Juda nacionta uvas huertaman rikchanachisqanmanta
5
Ancha kuyasqay amistadniypaqmi takisaq.
Uvas huertanmanta rimaspaymi takisaq.
Ancha kuyasqay amistadniypam
uvas huertan kapurqa.
Tukuy imapa qespinan waqtapim
huertan kapurqa.
2 Sumaqta barbecharuspanmi
ruminkunata rumicharurqa.
Miski ruruq uvas estacatam plantarurqa.
Cuidananpaqmi chakrapa chawpinpi
markayoq chukllata rurarachirqa.
Uvas sarunapaq pozotam rurarurqa.
Miski uvas rurunantam payqa suyarqa
aswanqa puchqo uvasllatam rurururqa.
3 Chaynaqa Jerusalen llaqtapi yachaqkuna,
niwaychik,
ninmi Tayta Dios.
Chaynaqa Juda nacionpi yachaqkuna juzgaychik,
ninmi Tayta Dios.
¿Uvas huertachu causa karqa
chayna kananpaq?
¿Icha ñoqachu causa kani
uvas huertay kayna kananpaq?
4 ¿Imakunataraqtaq rurayman karqa uvas huertaypaq?
¿Icha imaraqmi faltawan uvas huertaywan ruranaypaq?
Miski uvas rurunantam suyarqani ñoqaqa.
¿Imaynanpimá puchqo uvastaqa wayururqaqa?
5 Chaynaqa kunanmi qamkunaman
imam ruranayta nisqaykichik.
Uvas huertaywan imam ruranaytam
kunan nisqaykichik.
Llapa cerconta paskaruptiymi
purmarachinqaku.
Perqankunata lliw tuñirachiptiymi
saruparunqaku.
6 Purmarachispaymi saqerusaq.
Manaña podanankupaq nitaq qoranankupaqmi rurarusaq.
Cardokunawan kichkakunawanmi huntarachisaq.
Uvas huertayman mana paramunanpaqmi kamachisaq.
7 Llapallan Kamachiq Tayta Diospa uvas huertanqa
Israel casta runakunam.
Sumaqllaña paypa plantankunaqa
Juda nacionpi yachaqkunam.
Paykunamantam allin arreglokuna ruranankuta suyarqa,
aswanqa wañuchinakuyllatam payqa qawarqa.
Paykunamantam allinkuna ruranankuta suyarqa,
aswanqa ñakariqkunapa qapariyllantam uyarirqa.
Mana allin ruraqkuna castigasqa kananmanta
8 ¡Ay,
imaynaraq kankichik,
wasikichikman wasikunapas yapaqkuna!
¡Ay,
imaynaraq kankichik,
chakraykichikman chakrakunapas yapaqkuna!
¿Qamkunallañachu kay allpapi yachayta munankichik?
¿Runamasikichikpaqqa manañachum sitiota puchunkichik?
9 Llapallan Kamachiq Tayta Diosmi juraspan niwarqa:
“Achka-achka wasikunam tuñichisqa kanqa.
Hatunnin suma-sumaq wasikunam mana runayoq chunninqa.
10 Chunka yuntayoq huertamantam
horqonqaku yaqa urpu vinollata.
Chunka costal muhumantam
cosechanqaku chulla costallata.”
11 ¡Ay,
imaynaraq kankichik,
tutapayta hatarispa upyakuqkuna!
¡Ay,
imaynaraq kankichik,
sinchi tutakama machakuqkuna!
12 Taksa arpawan,
hatun arpawan fiesta ruraqkunaqa,
tinyawan,
qenawan,
achka vinowan fiesta ruraqkunaqa
manam qawarinkuchu
Tayta Diospa rurasqanta.
Manam cuentata qokunkuchu
paypa unanchasqankunamanta.
13 Chayna runaykunam huklaw nacionman
presochasqa rinqaku.
Paykunamanta reqsisqa runakunam
yarqaymanta wañunqaku.
Llapallan runakunam
yakumanta chakirunqaku.
14 Chayraykum wañuqkunapa kasqan sitiopas
yarqaymanta hinaraq kicharinqa simintapas,
chaynapi runankunatawan reqsisqa
runankunata millpurunanpaq,
fiestakunapi kaqkunatawan
aychanku kusichiyllapi kaqkunata millpurunanpaq.
15 Chayraykum wakcha runakuna humillakunqa.
Chayraykum reqsisqa runakuna kumukuykunqa.
Orgulloso runakunapas penqaypitaqmi rikurinqa.
16 Aswanqa Llapallan Kamachiq Tayta Diosmi
allin arreglo rurasqanwan hatunchakunqa.
