Esaumi wawꞌi-caśhan Jacobta allinpä ćhasquiycun
33
Ñatac Jacobmi licälun mayurnin Esau tawa paćhac (400) nunancunawan śhacayämüta.
Chaymi lluy chulincunacta Leaman,
Raquelman,
ishcay uywaynincunamanpis laquïla.
2 Jinalculmi ćhuläla atinacuyllacta:
Puntaman ishcaynin uywaynincunacta,
ipanmanꞌa Leacta,
jina ipanmanñatacmi Raqueltawan Joseta.
3 Jacobñatacmi lluypa puntanćhu lila,
jinalmi anćhish cuti unꞌulacuycul pampäcama uyshuycula mayurnin Esauta ćhasquinanpä.
4 Esauñatacmi śhullcan Jacobman paćhcalcamul macallacuycul muchacuycun.
Chayćhümi pulan waꞌaculcäla.
5 Chaypïtam Esau walmicunäta urucunäta licälul:
“¿Mayancunam paycuna?”
nin.
Niptinmi Jacob:
“Tayta Dios llaquipayninćhu uycamäśhan chulïcunam” nin.
6 Chaypïtam Jacobpa uywaynincuna wawintin-cama Esauman aśhuycälimul unꞌulacuycul uyshuycapäcula.
7 Jinaman Leapis wawintinmi unꞌulacuycul uyshuycapäcula.
Chaynu unꞌulacuycultacmi camacalpula Raquelwan Josepis.
8 Chaypïtam Esau:
“¿Uywan aticüśha-cama tincuśhäcunäwan imactam lulayta munalanqui?”
nin.
Niptinmi Jacob:
“Taytay,
llaquipaycamänayquipämari callan” nin.
9 Niptinmi Esau:
“Jacob,
yaꞌacta imapis manam pishillämanchu;
quiquiquipä ćhulacuy” nin.
10 Niptinmi Jacob:
“Ama chaynu callaychu,
llaquipaycamalꞌa apachimuśhäta ćhasquiycallämay.
Awari,
allinpä ćhasquiycamäśhayquipi ¡amta licaycul quiquin Tayta Diosta licaśhänümari cayällan!
11 Cay uycuśhactari allinpä ćhasquiycallämay;
Tayta Dios llaquipaycamaptinmi cay lluy licaśhayquica yaꞌapa caycullan” nin.
13 Niptinmi Jacob:
“Taytay,
licayanquim chulïcuna anchap uchuchällala caśhanta.
Chaynütacmi uwishnïcunapis chayla waćhäśhacuna cayalcan,
pishipälälilćha juc muyunlla lluy wañuculcanman.
14 Taytallay,
aśhwanpa am puntay;
ipayquitaćh yaꞌa uywayniqui allipïta śhamulläśha uywäwan,
urücunawan;
Seir ulꞌućhüñam tinculläśhun” nin.
15 Niptinmi Esau:
“Allinmi,
śhapämuśhá nunäcunapïta waquinninta caćhaycuśhayqui” nin.
Niptinmi Jacob:
“Taytay,
allin śhunꞌuwanña cayalꞌa chaytalächu manam munanchic” nin.
16 Chaypïtam Esau chay muyunlla Seirman cuticula.
17 Jacobñatacmi Sucotman lila.
Chayćhümi chucllacunacta śhalcachila,
uywancunapäpis canćhancunacta.
Chaymi chay läducta “chucllacuna” nïta śhutichäla.
18 Ñatac Padan-arampi Jacob śhamulmi Canaanćhu Shiquem malcaman allin tuqui ćhäla.
Chaypa chimpanćhümi chucllancunacta śhalcachila.
19 Chay chuclla śhalcachishan ćhaclacunätam Hamorpa chulin Shiquem nishanpïta paćhac (100) arrüba illaywan lantila.
Chayćhümi chucllanta śhalcachila.a
20 Chaynütacmi juc uycuna patacta lulaycul “El-Elohe-Israel” nïwan śhutichäla.