Israel nacionpa gobiernaqninta Tayta Dios churamunanmanta
5
Salteaqllaña Jerusalen llaqtayoqkuna,
qamkunaqa tropaykichiktayá huñuychik.
Enemigopa muyuykusqanñam kachkanchik.
Israel nacionpi gobiernaqninchiktapas
kaspiwanmi uyanpi maqarapuwasunchik.
2 Efrata sutiyoq Belen llaqtacha,
Juda nacionpi kaq taksa llaqtacha,
taksallam kanki nacionpi llaqtakunamantaqa.
Chaywanpas qanmantam lloqsimunqa
Israel nacionpi gobiernaqqa.
Ñawpaqmanta rikurimuqraqmi payqa.
3 Ichaqa wachakuq warmipa wachakunankamam
Tayta Diosqa runankunata saqeykunqa.
Chaymantañam karupi kaq llaqtamasinkunapas
Israelpa mirayninkunawan huñunakunqa.
4 Payqa hamuspanmi Tayta Diospa kallpanwan
runankunata gobiernanqa.
Yupaychasqan Tayta Diospa atiyninwanmi
runakunata gobiernanqa.
Chaynapim runankunaqa hawkaña kawsakunqa.
Kay pachapa cantonkamaraqmi chayanqa
Tayta Diospa atiyninqa.
5 Paymi apamunqa hawka kawsakuytaqa.
Librasqa kanankumantawan castigasqa kanankumanta
Asiria nacionniyoq runakuna
nacionninchikman yaykuramuptinqa,
Asiria nacionniyoq runakuna
palacionchikkunata saruptinqa,
paykunapa contranpim hoqarichisunchik
qanchis gobiernaqninchik runakunata.
Paykunapa contranpim hoqarichisunchik
pusaq ancha reqsisqa runakunata.
6 Paykunaqa Asiria naciontam
espadankuwan gobiernanqaku.
Nimrod sutiyoq runapa nacionnintam
espada makiyoq gobiernanqaku.
Asiria nacionniyoq runakuna
yaykuramuptinmi librawasunchik.
Linderonchiktapas sarupaptinkum
payqa librawasunchik.
7 Jacob casta puchuq runakunaqa
achkallaña runakunapa chawpinpim kanqaku.
Tayta Diosmanta hamuq sulla hinaraqmi
paykunaqa chaypi kanqaku.
Pastokunata nuyuykuq para hinaraqmi
paykunaqa chaypi kanqaku.
Chay paraqariki chayamun
manam runakunapa kamachisqanman hinachu.
Chay paraqariki utqamun
manam runakunapa kamachisqanman hinachu.
8 Jacob casta puchuq runakunaqa
achkallaña nacionkunapa chawpinpim kanqaku.
Purun animalkunapa chawpinpi hinaraqmi
paykunaqa chaypi kanqaku.
Ovejakunapa chawpinpi malta leon hinaraqmi
paykunaqa chaypi kanqaku.
Animalkunapa chawpinta pasastin
chay leon saruparuptinqa
chaynataq animalkunata tisaparuptinqa
manam pipas atinmanchu libraykuytaqa.
9 Israel casta runakuna,
chaynapunim vencenkichik
contraykichikpi sayariqkunataqa.
Chaynatapunim wañuchinkichik
qamkunapa enemigoykichikkunataqa.
10 Tayta Diosmi nin kaynata:
Chay tiempopiqa chawpikichikpi kaq
caballoykichiktapas wañurachisaqmi.
Chay tiempopiqa chawpikichikpi kaq guerrapaq
carretaykichiktapas chinkarachisaqmi.
11 Llaqtaykichiktapas tuñirachisaqmi.
Llapallan amparakuna wasikichiktapas
ñoqaqa purmarachisaqmi.
12 Qechurusqaykichikmi brujeriaykichiktapas.
Manañam kanqañachu adivinaqkunapas.
13 Chinkarachisaqtaqmi chawpikichikpi kaq
taytacha-mamachakunatapas.
Chinkarachisaqtaqmi chawpikichikpi kaq
adorana rumi pilarkunatapas.
Manañam qonqorakunkichikchu
makikichikwan rurasqaykichikmanpas.
14 Asera sutiyoq mamachaykichiktapas
chawpikichikmantaqa qechurusaqmi.
Qamkunapa chawpikichikpi kaq
llaqtaykichiktapas tuñirachisaqmi.
15 Mana kasukuq nacionkunataqa
castigarusaq sinchi piñakuywanmi.