Israel castakunaqa penqaypaq kasqankumanta
7
¡Ay ñoqallayqa rikchakuchkani
trigo rutuypi pallaqllamanñam
otaq uvas pallay tiempopi
uvas pallapakuqllamanñam.
Ichaqa manamya tarinichu
ima uvasllatapas mikuykunaypaqqa.
Ichaqa manamya tarinichu
ima higosllatapas saksaykunaypaqqa.
2 Kay nacionpiqa chinkarunñam kuyapayakuqpas.
Kay nacionpiqa manam kanñachu allin ruraqpas.
Runakunaqa llapallankum wañuchinankupaq
wateqayllapiña purichkanku.
Runamasinta toqllaman wichiykachinankupaqmi
wateqayllapiña purichkanku.
3 Iskaynin makinkupas listollañam
kachkan mana allinta ruranankupaq.
Kamachikuqpas juezmanta reclamaptinmi
juezñataq regalota mañakun.
Reqsisqa runa munasqanta rimariptinmi
paykunañataq “Allinmi” niykun.
4 Paykunamanta kaq allin ruraq runaqa
rikchakun kichkamanmi.
Paykunamanta kaq allin kawsaq runaqa
rikchakun waqrinku kichka qenchamanmi.
Llaqtaykichik cuidaqkunapa willakusqan
punchawqa hamuchkanñam.
Castigasqa kanaykichik
punchawqa hamuchkanñam.
Kunanqariki runakunaqa kachkanku pantayllapiñam.
5 Runamasikichikpipas amayá creeychikchu.
Amistadnikichikmanpas amayá hapipakuychikchu.
Qanwan puñuq warmikimantapas cuidakuyá.
Imam rimasqaykimantapas qamqa cuidakuyá.
6 Qari churipas taytanta despreciaqñam rikurirun.
Warmi wawapas mamanpa contranpim sayarirun.
Llumchuypas suegranpa contranpim sayarirun.
Wasinpi yachaqpas contranpim rikurirun.
7 Ñoqam ichaqa Tayta Diosllapi suyay-suyasaq.
Salvaqniy Diosllapim confianzawan suyallasaq.
Diosniy uyariwananpaqmi ñoqaqa suyallasaq.
Israel castakuna huktawan sayarinankumanta
8 Yaw enemigoy nacion,
amayá kusipayawaychu ñoqataqa.
Wichiykuspapas sayarisaqmi ñoqaqa.
Tutayay ukupiña yachaptiypas
Tayta Diosmi kanchaykuwanqa.
9 Aguantasaqmi Tayta Diospa piñakuynintaqa.
Contranpimiki huchallikuruni ñoqallayqa.
Chay asuntoymanta sayapakuwanankamam aguantasaq.
Allin arreglota rurapuwanankamam aguantasaq.
Payqa achkiymanñam horqoykuwanqa.
Allin rurasqantam qawaykachiwanqa.
10 Enemigoy nacionpas chaytam qawaykunqa.
Penqaypa intuykusqanñam rikurirunqa.
Payqariki kaynatam rimakuwarqa:
“¿Maytaq yupaychasqayki Tayta Diosqa?”
Paytaqa rikuykusaq kikiypuniraqmi.
Saruchikunqapas ñanpi mitu hinaraqmi.
11 Jerusalen llaqta,
murallayki hatarichina tiempom hamuchkanña.
Linderoykikuna hatunyachina tiempom hamuchkanña.
12 Chay tiempopiqa Asiriamantaraqmi hamusunki.
Egipto llaqtakunamantaraqmi hamusunki.
Egiptomantawan Eufrates mayumantam hamusunki.
Hamusunkitaqmi karu-karu lamar qochamantapas.
Chaynataq orqokunapa kananmantapas.
13 Chaywanpas kay pachaqa runankunaraykum
pasaypaq chunnichisqa kanqa.
Runakunapa mana allinlla rurasqanraykum
pasaypaq purmachisqa kanqa.
14 Dios Taytallay,
runaykikunataqa ovejakunata hinayá michiy.
Qampa kaq ovejaykikunataqa qampuniyá michiy.
Montekunapi sapallan kaqtayá michiy.
Sumaqllaña pastokunapi kaqtayá michiy.
Ñawpaq tiempokunapi hinam
Basan law pastokunata mikunqaku.
Ñawpaq tiempokunapi hinam
Galaad law pastokunata mikunqaku.
15 Egipto nacionmanta horqomusqay
punchawpi hinam qawachisqaykichik,
admirakuypaqkunatam qawachisqaykichik.
16 Nacionkunam chayta qawaykuspa penqakurunqaku.
Mana kallpayoqñam rikurirunqaku.
Penqakuymantam siminkutapas tapakunqaku.
Penqakuymantam mana uyarikuqña rikurirunqaku.
17 Paykunaqa culebrakuna hinañam
pulvota llaqwanqaku.
Qasqonpa puriq animalkuna hinañam
polvota llaqwanqaku.
Paykunaqa amparakunanku wasinkumantapas
mancharisqallañam lloqsimunqaku.
Yupaychasqanchik Tayta Diosraykum manchakunqaku.
Chayraykum payta respetanqaku.
Runankunata Tayta Dios pampachasqanmanta
18 ¿Yaqachum pipas kanman qam hina Diosqa?
Mana allin ruraqtapas
pampachaykunkim qamqa.
Kay puchuq runaykikunapa
mana kasukusqantapas
qonqaykunkim qamqa.
Manam wiñaypaqchu piñakurqankipas.
Qamqa kuyapayakuytam munankipas.
19 Ñoqaykumantam huktawan llakipayarikunki.
Qamqa mana allin rurasqaykutapas
mana kaqmanñam churarunki.
Qamqa llapachallan huchaykutapas
uku lamar qochamanmi wischuykunki.
20 Cumplinkipunim Jacobman prometesqaykitaqa.
Cumplinkimá Abrahampaq kuyapayakuynikitaqa.
Ñawpa tiempokunamantaraqmi abueloykuman
jurarqanki chaykunataqa.