10
¡Ay,
imaynaraq kankichik
engañanaykichikpaq decretaqkuna!
¡Ay,
imaynaraq kankichik
ñakarichinaykichikpaq ley qellqaqkuna!
2 Wakchakunapa derechontam
qamkunaqa mana qonkichikchu.
Ñakariq runaykunapaqmi
allin arreglotaqa rurankichikchu.
Viudakunapa kapuqnintam apakunkichik.
Mana tayta-mamayoqkunapa kapuqnintam qechukunkichik.
3 ¿Imataraq rurankichik castigo punchawpiqa?
¿Imataraq rurankichik karumantaraq desgracia
hamususqaykichik punchawpiqa?
¿Pimanraq yanapasunaykichikpaq ayqenkichik?
¿Maypiraq qori-qollqekichikta saqenkichik?
4 Preso pusasqakunawan kuska mana humillakuspaqa
manañam ima ruraytapas atinkichikñachu.
Wañusqakunapa kasqanman mana wichiykuspaqa
manañam ima ruraytapas atinkichikñachu.
Chaywanpas Tayta Diosqa
hinallam piñasqa kachkan.
Chaywanpas payqa hinallam
atiyninwan castigananpaq kachkan.
Runankunata Asiria runakunawan castigananmanta
5 ¡Ay,
imaynaraq kanqa
Asiria nacionpa reynin,
nispam nin Tayta Dios.
Payqa castiganaypaq vara hinam kachkan.
Piñakuyniypi azote hinam payqa kachkan.
6 Mana respetawaqniy nacionta
atacananpaqmi payta kachani.
Ofiendeqniy runakunata
atacananpaqmi payta kachani.
Qori-qollqenkuta suwaspa
qechumunanpaqmi payta kachani.
Callepi mituta hina
sarutyananpaqmi payta kachani.
7 Ichaqa Asiria nacionpa reyninqa
manam chaynatachu piensan.
Payqa manam chaynatachu sonqonpipas tantean.
Aswanqa payqa tuñichinallanpaqmi piensan.
Achka nacionkunata chinkachinallanpaqmi piensan.
8 Chay reyqa kaynatam nichkan:
“Tropaykunapi kamachikuqkunaqa reykuna hinallam.
9 Ñoqapaqqa Calno llaqtaqa Carquemis llaqta hinallam.
Ñoqapaqqa Hamat llaqtaqa Arfad llaqta hinallam.
Ñoqapaqqa Samaria llaqtapas Damasco llaqta hinallam.
Ñoqapaqqa chay llaqtakunaqa vencenay llaqtakunallam.
10 Achka taytacha-mamacha adoraq nacionkunatam dueñochakurqani.
Jerusalen llaqtapi taytacha-mamachakunamantapas
aswan achka taytacha-mamachayoq
nacionkunatam dueñochakurqani.
Samaria llaqtapi taytacha-mamachamantapas
aswan achka taytacha-mamachayoq
nacionkunatam dueñochakurqani.
11 Castigarqanim Samaria llaqtata
chaynataq taytacha-mamachankunatapas.
Castigasaqtaqmi Jerusalen llaqtatapas
chaynataq taytacha-mamachankunatapas.”
12 Señorqa Sion Moqopa contranpi
runankunata tukuruspanmi,
Jerusalen llaqtapa contranpi
runankunata tukuruspanmi
ninqa:
Asiria nacionpa reynintam castigasaq.
Orgulloso kayninwan rurasqanmantam castigasaq.
Alabakuspa chaynataq hatunchakuspa
rurasqanmantam castigasaq.
13 Asiria nacionpa reyninmi nirqa:
“Atiyniywanmi chaykunata rurarqani.
Ancha entiendeq kaspaymi tanteaspa rurarqani.
Nacionkunapa linderonkunatam asurichirqani.
Qori-qollqentam ñoqaqa qechurqani.
Ñoqaqa munaychakuq hinam
gobiernaqninkunatapas tiyanankumanta wischurqani.
14 Qesanmanta horqochkaq hinam
runakunapa qori-qollqenta horqorqani.
Saqesqa runtukunata
horqochkaq hinam
runakunapa qori-qollqenta horqorqani.
