaca anla caśhanpamari sacsay ishyayña.
16 “Ñatac llullu aychaca yuläman muyüluptinꞌa sasirdütimanmi linꞌa.
17 Chayćhu sasirdütica licaycuptin sacsayca yuläman muyüluptinꞌa chuyanchaycuśha caśhantañam niycunꞌa;
rasunpa chuyañamari canꞌa.
18 “Ñatac juc nunap sacsaynin allinyäluptin,
19 chayćhu sacsay licalicämuptin ütac pucanilä yulä paćhpaśhtay licalïmuptinꞌa sasirdütitam licachinan.
20 Chayćhu sasirdütica licaycul sacsaynin aychanćhu ućhcutyäśha cayaptin,
wachanpis yulayäśha cayaptinꞌa anlapäñamari niycuśha canꞌa;
chay sacsayca lipra ishyayñamari.
21 Ñatac chay sacsaynin mana ućhcutyäśha cayaptin,
nïtac wachanpis yuläyaptin,
aśhwanpa chincatyayaptinꞌa anćhish muyunmi chay nunacta sasirdütica wićhalächinꞌa.
22 Sïchuśh sacsayca jinantin aychanman milacuyaptinꞌa anla caśhantañam sasirdütica niycunꞌa;
chay sacsayca liprañamari.
23 Ñatac chay yulä paćhpaśhtayca mana milaptin,
aśhwanpa silayaptinꞌa chuyanchaśhapäñamari sasirdütica licaycunꞌa.
24 “Mayanpis aychanta ninawan lupachicüluptin chayćhu yulä pucanilä paćhpaśhtay licalïmuptin,
25 sasirdütïmi tuquicta licaycunan.
Sïchuśh chay lupachicuśhanćhu yulä wacha licalïmunꞌa,
jinaman ućhcutyäśha cayaptinꞌa liprañamari cayan.
Chayurá sacsayca lipra caśhanpamari sasirdütica anlaña caśhanta niycunꞌa.
26 Ñatac sasirdütica tuquicta licaycuptin yulä wacha mana captin,
nïtac mana ućhcutyäśhapis captin,
aśhwanpa chincatyayaptinꞌa anćhish muyunmi wićhalächinꞌa.
27 Chay anćhish muyuncäćhuñatac sasirdütica tuquicta licaycuptin sacsayca jinantin aychanman lluy miläśha cayaptinꞌa anla caśhantañamari sasirdütica niycunꞌa;
chayꞌa lipra ishyayñamari.
28 Ñatac chay paćhpaśhtayca mana milal chincalpuyaptinꞌa lupachicuśhancäpa silayllanmi.
Chaynu lupachicuśhanpa silayllan caśhanpam sasirdütica chuyanchäśha caśhantaña niycunꞌa.
29 “Sïchuśh juc wayapacta ütac walmicta umanćhu ütac caquichcunćhu sacsay licalïluptin,
30 sasirdütïmi tuquicta licaycunꞌa.
Chayćhu aychan ućhcutyäśha cayaptin,
ächanpis tunꞌuśhyäśha rällulla cayaptinꞌa anla caśhantañam niycunꞌa;
chayꞌa umanćhu,
caquichcunćhu sacsay lipra ishyayñamari.
31 Sïchuśh sasirdütica licaptin chay lipra ishyayca mana ućhcutyäśha cayaptin,
nïtac ächanpis yana captinꞌa anćhish muyunmi wićhalächinꞌa.
32 Chay anćhish muyuncäćhüñatacmi tuquicta yapa licaycunꞌa.
Chayćhu lipra ishyayca mana milaptin,
mana ućhcutyaptin,
nïtac ächanpis tunꞌuśhyaptinꞌa,
33 ächanta jićhcacunanpämi sasirdütica ninꞌa;
quiquin lipra sacsäśhacunätá amam jićhcacunꞌachu.
Chay nunacta anćhish muyun maslämi wićhalächinꞌa.
34 Chay anćhish muyun ćhämuptinñatacmi sasirdütica caśhan licaycunꞌa.
Chayćhu lipra sacsayca mana milaptin nïtac ućhcutyaptinꞌa chuyanchäśha caśhantañamari niycunꞌa.
Chayćhümi ishyäca müdananta täśhalcul chuyaña caycunꞌa.
35 Sïchuśh chuyanchäśhaña caśhanta niycuyaptinpis lipra sacsayca milacuyaptinꞌa,
36 sasirdütica tuquicta yapam licaycunan.
Chay lipra sacsayca milacuyaptinꞌa manañam ächanćhu tunꞌuśhyäśhanta ashinanñachu;
anlapäñamari licaśha cayan.
37 Ñatac lipra sacsayca jinallaćhu śhaycülul ächanpis yana wiñayämuptinꞌa allinyälunñam.
