Rey Acazman Isaiaspa willasqanmanta
7
Jotampa churin otaq Uziaspa willkan Rey Acaz Juda nacionpi gobiernaptinmi Aram nacionpa reynin Rezinwan Israel nacionpa reynin Peka Jerusalen llaqtata atacarqaku,
ichaqa manam venceyta atirqakuchu.
Chay Rey Pekaqa karqa Remaliaspa churinmi.
2 Chayna sucedesqanmantam willamurqaku Rey Davidpa castan Rey Acazman chaynataq ayllunkunamanpas kaynata nispanku:
—Aram nacionmanta tropakunam huñunakurunku Efrain castakunawan —nispa.
Hinaptinmi Rey Acaz runankunapiwan katkatatarqaku montepi wayrapa kuyuchisqan sachakuna hinaraq.
3 Chaymi Tayta Dios nirqa Isaiasta:
—Churiki aSear-jasubwan kuska lloqsiy Rey Acazwan tupanaykichikpaq.
Paywanmi tupamunkichik hanay lawpi estanqueman hamuq yarqapa hichpanpi.
Chay estanquem kachkan Taqsaq Runapa Chakranman riq ñanpa hichpanpi.
4 Paytam ninki:
“Cuidakuy ichaqa ama manchakuychu,
ama sustochakuychu nitaq hukmanyaychu
chay iskay qosniq yanta hina runakunaraykuqa,
otaq Aram tropakunawan Rezinpa
rupariq nina hina rabiasqanraykuqa
chaynataq Remaliaspa churin Pekapa
rabiasqanraykuqa.
5 Aram runakunaqa,
Efrain castakunaqa
chaynataq Remaliaspa churin Pekaqa
llapallankum contraykipi kachkanku.
Mana allinta rurasunaykipaqmi rimanakurunku:
6 ‘Juda nacionta atacaramusunchik.
Paykunata mancharirachimusunchik.
Venceramuspa partinakaramusunchik’ nispa.
‘Rey kananpaq Tabeelpa churinta churaramusunchik.’
7 Ichaqa Tayta Diosmi nin:
‘Chay piensasqankuqa manam rurakunqachu.
Chay rimasqankuqa manam sucedenqachu.
8 Damasco llaqtaqa Aram nacion gobiernaq llaqtam.
Damasco llaqtaqa Rey Rezinpa gobiernanan llaqtam.
Soqta chunka pichqayoq watamantam
Efrain casta otaq Israel nacionqa
manaña nacion kanankama chinkachisqa kanqa.
9 Samaria llaqtaqa
Efrain casta otaq Israel nacion gobiernaq llaqtam.
Samaria llaqtaqa
Remaliaspa churin Pekapa gobiernanan llaqtam.
Sichu qamkunapas mana ñoqapi confiakuspaqa
manam takyankichikchu unaypaqqa.’ ”
Emanuelpa nacemunanmanta
10 Huktawanmi Tayta Diosqa Rey Acazta rimapayaspan nirqa:
11 —Mañaway ñoqa Tayta Diosta señalta hina milagrota ruranaypaq.
Uku-ukukunapi ruranaypaq otaq alto-altokunapi ruranaypaq mañaway —nispa.
12 Hinaptinmi Rey Acazñataq nirqa:
—Manam milagro ruranantaqa mañasaqchu nitaqmi Tayta Diostaqa pruebasaqchu —nispa.
13 Chaymi Isaias payta nirqa:
Rey Davidpa castanmanta kaqkuna,
kaytayá uyariychik:
¿Yanqallapaqchu rikchakapusunkichik
runakunata piñachiynikichik?
¿Chaychum Diosniytapas piñachiyta munankichik?
14 Chaynaqa kikin Tayta Diosmi milagrota
ruraspan qosunkichik señalta:
Doncella sipasmi wiksayakuruspan
wachakunqa qari wawata.
“bEmanuel” nispam sutichanqa chay wawata.
15 Mana allin kaqta mana chaskinanpaq
chaynataq allin kaqta akllananpaq
cuentata qokuspanñam
llukllutawan mielta mikunqa.
16 Mana allin kaqta mana chaskinanpaq
chaynataq allin kaqta akllananpaq
manaraq warma cuentata qokuchkaptinmi
saqesqa kanqa cheqnisqayki chay iskay reykunapa nacionninkunaqa.
17 Tayta Diosmi mana allin punchawkunata
contraykipi kachamunqa.
Runaykikunapa contranpim
chay punchawkunata kachamunqa.
Abueloykikunapa castankunapa
contranpim kachamunqa.
Juda nacionmanta Israel nacionpa
rakikusqan punchawmantapas
chay punchawkuna hinaqa
manam kanqachu haykapipas.
Asiria nacionpa reyninta pusachimuptinmi
chayna mana allin punchawkuna hamunqa.
18 Chay tiempopim Tayta Dios silbariq hina qayamunqa.
Chuspikunata hinam Egipto nacionpi kaqkunata pusamunqa.
Egipto Mayupa waklawninpi yachaqkunatam pusamunqa.
Abejakunata hinam Tayta Dios pusamunqa.
Asiria nacionpi yachaqkunatam pusamunqa.
19 Chayaramuspankum uku-uku wayqokunapi tiyarunqaku.
Qaqakunapa raqrankunapim tiyarunqaku.
Kichka-kichka ukupim tiyarunqaku.
Animalkunapa tomanan pukyukunapim tiyarunqaku.
20 Chay tiempopim Israel runakunata
Señor Dios navajawan hina rutuchinqa.
Eufrates Mayupa waklawninmantaraq
alquilamusqan navajawan hinam rutuchinqa.
Paqlayachinqamá Israel runakunapa umanta.
Rutunqamá chakinkupa pelonkunata.
Rutunqamá paykunapa barbankunata.
21 —Chay tiempopi vaca uywaqpaqwan iskay ovejakuna hatalliqpaqmi
22 leche achkallaña kapunqa llukllutapas mikunankama.
Chay nacionpi wañunankumanta llapallan puchuqkunam mikunqaku llukllutawan mielta.
23 Chay tiempopim waranqa uvas plantakunapa wiñanan otaq waranqa qollqepa chanin huerta tikrakunqa kichkakunapa chaynataq cardokunapa wiñanan chakramanña.
24 Chay huertamanmi runakuna yaykunqa flechakunawan chaynataq flechananku armakunawan,
chay llapallan allpapi kichkakunawan cardokunallaña wiñasqanrayku.
25 Kichkakunatawan cardokunata manchakuspankum manaña pipas yaykunqachu azadonwan ñawpaq llamkananku moqokunamanqa.
Chay chakrakunaqa servinqa bueyeskunata qaykunallankupaqñam chaynataq ovejakuna sarutyanallanpaqñam.