Ishyacü walmica chuyaña cananpämi nin
12
Chaypïtam Moisesta Tayta Dios nin:
2 “Israel caśhtacunäta cayta nimuy:
Juc walmi patayu licalilcul walaśhta waćhacuptinꞌa anćhish muyunmi anlapä licaśha canꞌa,
ishyacuynin quillacunächünu.
3 Chay walaśh iñachätañatacmi pusä muyuncäćhu umri cayninćhu siñalachipäcunqui.a
4 Mamanñatacmi yawarnin śhamuśhanpïta quimsa ćhunca quimsayu (33) muyun jinalla chuyanchacunꞌa.
Chay chuyanchacuśhan muyuncunaca manam yataycunmanchu ima chuya cüsacunactapis nïtac chuya carpamanpis yaycunmanchu.
5 Ñatac wamlacta ishyacülulꞌa ishcay simänam anlapä licaśha canꞌa,
ishyacuynin quillacunäćhünu.
Jinaman chay yawarnin śhamuśhanpi süta ćhunca sütayu (66) muyunlämi jinalla chuyanchacunꞌa.
6 “Ñatac walaśh ütac wamla wawinpi chuyanchacunan muyuncunaca camacäluptinꞌa,
sasirdütimanmi chuyanchacunanpä watayu uwishta cañaywan uycunanpä apanꞌa;
chuyanchäśha cananpäñatacmi ulpayta ütac mallwa ulpayta apanꞌa.
Caycunacta tincuna carpap puncunmanmari apaycunꞌa.
7 Sasirdütiñatacmi Tayta Diosman uycunꞌa walmica chuyanchaycuśha cananpä.
Chaynüpam yawarninta jićhaśhanpi chuyapäña licaycuśha canꞌa” nil.
Cay yaćhachicuytamari lulapäcunꞌa walaśh ütac wamla näsimuptinpis.
8 Juc uwishta lantinanpä mana capuptinñatacmi ishcay ulpayta ütac ishcay mallwa ulpaytab cañaywan uycunanpä apanꞌa.
Jucnintam juchanpïta uycunanpä;
juccätañatacmi chuyanchaycuśha cananpä uycunꞌa.
Chayta sasirdütica uycuptinmari walmica chuyaña caycunꞌa.