Nacionkunata Tayta Dios hawkayachinanmanta
(Is 2:2-4)
4
Tukupay tiempokunapim
Tayta Diospa templonpa kasqan orqoqa
wakin orqokunamantapas altosuraq kanqa.
Wakin alto moqokunamantapas aswan hatunchasqam kanqa.
Chay orqomanmi rinqaku llapallan nacion runakunaqa.
2 Nana-nanaq nacion runakunam hamunqaku.
Hinaspam paykunaqa kaynata ninqaku:
Hakuchikyá Tayta Diospa orqonman.
Risunchikyá Jacobpa Diosninpa templonman.
Paymi yachachiwasunchik paypaq hina kawsanapaq.
Yachachiwasunchikmi paypa munasqanman hina kawsanapaq.
Sion Moqomantam Tayta Diospa yachachikuynin lloqsimunqa.
Jerusalen llaqtamantam Tayta Diospa palabran lloqsimunqa.
3 Tayta Diosmi juzganqa achka-achka runakunata.
Paymi arreglanqa karupi kaq atiyniyoq nacionkunata.
Paykunaqa espadankutapas rejakunamanñam tikrarunqaku.
Paykunaqa lanzankutapas rutunakunamanñam tikrarunqaku.
Manañam nacionpurapas peleanqakuñachu.
Guerrapaqpas manañam yachanqakuñachu.
4 Sapakamam uvas plantankupa llantuyninpi tiyakunqaku.
Sapakamam higos sachankupa llantuyninpi tiyakunqaku.
Manaña pipapas manchachisqanmi hawkaña kakunqaku.
Llapallan Kamachiq Tayta Dios rimarisqanraykum.
chaynaqa kanqaku.
5 Llapallan runakunaqa diosninkupi
confiakuspam kawsachkanku.
Ñoqanchikmi ichaqa yupaychasqanchik Tayta Diosman
hapipakuchkanchik.
Payman hapipakuspam wiñaypaq kawsasunchik.
Runankunata Tayta Dios librananmanta
6 Tayta Diosmi nin kaynata:
Chay tiempopiqa wisturuq ovejata hinam
runaykunata huñumusaq.
Castigaspa cheqechisqay ovejata hinam
runaykunata kutichimusaq.
7 Wisturuqkunata puchuykachispaymi hoqarisaq.
Karunchasqakunatam hatun nacionniyoqmanña tikrarusaq.
Ñoqa Tayta Diosñam gobiernasaq.
Sion Moqopim chay tiempomanta wiñaypaq gobiernasaq.
8 Yaw sumaqllaña Sion llaqta,
huktawanmi qamqa
reypa yachanan kanki.
9 ¿Imanasqataq llumpaytaqa qaparkachachkanki?
¿Manachum qampaqa reyniki kapusunki?
¿Wañukunñachum qamta consejasuqnikiqa
chaynapi wachakuq hinaraq ñakarinaykipaqqa?
10 Sion llaqtapi yachaq runakuna,
wachakuq hinaraqyá qewipakuychik.
Kunanqa llaqtamanta lloqsispam
chakrakunapiña yachankichik.
Babilonia nacionkama chayaruspam
chaypiña librasqa kankichik.
Chaypiñam enemigoykichikmanta
Tayta Dios reclamamusunkichik.
11 Kunanmi ichaqa achkallaña nacionkuna
qampa contraykipi huñunakurunku.
Paykunaqa qamkunamantam nichkanku:
Sion llaqtaqa millakuypaq rurasqayá kachun,
nispa.
Ñawinchikpas agradowanyá chayta qawachun,
nispa.
12 Nacion runakunaqa manam yachanchu
Tayta Diospa imam tanteasqantaqa.
Nacion runakunaqa manam entiendenchu
Tayta Diospa imam piensasqantaqa.
Manam entiendenkuchu gavillakuna hina
Diospa huñusqan kasqankutaqa.
13 Sumaq Sion llaqtapi yachaq runakuna,
qamkunaqa hatarispaykichikyá trillaychik.
Fierro waqrayoqtapas hinaraqmi rurasqaykichik.
Broncemanta silluyoqta hinaraqmi rurasqaykichik.
Achkallaña runakunata ñutupanaykichikpaqmi
qamkunataqa chaynata rurasqaykichik.
Imapas qechusqaykichiktaqa
ñoqa Tayta Diospaqmi sapaqchapuwankichik.
Qori-qollqenkutaqa tukuy kay pachapa
Señorninpaqmi sapaqchapuwankichik.