Josepa cüpanmi Benjaminpa cuśhtalninćhu licalin
44
Chaypïtañatacmi yanapäninta Jose nin:
“Paycunap cuśhtalninman-cama apanan camayta trïgucta winamuy.
Chay pägaśhuśhayqui illaynintapis cuśhtalninpa shiminman-cama winaycäpuy.
2 Chaynütac illaypi cä yaꞌapa cüpätapis śhullcanpa cuśhtalninman pägaśhan illaynintawan cuscacta winaycülunqui” nin.
Chaymi yanapänin Jose nishantanülla lulaycula.
3 Chay wälañam wäla-wälalla aśhnuntin-camacta malcanta Jose cutichila.
4 Ñatac malcapi manalä ancha caluscacta liyalcaptinmi yanapäninta Jose nin:
“Chay nunacunäta cürri atipäcunqui.
Alcansälulmi:
‘¿Imanuypam allinta lulaycuyäśhuptiqui mana allincäwan cutiycayalcächinquiman?
5 ¿Imacätan capäcunqui patrunnïpa upyananpä,
licacunanpä cä cüpanta suwayalcämunayquipä?
¡Cay lulapäcuśhayqui allinchun ampá!’
nilmi nipäcunqui” nin.
6 Chaynu alcansälulmi Jose nishantanülla nila.
7 Niptinmi paycuna:
“Taytay,
¿imapïtam chaynüta nipämanquiman?
Chaynüta manam imaypis cay nunallayquicuna lulaycälillämanchu.
8 Canaan malcapïla cuśhtalnïćhu cä illaytapis cutiyalcächimulchun ¿mandäniquip ürunta,
illayninta suwayalcämüman?
9 Ashipällämayꞌari,
mayannïćhüpis talïlulꞌa wañuchishari capäculläśhä.
Partiñatacćha mandäniquip uywaynin capäculläśhä” nipäcun.
10 Niptinmi:
“Allinmi,
chayurá nipäcuśhayquinu cachun.
Mayanniquićhüpis taliśhäcälla uywaynin cananpä cutichun.
Mana juchayücäñatac pasapäcunqui” nin.
11 Chaymi lluypis cuśhtalninta mana-mana ćhulpaycälil quićhaycapäcula.
12 Jinaptinmi Josepa yanapänin nunaca,
mayurcäpi allacuycul ashishanćhu śhullca Benjaminpa cuśhtalninćhu cüpacta talïlun.
13 Chaymi mana imanïtapis atipapäcunchu;
sumä-sumä llaquicuypïmi müdananta laćhyacuyalcan.
Jinalculmi aśhnuncunaman cargaculcul malcaman caśhan cutipäcula.
14 Chayman Juda wawꞌi-caśhancunawan ćhaycälinanpämi Jose chayllaćhüla cayäña.
Chaymi puntanman unꞌulacuycul pampäcama uyshucaycälila.
15 Chayćhümi Jose:
“¿Imacá nunatan capäcunqui?
¿Manachun yaꞌa tantiayniyu nunälä tantiananta yalpapäculanqui imatá?”
nicuyan.
16 Niptinmi Juda:
“Taytay,
manam imanïtapis atipapäcullächu.
¡Ima nipäcuśhäpis manaćhá quirishachu canman!
¿Mana juchayu capäcuśhäta imanuypaćh tantiaycachicman?
Cananmi Tayta Dios cay nunallayquita juchayüta talïläliman.
Yaꞌacunaćh cüpa apäcäwan cusca uywayniquiña capäculläśha” nin.
17 Niptinmi Jose:
“Caynütá imaypis manaćh lulämanchu,
cüpaca mayanniquićhüpis cäcälla uywaynïpä quïdacuchun.
Juccunacá jawcalla taytayquiman cuticulcay” nin.
Benjaminta caćhaycunanpämi Juda mañacun
18 Chaynu niptinmi Joseman aśhutyaycul Juda nin:
“Taytallay,
ama chaynu caychu limaycuśhäta uyaliycallämay.
Am quiquin Faraoncänümi sumä puydïnin canqui,
yaꞌawan amari piñacullaychu.
19 Taytay,
anmi tapupämälanqui taytá cawsaśhantawan,
śhullcá caśhantapis.
20 Chaymi willaycapäculac taytá yaśhallaña caśhanta.
Chay yaśha cayninćhüña juc mamallaćhu ishcay śhullca chulin caśhantapis,
chay jucnin śhullcá wañucuśhantapis niycälilacmari.
Chaynütac chay śhullcällactaña anchap cuyayninwan cawsaśhantapis willaycälilacmari.
21 Amñatacmi ‘puśhamuy lisiycunäpä’ nipämälanqui.
22 Chaymi niycälilac ‘Papäní chay śhullcäta manam caćhaycunmanchu.
Caćhaycüluptinꞌa waꞌayällalćha wañucunmanpis’ nil.
23 Ñatac anmi nipämälanqui:
‘Payta mana puśhapämulꞌa,
amam ancuycamunquipischu’ nil.
24 “Chaymi papänïman ćhaycälil nimäśhayquita willaycälilá.
25 Chaypïmi papäní:
‘Trïgu lantimü cutipäcuy’ nipämäla.
26 Yaꞌacunañatacmi nipäculá:
‘Nipämäśhan śhullcäta mana puśhalꞌa manam cutipäcümanchu.
Śhullcá yaꞌacunawan mana liptinꞌa chay puydï nuna manaćh ćhasquiycälimanꞌachu’ nil.
27 Niptïmi papäní:
‘Amcuna yaćhapäcunquim walmí Raquelćhu ishcaylla chulí caśhanta.
28 Jucninmi lädupïta licul canancama mana cutiycamunchu.
Chaymi munti uywacunaćh micülun ní.
29 Canan cay śhullca chulïtapis puśhapäcuptiqui imapis pasäluptinꞌa waꞌayällalñaćh wañuytapis talïshä’ nil nipämäla.
30-31 “Chaymi taytay,
cay cuyacuśhan chulillanwan juc-yupaylla cawsayalꞌa,
mana ćhäśhanta licayculćha llaquicuywan wañuytapis talïlunman.
Chayćha yaꞌacuna juchayu capäcuśhä yaśha papäní wañucuptin.
32 Cay nunallayquimari papänïta limaliculá cay śhullca chulinta cutiycachinäpä:
‘Mana cutichimulꞌa yaꞌami juchayu wiña-wiñaypä caśhä’ nil limaliculäpis.
33 Chaymi mañacuc taytay,
cay wawꞌi-caśhäcunawan cuticunanpä,
pudirninćha uywayniqui yaꞌa quïdalläśhä.
34 ¿Imanuypam mana śhullcantin papänïman cutiycapäcüman?
Manamá papänïta ima pasanantapis munächu” nin.