Mana allin gobiernaqkunapa contranpi willakuymanta
3
Hinaptinmi ñoqañataq nirqani kaynata:
Jacob casta jefekuna,
uyariwaychik.
Israel casta kamachikuqkuna,
uyariwaychik.
Allin arreglomantaqa ¿manachum yachanaykichik?
2 Cheqninkichikmi allin kaqkunataqa.
Kuyankichikmi mana allin kaqkunataqa.
Runaykunataqa ovejata hinaraqmi
qarantapas chusturunkichik.
Aychallantapas ovejata hinaraqmi
tullunkunamanta chusturunkichik.
3 Runaykunapa aychantaqa
ovejakunata hinaraqmi mikurunkichik.
Runaykunapa qarantaqa
ovejakunata hinaraqmi chusturunkichik.
Tullullankutapas pakiparunkichikmi.
Tisaparunkichikpas yanunapaq hinaraqmi.
Tisaparunkichikpas mankapi aychata hinaraqmi.
4 Huk punchawmi qayakunkichik Tayta Diosta.
Ichaqa manam uyarinqachu qayakusqaykichikta.
Chay tiempopiqa qamkunamantam pakakurunqa.
Mana allinkuna rurasqaykichikraykum pakakurunqa.
5 Runaykunata pantachispa willakuqkunatam,
mikunankupaq imapas kaptinqa
hawka kaymanta willakuqkunatam,
ichaqa mana imapas mikunankupaq kaptinqa
guerrawan manchachiqkunatam
Tayta Dios nin kaynata:
6 Revelacionkunatapas manañam chaskinkichikchu.
Chaskinkichikqa tuta hina mana kaqllatañam.
Manañam adivinaciontapas rurankichikchu.
Adivinankichikpas tuta hina mana kaqllatañam.
Willakuqkunamantaqa intipas chinkarunqañam.
Paykunamantaqa punchawpas tutayarunqañam.
7 Willakuqkunapas penqaypiñam rikurirunqaku.
Adivinaqkunapas muspaypi hinañam rikurirunqaku.
Penqakuymantam siminkutapas tapakurunqaku.
Mana uyarisqayraykum chaynaqa kanqaku.
8 Ñoqataqa Tayta Diospa Espiritunmi
huntaykuwan atiyninwan.
Allin arreglota ruranaypaqmi yanapaykuwan.
Ñoqaqa kallpanchasqallañam kachkani
mana kasukuq kasqankumanta
Jacob castakunaman willakunaypaq.
Ñoqaqa kallpanchasqallañam kachkani
Israel castakunaman huchanmanta willakunaypaq.
9 Jacob casta kamachikuqkuna,
uyariwaychik.
Israel casta jefekuna,
kaytayá uyariychik.
Qamkunaqa allin arreglo ruraytam
millakuypaqtaña rurarunkichik.
Allin kaqkunatam qewiparunkichik.
10 Sion llaqtatapas hatarichinkichik
runakunata wañu-wañurichispam.
Jerusalen llaqtatapas hatarichinkichik
mana allinkunata rura-rurarispam.
11 Kamachikuqkunapas regalollapaqmi gobiernanku.
Sacerdotekunapas qollqellapaqmi yachachinku.
Diosmanta willakuqpas qollqellapaqmi adivinanku.
Tayta Diosman hapipakusparaqmi kaynata ninku:
Ñoqanchikwanmi kachkan Tayta Diosqa,
nispa.
Manam hamuwasunchu mana allinqa,
nispa.
12 Chaynaqa qamkunapa huchaykichikraykum
Sion llaqtaqa chakra hinaraq yapusqa kanqa.
Jerusalenqa montonasqa rumillañam rikurirunqa.
Templopa kanan moqopas montellañam rikurirunqa.