Mesias nisqanku nacespan gobiernananmanta
9
Chaywanpas manam tutayayllañachu kanqa chay ñakariqkunapaqqa.
Tayta Diosmi ñawpaq tiempokunapi Neftaliypa castankunatawan Zabulonpa castankunata humillarqa.
Hamuq tiempokunapiñataqmi reqsisqa kanankupaq ruranqa qochaman riq ñanpa patanpi kaqkunata.
Reqsisqa kanankupaqmá ruranqa Jordan Mayupa waklawninpi kaqkunata otaq Dios mana reqsiq runakunapa Galilea allpanpi kaqkunata.
2 Tutayaypi kawsaqkunam hatun achkiyta rikururqa.
Llumpay tutayaypi yachaqkunamanmi achkiy rikuriykurqa.
3 Runakunata mirachispaykim ancha kusikuyta
apamurqanki,
Dios Taytalláy.
Chayraykum ancha kusisqa paykunaqa
kachkanku,
Dios Taytalláy.
Cosecha tiempopi hinam
qampa qayllaykipi kusikuchkanku.
Guerrapi suwakusqankuta rakinakuspa
kusikusqankuta hinam kusikuchkanku.
4 Matankankupi llasaq yugota pakipachkaq hinam
otaq hombronkupi kaspita pakipachkaq hinam
ñakarichiqninkuta vencerurqanki.
Ñakarichiqninkupa varanta pakipachkaq hinaraqmi,
Madian runakunata vencesqayki punchawpi hinaraqmi
paykunapi munaychakuqta vencerurqanki.
5 Guerrapi peleaptinku bullallaña ruraq usutankuqa,
chaynataq yawarwan qachachasqa pachankuqa,
lliwmi ruparunqa.
Chaykunataqa ninam lliwta tukurunqa.
6 Wawam nacerapuwanchik.
Wawatam Dios qoykuwanchik.
Pay gobiernaptinmi sutichanqaku:
Admirakuypaq Kaqwan,
Consejakuqwan,
Tukuy Kallpayoq Dioswan,
Wiña-wiñaypaq Taytawan
hinaspa Hawkayay Qokuq Kamachikuqwan.
7 Rey Davidpa rantinpim gobiernanqa.
Gobiernonpa atiyninmi tukuy hinastinman miranqa.
Hawka gobiernayninqa manam tukunqachu.
Gobiernontaqa manam pipas qechunqachu.
Allinta ruraspanmi gobiernanqa.
Allin arreglokunawanmi gobiernanqa.
Chay tiempomanta wiña-wiñaykamam gobiernanqa.
Llapallan Kamachiq Tayta Diosqa sientisqanraykum chaynata ruranqa.
Israel nacionpa contranpi Tayta Diospa piñakuyninmanta
8 Señor Diosmi willachirqa Jacob castapa contranpi.
Chay willakusqanmi chayarqa Israel nacionpa contranpi.
9 Llapallan runakunam yachanqa.
Efrain castakunam yachanqa.
Samaria llaqtapi yachaqkunam yachanqa.
Orgulloso kaspankum ninku,
hatun tukuspankum kaynata ninku:
10 Ladrillo perqakuna wichiruptinpas
labrasqa rumikunawanmi perqasaqku,
nispa.
Sicomoro vigakunata kuchuruptinkupas
Cedromanta vigakunatam churasaqku,
nispa.
11 Ichaqa Tayta Diosmi hatarichimurqa
Rezinpa contraqninkunata.
Paymi atacanankupaq hoqarichimurqa
paypa enemigonkunata.
12 Intipa qespimunan lawmantam
Aram runakunata pusamurqa.
Intipa seqaykunan lawmantam
Filistea runakunata pusamurqa
chaynapi Israel nacionta millpurunanpaq,
siminku huntata paykunata millpurunanpaq.
Chaywanpas Tayta Diosqa
hinallam piñasqa kachkan.
Chaywanpas payqa hinallam
atiyninwan castigananpaq kachkan.
13 Chaywanpas runakunaqa castigaqninku Diosmanqa
manam kutikurqakuchu.
Chaywanpas Llapallan Kamachiq Tayta Diostaqa
manam maskarqakuchu.
14 Tayta Diosmi
animalpa umanta chaynataq chupanta
kuchuchkaq hina castiganqa Israel nacionta.
Palmera sachata kuchuchkaq hinam
huk punchawllapi castiganqa.
Tutura plantata rutuchkaq hinam
huk punchawllapi castiganqa.
15 Ancianokunapiwan reqsisqa runakunam
chay animalpa uman hina.
Llullakuspa Diosmanta willakuq tukuqkunañataqmi
chay animalpa chupan hina.
16 Kay runakunata pusaqninkum paykunata pantarachinku.
Pusasqan runakunam pantaypi rikurirunku.
17 Chayraykum Señorqa mana favorecerqachu mozokunata.
Manam Señorqa favorecerqachu mana tayta-mamayoqkunata.
Nitaqmi llakipayarikurqachu viudakunamanta.
Llapallankum kachkanku Dios mana respetaq runakuna.
Llapallankum kachkanku yanqakunalla rimaqkuna.
Chaywanpas Tayta Diosqa
hinallam piñasqa kachkan.
Chaywanpas payqa hinallam
atiyninwan castigananpaq kachkan.
18 Kichkakunatawan cardokunata ruparuq nina hinaraqmi
runakunataqa mana allin rurasqanku tukuchkan.
Monte sachakunatapas ruparuq nina hinaraqmi
runakunataqa mana allin rurasqanku tukuchkan.
Qosnirichkaq remolino wayra altokunaman hoqarichkaq hinaraqmi
runakunataqa mana allin rurasqanku tukuchkan.
19 Llapallan Kamachiq Tayta Dios piñakusqanraykum
enteron kay nacion rupachkan.
Llapallan Kamachiq Tayta Dios piñakusqanraykum
chay runakunaqa ninapaq yanta hina kachkan.
Runakunaqa runamasinta
mana kuyapayarikuqñam kachkan.
20 Runaqa kaylawpi millpuchkaspapas
manam saksanchu.
Runaqa waklawpi mikuchkaspapas
manam contentakunchu.
Runaqa brazonpa aychanta mikuchkaspapas
manam contentakunchu.
21 Manases castam mikuchkaq hina
Efrain castata tukuchkan.
Efrain castam mikuchkaq hina
Manases castata tukuchkan.
Iskaynin castakunam mikuchkaq hina
Juda castata tukuchkan.
Chaywanpas Tayta Diosqa
hinallam piñasqa kachkan.
Chaywanpas payqa hinallam
atiyninwan castigananpaq kachkan.