Tayta Diospa anjilninmi Abrahamman licalin
18
Mamre lädu encina nishan muntićhu anchap lupay caśhan üram chucllanpa puncunćhu Abraham unupacuyäla.
Chayćhümi Tayta Dios payman licalïlun.
2 Abraham licalcunanpämi quimsa wayapacuna sircascanćhu śhäcuyalcäña.a
Chaymi täcuśhanpi paycunaman ćhasquïnin paćhcalcul,
puntanman unꞌulacuycul nin:
3 “Śhunꞌuyquipänu callaptiꞌa,
Taytay ama chaynu callayćhu uchuyllacta alcaycälimay.
4 Yacucta apämuśhä ćhaquiquicunacta paꞌacalcälil jaćhap llantuyninćhu jamaycälinayquipä.
5 Cay nunallayquipa pasayalcaptiquiꞌa micuyllactapis apämuśhä micacaycälil yapa pasapäcunayquipä” nil.
Niptinmi:
“Nishayquitanu lulaycuy” nipäcula.
6 Chaymi Abraham chucllanćhu walmin Sara caśhancäman yaycucuycul:
“Apuraylla quimsa tupu arinacta chapuycul ancalcüluy” nin.
7 Nilculmi Abraham wäcacuna caśhancäman lilcul jucnin malta alli wiranninta chalalcul uywayninman uycülun.
Payñatacmi apurayllaman yanulcämula.
8 Chaypïmi chay aycha yanuchishancätawan quïsuctapis,
lichictapis micapäcunanpä uycula.
Chay micapäcuśhancamam Abrahamñatac jaćhap llantuyllanćhu yanapänanpä śhäcuyäla.
9 Chaymi paycuna:
“¿Mayćhütan walmiqui Sara cayan?”
nipäcun.
Niptinmi Abraham:
“Cay chuclläćhümi cayan” nin.
10 Chay jucninñatacmi:
“Canannü watacta cutimunäpämi walmiqui Sara wawiyüña cayanꞌa” nin.b
Chay limapäcuśhanpa ipallanćhu chucllan cayaptinmi nipäcuśhanta Sara uyaliyäla.
11 Abraham walmi-caripis yaśhaña cayalcaptinmari Sarap quilla ishyacuyninpis manaña śhamulañachu.
12 Chaymi Sara asicülul śhunꞌullanćhu nin:
“¿Cushisha cayänäpä wayapäpis awquishña cayaptin imanuypaćh wawí licalïlunman?”c
nil.
13 Tayta Diosñatacmi Abrahamta nin:
“¿Imapïtam Sara asicun?
¡Manachun chalapacun yaśhaña cayalpis wawin licalinanpä imatá!
14 ¿Tayta Diosninchicpä,
imallá sasa canmantan?
Canannü watacta cutimunäpämi Sara wawiyüña cayanꞌa” nil.d
15 Sarañatacmi manchapacüśha casquicücuyan:
“Manam asilächu” nil.
Tayta Diosñatacmi:
“Rasunpa,
asilanquim” nin.
Abrahammi Sodoma malcapä Tayta Diosta mañacun
16 Chaypïta chay quimsa wayapacunaca Sodoma läducta liculcaptinmi Abrahampis jamallá ninanpä cumpañaycula.
17 Chayćhu Tayta Diosñatacmi nicun:
“Ima lulanätapis Abrahampi manam pacaycümanchu.
18 Abrahammi jatun sumä munayniyu nasyunman milanꞌa.
Paypatacmi jinantin pachäćhu malcacunapis allinpä licaycuśhä capäcunꞌa.
19 Abrahamta aclayculá chulincunacta lluy milaynincunacta yaćhaycachinäpämi.
Jinaman Tayta Diospa munayninman śhunꞌunta ćhulaycul allincällacta lulaycälinanpämi.
Chaynüpaćh limalicuśhäcäta lulaycuśhä” nil.
20 Chaynu yalpaćhaculculmi Abrahamta Tayta Dios nin:
“Sodoma Gomorra malcapi limaśhancunaca mana awantaycuyñam;
mana allin lulaynincuna maynu-maynüñam cayan.
21 Chay nipäcuśhannu rasunpa caśhantapis licaycümi jiꞌalpuśhä.
Chaynu caśhanta ütac mana caśhantapis yaćhaycamuśhäćha” nil.
22 Ñatac chay wayapacunämi Sodoma läduman liculcan;
Abrahamñatacmi Tayta Diospa puntanćhu quïdälun.
23 Chaymi Abraham Tayta Diosman aśhuycul nin:
“¿Mana allin nunacunäwan cuscactachun allin nunacunätapis camacaycülunqui?
24 Cay malcaćhu picha ćhunca (50) allincäta luläcuna cayaptinpis ¿camacaycülunquichun icha chay picha ćhuncacunäta (50) llaquipayniquiwanchun pampachaycunqui?
25 Chaynütá manam lulanquimanchu.
¡Allin lulä nunacunäta chay mana allin luläcunäwan cuscactá amari wañuchiychu!
¡Mana allin luläcäwan cuscactá manaćh mućhuycachinquimanchu jinantin pachäpa tincüninman caraycüca cayalꞌa!”
nil.
26 Niptinmi Tayta Dios nin:
“Cay jinantin Sodoma malcaćhu picha ćhunca (50) allincäta luläcuna captinꞌa,
paycuna-laycum malcantinta pampachaycuśhä” nil.
27 Yapañatacmi Abraham nin:
“Taytay,
allpalla ućhpalla cayaptïpis uyaliycallämay,
28 picha ćhunca (50) allincäta lulaycälï cananpä picha faltaptinꞌa ¿chay picha faltäcäpïtapis malcacta camacaycülunquichun?”
nil.
Niptinmi Tayta Dios:
“Tawa ćhunca pichayu (45) allincäta lulä-cama captinꞌa pampachaycuśhämi” nin.
29 Chaypïta yapañatacmi Abraham:
“¿Ichapis tawa ćhuncalla (40) cayan?”
nin.
Niptinmi:
“Chay tawa ćhunca-laycupis (40) pampachaycuśhämi” nin.
30 Yapañatac Abraham:
“¿Taytallay,
ama piñacuychu jicutaycuśhäpi;
ichapis quimsa ćhuncalla (30) allin cayalcan?”
nin.
Niptinmi Tayta Dios:
“Chay quimsa ćhunca-laycupis (30) pampachaycuśhämi” nin.
31 Abrahamñatacmi yapa nin:
“Taytallay,
cullu-yupaymi limapaycullac,
¿ishcay ćhuncalla (20) cayaptinꞌa pampachaycunquichun?”
nil.
Niptinmi:
“Chay ishcay ćhunca-laycupis (20) pampachaycuśhämi” nin.
32 Yapañatacmi Abraham:
“Taytallay,
amaña rabyachishayquichu cayllactañam niycuśhayqui;
¿ćhuncalla (10) captinꞌa?”
nin.
Niptinmi Tayta Dios:
“Ćhunca-laycupis (10) pampachaycuśhälämi” nin.
33 Chaynu Abrahamwan limayta camacalculmi Tayta Dios licula.
Abrahamñatacmi chucllanman cutiycula.