4
Chay tiempopim qanchis warmikuna
chullalla qarita hapispa ninqaku:
“Ñoqaykuqa kikiykum mantienekusaqku.
Ñoqaykuqa kikiykum pachakusaqku.
Qosayku hinañayá kaykuy
apellidoykita apanaykupaq,
chaynapi mana qosayoq hina
amaña penqaypi kanaykupaq.”
Hamuq tiempokunapi Jerusalen llaqta hawkayaypi kananmanta
2 Chay tiempopiqa Tayta Diospa ikllichisqan planta hinam
huk runaqa kanqa.
Suma-sumaq allin reqsisqa planta hinam
chay runa kanqa.
Allpankupi cosechasqankum alabakunankupaq
suma-sumaq kanqa.
Israelpa mirayninkunamanta lluptiqkunapa
alabakunanpaqmi kanqa.
3 Sion llaqtapi saqesqakunatam
Tayta Diospaq sapaqchasqawan sutichanqaku.
Jerusalen llaqtapi puchuqkunatam
Tayta Diospaq sapaqchasqawan sutichanqaku.
Jerusalen llaqtapi kawsaspa listasqakunatam
Tayta Diospaq sapaqchasqawan sutichanqaku.
4 Castigananpaq Espiritunwan sentenciaspanmi,
castigananpaq nina hina Espiritunwan rimaspanmi
Señorqa Sion llaqtapi warmikunapa qachankunata mayllanqa.
Jerusalen llaqtapi wañuchisqankumantam yawarta mayllanqa.
5 Sion Moqopa tukuy hawanmanmi,
chaypi huñunasqakunapa hawanmanmi
punchawpi rikurichispa mastarinqa yanay-yanay puyuta.
Tutanñataqmi churanqa kanchariq lenguachkaq ninata.
Chay achkiriyninmi toldo hina kanqa.
Llapallankupa hawanpim toldo hina kanqa.
6 Paykunataqa ramada hinam harkanqa.
Punchawpi rupaymantam llantuykunqa.
Paramantawan sinchi wayramantam harkaykunqa.