Israel nacionpa contranpi Dios sayarisqanmanta
6
Uyariychikyá Tayta Diospa nisusqaykichikta:
Hatarispayá orqokunaman willakuychik asuntoykichikta.
Moqokunapas uyarichunyá qamkunapa qayakusqaykichikta.
2 Yaw orqokuna,
ñoqa Tayta Diospa
pleito rurasqaytayá uyariychik.
Wiñaypaq kaq kay pachapa cimientonkuna,
chay pleito rurasqaytayá uyariychik.
Runaykunawanmi pleitota rurachkani
Ñoqa Tayta Diosqa.
Israel castakunawanmi atipanakuchkani
ñoqa Tayta Diosqa.
3 Runaykuna ¿imanarqaykichiktaq qamkunataqa?
¿Imapitaq piñachirqaykichik qamkunataqa?
Tapusqaytayá niwaychik qamkunaqa.
4 Qamkunataqa Egiptomantam horqomurqaykichik.
Servipakuq kasqaykichikmantam libramurqaykichik.
Pusamusunaykichikpaqmi Moisesta,
Aaronta hinaspa
Mariata kachamurqaykichik.
5 Runallaykuna,
qamkunaqa yuyariychikyá
Moab nacionpa reynin Balacpa consejasqanta.
Runallaykuna,
qamkunaqa yuyariychikyá
Beorpa churin Balaampa imam nisqanta.
Yuyariychikyá Sitim sutiyoq lawmanta
Gilgal lawkama risqaykichikta.
Chaynapim yachankichik ñoqa Tayta Diosqa
allin kaqkuna rurasqayta.
Tayta Diospa imam mañakusqanmanta
6 ¿Imawantaq asuykusaq Tayta Diospa ñawpaqninmanqa?
¿Imawantaq adorasaq alto-altopi kaq Diostaqa?
Paymanqa asuykusaq ¿kañanaypaq ofrendakunawanchum?
Paymanqa asuykusaq ¿huk watayoq torokunawanchum?
7 ¿Tayta Diosqa yaqachum kusikunman
waranqa carnerota qoykuptiyqa?
¿Yaqachum payqa kusikunman
chunka waranqa mayu aceiteta qoykuptiyqa?
¿Yaqachum piwi churiytaña qoykuyman
mana kasukuq kasqaymanta?
¿Yaqachum churyasqaytaña qoykuyman
huchallikuq kasqaymanta?
8 Runamasilláy,
Tayta Diosqa nisurqankiñam
allin kaqkunamantaqa.
Mañasurqankiñam qanmanta imam munasqantaqa.
Qamqa allin arreglotam ruranayki.
Qamqa kuyapayakuytam kuyanayki.
Diosnikipaqmi humillakuspa kawsanayki.
9 Yachayniyoq runaqa respetanmi Tayta Diosta.
Tayta Diosqa qayachkanmi llaqtata:
Runaykuna,
castigoymantayá cuentata qokuychik.
Runaykuna,
castigaqmantayá cuentata qokuychik.
10 ¿Mana allin ruraqpa wasinpiqa kachkanraqchum
engañowan qori-qollqe ganasqankuqa?
¿Mana allin ruraqpa wasinpiqa kachkanraqchum
mana cabal tupuq ñakasqa tupunaqa?
11 Huchayoqmi mana cabal balanzayoq runaqa.
Huchayoqmi engañakuq rumi pesayoq runaqa.
12 Kay llaqtapi apu runakunaqa
daño ruraqllañam rikurirunku.
Kay llaqtapi yachaqkunaqa
llulla rimaqllañam rikurirunku.
Kay llaqtapi yachaqkunaqa
nina qallullañam rikurirunku.
13 Chayraykum ñoqaqa castigayta qallaykusqayki.
Huchaykiraykum tuñichiytaña qallaykusqayki.
14 Mikuspapas manam saksankichu.
Yarqasusqaykiqa manam chinkanqachu.
Manam waqaychawaqchu huñukusqaykitapas.
Guerramanmi qoykusaq lluptichisqaykitapas.
15 Tarpuspapas manam qamqa cosechankichu.
Aceitunas chamchasqaykiwanpas manam
untakunkichu.
Uvasta saruspapas manam vinotaqa tomankichu.
16 Rey Omripa decretonkunatam kasukurqanki.
Rey Acab castapa rurasqankunatam rurarqanki.
Paykunapa piensasqanman hinam kawsarqanki.
Chayraykum qamqa purmachisqa kanki.
Chaypi yachaqkunapas asipayasqam kanqa.
Runaykunapa penqayninmi wichiykusunki qanmanqa.