Chayurá chay nunaca chuyaña cayaptinmi sasirdütica chuyanchäśha caśhantaña niycunꞌa.
38 “Chaynütacmi juc wayapacta ütac walmicta yulä paćhpaśhtay yalämuptin,
39 sasirdütica tuquicta licaycunan.
Chayćhu yuläcasca,
yanasca captinꞌa yanꞌasca sacsayllamá;
chayurá chay nunaca chuyañamari caycunꞌa.
40 “Sïchuśh juc wayapap ächan lluy palpüluptin cala uma quïdalulpis chuyam cayan.
41 Chaynütac ulcuncascaćhu ächancuna palpüluptin päćha licalïlulpis chuyam cayan.
42 Ñatac ulcunćhu ütac jinantin cala umanćhu pucanilä sacsay licalïluptinꞌa lipramari allaycayämun.
43 Chaynu captinꞌa sasirdütïmi licaycunꞌa.
Sïchuśh pucanilä sacsayca aychanćhu cä lipranu cacuyaptinꞌa,
44 liprañamari.
Chaynu umanćhu cayaptinmi anla nunaña cayan.
Chaymi sasirdütica anla caśhantaña niycunꞌa.
45 “Chayurá liprawan cäcunaca aśhyay-aśhyay müdanawan müdacuśha,
mana ñächacuśha imam capäcunanpis.
Jinaman ćhawpi cärallanta śhucupacüśham apalcachapäcunꞌa:
‘¡Anlam!
¡Anlam!’
nil.
46 Chay liprawan caśhancamá anlapä licaśhañam canꞌa.
Chaymi yaćhapäcuśhanpi calućhu japallan yaćhapäcunan.
47 “Ñatac paćhpaśhtayca licalimunman millwaćhu ütac lïnupi müdanacunaćhu,
48 ütac awanacunaćhu,
lïnupi ütac millwapi minincunaćhu,
chaynütac cuyrućhu ütac cuyrupi ima luläśhaćhüpis.
49 Jinaman chay jucninćhu paćhpaśhtayca birdinilä ütac pucanilä captinꞌa paćhpaśhtayca uwisäśhañam cayan.
Chaymari sasirdütïta licachinan.
50 Jinaptinmi sasirdütica chayta tuquicta licaycul anchiśh muyun chayta wićhalächinꞌa.
51 Anćhish muyuncäćhüñatacmi caśhan licaycunꞌa.
Sïchuśh chayćhu müdanaman,
awanaman,
lïnupi ütac millwapi minincunaman,
cuyruman ütac cuyrupi ima lulaśhamanpis miläluptinꞌa sumä-sumä uwisäśhañam cayan;
chayurá chay anlañamari cayan.
52 Chayurá paćhpaśhtayca müdanaćhu,
awanaćhu,
lïnupi ütac millwapi minincunaćhu,
cuyrućhu ütac cuyrupi ima lulaśhanćhu cacuptinpis sumä uwisäśha caśhanpam lluy cañäśha canꞌa.
53-54 Ñatac chay müdanaćhu,
awanaćhu,
lïnupi ütac millwapi minincunaćhu,
cuyrućhu ütac cuyrupi ima lulaśhanćhu paćhpaśhtayca mana milaptinꞌa,
sasirdütïmi ninꞌa,
chay paćhpaśhtäśhäta täśhananpä.
Jinalcul anćhish muyun mas wićhalänanpäpis ninꞌam.
55 “Chay paćhpaśhtay täśhaśhancäta sasirdütica yapam licaycunꞌa.
Chayćhu paćhpaśhtayca mana chincaptinꞌa,
masqui mana milaptinpis anlapä licaśhañam canꞌa.
Chay lulïpapis ütac janäpapis camacayaptinꞌa cañäśhañam canꞌa.
56 Sïchuśh täśhaśhancäta sasirdütica licaycuśhanćhu chincalpuśhanta licälulꞌa paćhpaśhtäśha cäcäta cuchülunꞌam chay müdanapïta,
chay cuyrupïta ütac minin awäśha cäcäpïpis.
57 Ñatac paćhpaśhtayca caśhan cutïmul jinantin müdanaman,
awanaman,
mininman,
ütac cuyrupi ima lulaśhamanpis miläluptinꞌa chayta cañaycülunquiñam.
58 Sïchuśh täśhaptin chay paćhpaśhtayca müdanapi,
awäśhapi,
mininpi,
cuyrupi chincaptinꞌa yapam täśhanꞌa.
Chaymi chuyanchäśhaña caycunꞌa” nin Tayta Dios.
59 Caymi camachicuyca paćhpaśhtayca müdanaman,
awanaman,
lïnupi ütac millwapi minincunaman,
cuyruman ütac cuyrupi ima lulaśhanćhüpis cayaptin chuyanchäśha ütac anla caśhantapis niycunanpä.