Isaiasta Tayta Dios akllasqanmanta
6
Rey Uziaspa wañukusqan watapim ñoqa rikurqani Tayta Diosta alto-alto tiyananpi tiyachkaqta chaynataq pachanpa patankunapas temploman huntaykuqta.
2 Tayta Diospa altonpiñataqmi kachkasqa Serafin nisqanku angelkuna sapakama soqta raprayoq.
Iskay raprankunawanmi uyankuta tapakuqku,
iskay raprankunawanñataqmi chakinkuta tapakuqku,
iskay raprankuwanñataq pawaqku.
3 Paykunam qaparispa ninakuqku:
Chuyam,
chuyam,
chuyam
Llapallan Kamachiq Tayta Diosqa.
Atiyninwan huntasqam
kachkan llapallan kay pachaqa.
4 Chayna qaparisqanwanmi punkupa pilarninkunapas katkatatarqa,
templomanñataqmi qosnipas huntarirqa.
5 Hinaptinmi nirqani:
—¡Imaynaraq kasaq!
Kunanqa wañurusaqmi.
Mana allin rimaq runa kachkaspaymi chaynataq mana allin rimaq runakunawan yachachkaspaymi kunan rikuruni Llapallan Kamachiq Rey Tayta Diosta —nispa.
6 Hinaptinmi serafinwan sutichasqa angel altarmanta nina sansata tenazawan horqoramuspa ñoqapa lawman pawamurqa.
7 Chaywan simiyman tupaykachiwaspanmi niwarqa:
Kunanmi simikita kay sansa tupaykurun.
Mana allinkuna rurasqaykitam qechurun.
Huchaykikunapas pampachasqañam karun.
8 Chaymantam uyarirqani Señor Diospa kayna nisqanta:
—¿Pitataq kachasaq?
¿Pitaq willakamunqa ñoqaykumanta?
—nispa.
Chaymi ñoqa nirqani:
—Kayqaya ñoqa kaypi kachkani —nispa
Chaymi ñoqa nirqani:
—Ñoqatayá kachaway —nispa.
9 Paymi runakunaman nimunaypaq kaynata niwarqa:
Allinta uyarichkaspapas manam entiendenkichikchu.
Sumaqta qawachkaspapas manam yachankichikchu.
10 Sonsoyachiy kay runakunapa yuyaymanayninta.
Upayachiy kay runakunapa rinrinta.
Ñawsayachiy kay runakunapa ñawinta,
chaynapi mana rikunankupaq,
chaynataq mana uyarinankupaq,
chaynataq mana entiendenankupaq,
chaynapi mana wanakunankupaq,
chaynapi huchankuta mana pampachanaypaq.
11 Chaymi ñoqa tapurqani kaynata:
—¿Haykapikamataq chaynaqa kanqa Señor Diosllay?
—nispa.
Payñataqmi niwarqa:
Llaqtakuna chunnichisqa mana runayoq kanankamam.
Wasikunapi manaña runapas kanankamam.
Chakrakunapas purmachisqa kanankamam.
12 Runakunata karuman pusachinaykamam.
Kay nacionpas pasaypaq chunninankamam.
13 Llapa runakuna sapa chunkamanta
hukllaña puchuruptinpas
huktawanmi chinkachisqa kanqaku paykunapas.
Encina sachata kuchuruptinku
kullullanña puchuruq hinam kanqaku.
Roble sachata kuchuruptinku
kullullanña puchuruq hinam kanqaku.
Chaywanpas ikllimunqam chay kulluqa.
Chay kullumanta ikllimuqmi Tayta Diospaq sapaqchasqa kanqa.