Isaiaspa churinkuna rikchanachiypaq kasqankumanta
8
Tayta Diosmi niwarqa:
—Hatun tablapi qellqay runapa leey atinan letrakunawan “aMaher-salal-hasbaz” niq palabrakunata.
2 Chaytam ruranki sacerdote Uriaspa qayllanpi chaynataq Jeberequiaspa churin Zacariaspa qayllanpipas.
Paykunatam allin testigoykunapaq churani —nispa.
3 Chaymantam karqani warmiywan hinaptinmi wiksayakuruspan wachakururqa qari wawata.
Chaymi Tayta Dios niwarqa:
—Chay wawata sutichay Maher-salal-hasbaz sutiwan.
4 Manaraq chay wawa “taytay” otaq “mamay” nispa rimayta yachachkaptinmi Damasco llaqtapa qori-qollqentawan Samaria llaqtapa qori-qollqenta Asiria nacionpa reynin qechunqa.
5 Yapatawanmi Tayta Dios rimapayawaspan niwarqa:
6 Aram nacionpa reynin Rezinrayku kusikuspanku,
Remaliaspa churin Rey Pekarayku kusikuspanku
qasillalla kallpaq yakuta kay runakuna wischupakusqankuraykum,
otaq Siloe yakuta kay runakuna wischupakusqankuraykum
7 ñoqa Señor Dios paykunata tuyturachisaq.
Lloqlla hina llimparichkaq Eufrates Mayuwanmi tuyturachisaq,
otaq ancha atiyniyoq Asiria nacionpa reyninwanmi vencerachisaq.
Paymi tukuy patankunaman
llimparichkaq mayu hina tuyturunqa.
Paymi tukuy patankunaman
pullqaruchkaq mayu hina tuyturunqa.
8 Juda nacionman pasaspanmi lloqlla hina lliw aparunqa.
Runakunapa kunkankamaraq hayparuchkaq hinam tuyturunqa.
Anka pawaspan raprankunata mastarichkaq hinam taparunqa.
Yaw Emanuel,
llapallan allpaykitam taparunqa.
9 Nacionkunamanta runakuna,
guerrapaq qaparispayá desgraciapi rikuriychik.
Karu nacionpi llapallan runakuna,
kayta uyariychik:
Armaykichikta alistakuspapas desgraciapim rikurinkichik.
Arí,
chaynata ruraspaykichikpas desgraciapim rikurinkichik.
10 Tanteanakuptikichikpas manam rurasqachu kanqa
ñoqaykuwan Dios kasqanrayku.
Rimanakuptikichikpas manam cumplisqachu kanqa
ñoqaykuwan Dios kasqanrayku.
Tayta Dioslla respetanamanta
11 Tayta Diosmi segurota hapiykuwaspan kunawarqa kay runakunapa kawsasqanman hina ama kawsanaypaq.
Kaynatam pay niwarqa:
12 —Kay runakunam nichkanku:
“Gobiernopa contranpim hoqarikuchkanku” nispa.
Amam qamkunaqa chaynataqa ninkichikchu.
Paykunapa respetasqantaqa amam respetankichikchu nitaqmi manchakunkichikchu.
13 Llapallan Kamachiq ñoqa Tayta Dios chuya Dios kasqaytayá reqsiychik,
ñoqallatayá respetawaychik,
ñoqallatataqyá manchakuychikpas.
14 Ñoqam kasaq santuario.
Israel casta iskaynin nacionkunapaqmi ichaqa kasaq mitkana rumi hina hinaspa urmachikuq hatun rumi hina.
Jerusalen llaqtapi yachaqkunapaqmi kasaq toqlla hina chaynataq trampa hina.
15 Achkaqmi mitkaruspa wichiykunqaku hinaspa ñutupasqa kanqaku.
Achkaqmi chay toqllaman wichiykuspanku presochasqa kanqaku —nispa.
Discipulonkunata Isaias kunasqanmanta
16 Allinta waqaychaspa sellowan hina
seguraychik ñoqapa willasqayta.
Allinta waqaychaychik discipuloykuna ukupi
yachachisqaykunata.
17 Runankunata Tayta Dios manaña favoreceptinpas
ñoqaqa paypim suyasaq.
Jacobpa mirayninkunata manaña favoreceptinpas
ñoqaqa paypim hapipakusaq.
18 Ñoqaqa Tayta Diospa qowasqan churiykunapiwanmi
Israel nacionpi señalpaq milagro hina churasqa kachkaniku.
Sion llaqtapi yachaq Llapallan Kamachiq Tayta Diosmanta
señalpaq milagro hina churasqam kachkaniku.
19 Runakunaqa segurom nisunkichik:
Espiritistakunata qayakuychik.
Wachachachaspa upallallamanta rimaq
espirituyoqkunata qayakuychik.
¿Runakunaqa manachum Diosninkuta tapukunmanku?
nispa.
¿Kawsaqkunapaqqa manachum wañuqkunapa almanta consultanmanku?
nispa.
20 Qamkunaqa Tayta Diospa yachachikuynintayá consultaychik.
Qamkunaqa Tayta Diospa kamachikuynintayá consultaychik.
Chaykunaman hina mana rimaspankuqa
kay pacha manaraq achikyaq hinam kachkanku paykunaqa.
21 Ñakarichisqa kaspankum
runakuna kayman-chayman purinqaku.
Yarqaymanta kaspankum
runakuna kayman-chayman purinqaku.
Yarqaymanta kaspankum rabiasqa kanqaku.
Reyninkutawan Diosninkutam ñakanqaku.
Altokunatam paykunaqa qawanqaku.
22 Pampata qawaspankum ñakariyllata rikunqaku.
Pampata qawaspankum tutayayllata rikunqaku.
Tutayaypi hinam ñakariyllapi tarikunqaku.
Pasaypaq tutayayman tanqasqam kanqaku.