Nacionkunata Tayta Dios hawkayachinanmanta
(Mi 4:1-3)
2
Amozpa churin Isaiasman revelacionninpi Tayta Dios rimapayaykuptinmi Juda nacionmantawan Jerusalen llaqtamanta nirqa:
2 Tukupay tiempokunapim Tayta Diospa templonpa kasqan orqoqa
wakin orqokunamantapas altosuraq kanqa.
Wakin alto moqokunamantapas aswan hatunchasqam kanqa.
Chay orqomanmi rinqaku llapallan nacion runakunaqa.
3 Nana-nanaq nacion runakunam hamunqaku.
Hinaspam paykunaqa kaynata ninqaku:
“Hakuchikyá risunchik Tayta Diospa orqonman,
Risunchikyá Jacobpa Diosninpa templonman.
Paymi yachachiwasun paypaq hina kawsanapaq.
Yachachiwasunchikmi paypa munasqanman hina kawsanapaq.
Sion Moqomantam Tayta Diospa yachachikuynin lloqsimunqa.
Jerusalen llaqtamantam Tayta Diospa palabran lloqsimunqa.
4 Tayta Diosmi juzganqa nacionkunata.
Paymi arreglanqa nana-nanaq runakunapa asuntonkunata.
Paykunaqa espadankutapas rejakunamanñam tikrarunqaku.
Paykunaqa lanzankutapas rutunakunamanñam tikrarunqaku.
Manañam nacionpurapas peleanqakuñachu.
Guerrapaqpas manañam yachanqakuñachu.
5 Jacobpa castankuna,
risunchikyá.
Purisunchikqa Tayta Diospa kanchayninpiyá.
Orgulloso runakuna castiganamanta
6 Dios Taytáy,
runaykikunatam saqerurqanki.
Dios Taytáy,
Jacobpa castankunatam saqerurqanki.
Intipa lloqsimunan lawpi brujeriakunawan huntasqam kachkanku.
Filistea llaqtakunapi musyaqkuna hinam rurachkanku.
Forastero runakunawanmi hukllawakurunku.
7 Kay nacionqa qori-qollqewan huntasqam kachkan.
Nana-nanaq riquezakunawan huntasqam kachkan.
Kay nacionqa caballokunawan huntasqam kachkan.
Nana-nanaq carretakunawan huntasqam kachkan.
8 Kay nacionqa taytacha-mamachakunawan
huntasqam kachkan.
Kay nacionqa makinkupa rurasqankutam adorachkan.
9 Wakcha runakuna humillakuptinpas
ama pampachaychu.
Reqsisqa runakuna humillakuptinpas
ama pampachaychu.
10 Runakunaqa qaqakunamanmi yaykunqa.
Paykunaqa allpa ukukunapim pakakunqa.
Tayta Diospa mancharikuypaq qayllanmantam pakakunqa.
Tayta Diospa hatun kayninpa kanchariyninmantam pakakunqa.
11 Hatun tukuq runakunam humillakunqa.
Orgulloso runakunam kumuykunqa.
Chay tiempopiqa Tayta Diosllam hatunchasqa kanqa.
12 Llapallan Kamachiq Tayta Diospa chaykuna rurasqan tiempopim
alto tukuqkunatawan orgullosokunata humillachinqa.
Hatunchakuq runakunatam humillachinqa.
13 Humillachinqamá Libano Orqopi
cedro sachakuna hina llapallan hatunchakuq orgullosokunata.
Humillachinqamá Basan lawpi
encina sachakuna hina kallpasapa tukuqkunata.
14 Humillachinqamá hatun orqokuna hina
llapallan hatunchakuqkunata.
Humillachinqamá alto moqokuna hina
llapallan hatunchakuqkunata.
15 Hatun torrekuna hina
hatunchakuqkunatam humillachinqa.
Mana yaykuy atina murallakuna hina
kaqkunatam humillachinqa.
16 Negocio ruraq buquekuna hina
kaqkunatam humillachinqa.
Suma-sumaq buquekuna hina
kaqkunatam humillachinqa.
17 Hatun tukuq runakunam humillakunqa.
Orgulloso runakunam kumukuykunqa.
Chay tiempopiqa Tayta Diosllam hatunchasqa kanqa.
18 Pasaypaqtam taytacha-mamachankuqa chinkanqa.
19 Kay pachata katkatatachinanpaqmi
Tayta Dios rikurimunqa.
Tayta Diospa mancharikuypaq qayllanmantam
runakuna pakakunqa.
Tayta Diospa hatun kayninpa kanchariyninmantam
pakakunqaku.
Qaqapi machaykunamanmi yaykunqaku.
Allpapi uchkukunamanmi ustunqaku.
20 Chay tiempopim runakuna
qori-qollqemanta taytacha-mamachankuta wischunqa.
Topo nisqanku animalpa kasqanmanmi chaykunata wischunqa.
21 Kay pachata katkatatachinanpaqmi Tayta Dios rikurimunqa.
Tayta Diospa mancharikuypaq qayllanmantam runakuna pakakunqa.
Tayta Diospa hatun kayninpa kanchariyninmantam pakakunqaku.
Qaqapi raqrakunamanmi yaykunqaku.
Orqopa raqrankunamanmi ustunqaku.
22 Ama confiakuychikchu samayllawan kawsaq runapiqa.
¿Imapaqtaq valen samayllawan kawsaq runaqa?