Juda nacionpiwan Jerusalen llaqta castigasqa kananmanta
3
Sumaqta qawariychik,
Llapallan Kamachiq Señor Diosmi qechusunkichik.
Jerusalen llaqtaman tukuy ima apamuqkunatam
qechusunkichik.
Juda nacionman tukuy ima apamuqkunatam
qechusunkichik.
Mikunaykichikpaq kaqtawan tomanaykichikpaq yakutam
qechusunkichik.
2 Qechusunkichiktaqmi valeroso runakunatawan
guerrapi peleaqkunatapas.
Qechusunkichiktaqmi juezkunatawan
Diosmanta willakuqkunatapas.
Qechusunkichiktaqmi musyaqkunatawan
anciano autoridadkunatapas.
3 Qechusunkichiktaqmi capitankunatawan
reqsisqa runakunatapas.
Qechusunkichiktaqmi consejaqkunatawan
sumaq ruraq maestrokunatapas.
Qechusunkichiktaqmi suerte tikraqkunatapas.
4 Paykunapa rantinpim Tayta Dios churanqa
mozokunataña jefekichikpaq.
Paykunapa rantinpim churanqa
warmakunataña munaychakusunaykichikpaq.
5 Runakunam kikinkupura ñakarichinakunqaku.
Sapakamam runamasillanta ñakarichinqaku.
Warmakunam hatarinqa yuyaqkunapa contranpi.
Despreciasqa runakunam hatarinqa
reqsisqa runakunapa contranpi.
6 Wakinmi taytanpa castan wawqellanta hapiruspan ninqa:
“Qampaqa pachayki kachkanraqmi
chaynaqa kamachiwayku” nispa.
“Qamyá kay purmachisqa llaqtata
gobiernay” nispa.
7 Payñataqmi hapiqninta contestanqa:
“Ñoqaqa manam atiymanchu arreglayta” nispa.
“Manam wasiypiqa kanchu
mikunaypas nitaq pachaypas” nispa.
“Ama churawaychikchu runakuna kamachiqpaqqa” nispa.
8 Ciertopas Jerusalen llaqtaqa
mitkaq runa hina tuñichisqañam.
Ciertopas Juda nacionqa vencesqañam.
Chaypi yachaqkunam Tayta Diospa contranpi rimanku.
Tayta Diospa contranpim mana kasukuspa kawsanku.
Tayta Diospa kanchariyninpa qayllanpim ruranku.
9 Sutillam rikchayninku paykunataqa acusachkan.
Sodoma llaqta huchan willakuchkaq hinam willakuchkan.
Mana pakayta atiptinkum sutilla kachkan.
¡Ay,
imaynaraq paykunaqa kanqaku!
Paykunaqa kikillankum castigonta apamunqaku.
10 Niychik allin ruraqkunata:
“Allinmi kasunki” nispa.
“Allinkuna rurasqaykimantam mikunki” nispa.
11 ¡Ay,
mana allin ruraq runaqa imaynaraq kanqa!
Mana allin rurasqankunaman hinam Tayta Dios paganqa.
12 Warmakunallam runaykunataqa ñakarichichkan.
Warmikunañam runaykunataqa gobiernachkan.
Runallaykuna,
kamachisuqnikichikkunaqa
pantaypim kawsachisuchkankichik.
Runallaykuna,
kamachisuqnikichikkunaqa
allin kawsasqaykichikmantam pantachisuchkankichik.
13 Tayta Diosqa listom kachkan runakunata pleiteananpaq.
Payqa chayllam kachkan runakunata juzgananpaq.
14 Tayta Diosmi pleiteanqa runankunapa autoridadninkunata.
Tayta Diosmi pleiteanqa runankunapa jefenkunata.
Paykunatam ninqa:
Qamkunaqa uvas huertaytam
tukururqankichik,
nispa.
15 Llapallan Kamachiq Señor Diosmi nin kaynata:
¿Ima derechoykichikwantaq ñakarichinkichik runaykunata?
¿Ima derechoykichikwantaq maqankichik wakchakunata?
Jerusalen llaqtapi warmikunata castigananmanta.
16 Tayta Diosmi nin:
Sion llaqtapi orgullosa warmikunata,
umankuta altoman hoqariruspan puriqkunata,
ñawinkuwan qarikunata engañananpaq qawaqkunata,
ñutuchallamanta purispanku salsalyachiqkunata,
chakinkupa adornonkunata salsalyachistin puriqkunata.
17 Ñoqa Señor castigaspaymi
paykunapa uma puyukninta sarnayachisaq.
Chay warmikunapa penqayninkutam runakunaman qawachisaq.
18 Chay punchawmi Señorqa adornonkuta chinkachinqa.
Chakinkupi salsalyaq adornotam Señorqa chinkachinqa.
Llullu killaman rikchakuq collarninkutam chinkachinqa.
19 Chinkachinqam chay warmikunapa aretenkutapas.
Chinkachinqam brazaletenkutawan uya tapankutapas.
20 Chinkachinqam uma wankunkutawan chaki watanankutapas.
Chinkachinqam weqaw watana chumpinkutapas.
Chinkachinqam perfumenkunatawan waylurninkutapas.
21 Anillonkutawan senqanpi aretenkutam chinkachinqa.
22 Suma-sumaq qoysu pachankutawan
mantontam chinkachinqa.
Capankutawan carterankutam chinkachinqa.
23 Espejonkutawan linomanta
fino pachankutam chinkachinqa.
Uma wanki adornonkutawan
mantillankutam chinkachinqa.
24 Chayraykum perfumepa rantinpi
millakuypaq asnayña kanqa.
Weqaw watakunankupa
rantinpim waskaña kanqa.
Sumaqllaña ñaqchasqa kanankumantam
umankupas paqlayasqaña kanqa.
Suma-sumaq pachankupa rantinpim
luto pachaña kanqa.
Kuyayllapaq uyankupipas
caldeasqa fierrowan marcallañam kanqa.
25 Runaykikunam guerrapi wañunqaku.
Valeroso soldadoykikunam peleaspa wañunqaku.
26 Llaqtapi runakunam waqaspa lutokunqaku.
Saqesqa warmi hinam allpapi tiyanqaku.