Chuya Diosmi allinkuna rurasqanwan
chuya kasqanta reqsichikunqa.
17 Hinaptinmi ovejakuna echaderonkupipas
mikunqaku.
Apukunapa purmasqa chakrankunapipas
llutanpi puriq ovejakunañam mikunqaku.
18 ¡Ay,
imaynaraq kankichik
watuwan chutachkaq hina
llullakuspa mana allin ruraykunata pusamuqkuna!
¡Ay,
imaynaraq kankichik
carreta aysana waskawan aysachkaq hina
huchata pusamuqkuna!
19 Qamkunam ninkichik:
Diosqa apurawmanñayá
tukuchun ruranankunata qawananchikpaq,
nispa.
Israelpa chuya Diosninqa tanteasqankunatayá
chaylla cumplichun reqsinanchikpaq,
nispa.
20 ¡Ay,
imaynaraq kankichik
mana allinta allinmi niqkuna!
¡Ay,
imaynaraq kankichik
allin kaqta mana allinmi niqkuna!
Qamkunaqa achkiytam
tutayaypaq hina hapinkichik.
Qamkunaqa tutayaytam
achkiypaq hina hapinkichik.
Qamkunaqa qatqetam
miskipaq hina hapinkichik.
Qamkunaqa miskitam
qatqepaq hina hapinkichik.
21 ¡Ay,
imaynaraq kankichik
kikillaykichikpaq yachaysapa tukuqkuna!
¡Ay,
imaynaraq kankichik
kikillaykichikpaq entiendeq tukuqkuna!
22 ¡Ay,
imaynaraq kankichik
vino tomanaykichikpaq qari tukuqkuna!
¡Ay,
imaynaraq kankichik
machachikuq vino preparaypi mana masyachikuqkuna!
23 Qamkunaqa qollqeta chaskikuykuspam
mana allin ruraq runata
mana huchayoqta hina kachaykunkichik.
Qamkunaqa qollqeta chaskikuykuspam
allin ruraq runapa derechonkunata qechunkichik.
24 Imaynam qopata nina ratulla ruparun,
imaynam chaki pasto
lenguachkaq ninaman wichiykurun,
chaynam qamkunapas sapinmanta
tukusqa hina kankichik.
Chaynam qamkunapas wayrapa apasqan
chaki wayta hina tukusqa kankichik.
Llapallan Kamachiq Tayta Diospa yachachisqankunata
mana kasukusqaykichikraykum chaynaqa kankichik.
Israelpa Chuya Diosninpa kamachisqankunata
despreciasqaykichikraykum chaynaqa kankichik.
25 Chayraykum runankunapa contranpi
anchata Tayta Dios piñakurun.
Chayraykum atiyninwan paykunata
Tayta Dios castigarun.
Chaynapim orqokuna katkatatarqa.
Paykunamanta wañuqkunam
wanu hina callekunapi wischurayarqa.
Chaywanpas payqa hinallam
atiyninwan castigananpaq kachkan.
26 Tayta Diosqa karupi kaq nacionkunapaqmi
banderata sayachin.
Silbachkaq hinam kay pachapa cantonmanta
paykunata hamuchin.
Chayllam paykuna pasamunku.
Apurawllamanñam chayaramunku.
27 Paykunamantaqa manam mayqanninpas pisipamunchu.
Paykunamantaqa manam mayqanninpas mitkamunchu.
Manam mayqanpas puñutyanqachu nitaq puñunqachu.
Manam mayqanpa chumpinpas paskakamunchu.
Manam mayqanpa usutanpa watullanpas tipimunchu.
28 Ñawchiy-ñawchiymi flechankupas.
Suma-sumaq estirasqañam flechanankupas.
Rumi hinaraqmi caballonkupa casconpas.
Remolino wayra hinaraqmi carretankupa ruedankunapas.
29 Qapariyninkupas leonpa qapariynin hinaraqmi.
Qaparinkupas malta leonpa qapariyninta hinaraqmi.
Qaparispam leonqa
mikunanpaqpas hapin.
Mana pipapas qechusqantam
seguro sitioman kallpachin.
30 Citasqa punchaw chayaramuptinmi
Chay nacionkunamanta hamuqkunaqa qaparinqa.
Israel nacionpa contranpim
lamar qochapa qaparisqanta hina qaparinqa.
Pipas Israel nacionta qawarispaqa
tutayaypa tapaykusqanta hinam
sasachakuyllapi kasqanta qawarinqa.
Achkiynintapas yana puyupa
tutayachisqanta hinam
sasachakuypi kasqanta qawarinqa.