Ichaqa rapranta urpitu mana kuyurichiq hinam
mana pipas kuyurirqachu.
Ichaqa tuspanta urpitu kicharispan mana waqaq hinam
mana pipas waqarqachu.”
15 Hachawan kuchuqmanta mastaqa
hacha ¿alabakunmanchu?
Serruchowan kuchuqmanta mastaqa
serrucho ¿hatun tukunmanchu?
Tawnaqa manam kamachinmanchu apaqnintaqa.
Runaqa manam kaspichu payta vara kamachinanpaqqa.
16 Chayraykum Señor Diosqa kallpasapa
runankunata eqoyachinqa.
Reqsisqa kaynintam rupachkaq ninawan
hina ruparachinqa.
17 Israelpa achkiynin Diosqa ruparichkaq
nina hinam kanqa.
Israelpa chuya Diosninqa lenguachkaq
nina hinam kanqa.
Huk punchawllapim kañaruspa chinkarachinqa.
Cardokunatawan kichkakunata hinam tukurunqa.
18 Pasaypaqtam chinkarachinqa
sumaqllaña montekunata.
Pasaypaqtam chinkarachinqa
tukuy imapa wiñanan chakrakunata.
Onqoq runata hinam saqerunqa.
Pasaypaq mana kallpayoqta hinam saqerunqa.
19 Pisillañam rikurirunqa
montepi puchuq sachakunaqa.
Warmachapapas yupanallanña kanankamam
puchurunqa sachakunaqa.
Israel casta puchuqkunamanta
20 Chay tiempopiqa Israel castakunamanta puchuqkunaqa
otaq Jacobpa castankunamanta lluptiqkunaqa
manañam hapipakunqachu ñakarichiqninpiqa
aswanqa Tayta Diosllapim hapipakunqaku.
Israelpa chuya Diosllanpim hapipakunqaku.
21 Jacobpa castanmanta as
puchuqkunallam kutirikunqaku.
Kallpasapallaña Diosmanmi Jacobpa castanmanta
puchuqkuna kutirikunqaku.
22 Yaw Israel castakuna,
qamkunamanta
achkallaña kaptinpas
kutimunqakuqa wakillanmi.
Qamkunamanta lamar qochapi
aqo hinaña kaptinpas
kutimunqakuqa wakillanmi.
Llimparichkaq lloqlla hina
chinkachisqa kanaykichikpaqmi
citasqaña kachkankichik.
Allin arregloman hina
chinkachisqa kanaykichikpaqmi
citasqaña kachkankichik.
23 Llapallan Kamachiq Señor Diosmi
tantearun kay nacionta chinkachinanpaq.
Payqa cumplinqam
tanteasqan enteron nacionta chinkachinanpaq.
24 Chayraykum Llapallan Kamachiq Señor Dios nin kaynata:
Sion Moqopi yachaq runallaykuna,
amayá manchakuychikchu Asiria runakunata.
Kaspiwan waqtasuptikichikpas
paykunataqa amayá manchakuychikchu.
Egipto runakunata hina
waqtasuptikichikpas amayá manchakuychikchu.
25 Manapas unaymantam contraykichikpi
piñakuyniy tukurunqa.
Manapas unaymantam paykuna castiganaypaq
piñakuyniy kanqa.
26 Llapallan Kamachiq Tayta Diosmi
Asiria nacion castigayta qallarinqa.
Oreb sutiyoq rumipi Madian runakunata
castigasqanta hinam castiganqa.
Egipto nacionpi tawnan
hoqarisqanta hinam castiganqa.
Lamar qochapa hawanman tawnan
hoqarisqanta hinam castiganqa.
27 Chay tiempopim llasaq qepi hina
churasusqaykita horqosunki.
Chay tiempopim matankaykiman yugo hina
churasusqaykita horqosunki.
Wirayaruspa pakirusqayki yugotam horqosunki.
Asiria tropakuna hichpamusqanmanta
28 Enemigom Ajat llaqtaman chayaramun.
Migron llaqtatam pasaramun.
Micmas llaqtapim tukuy apamusqanta saqeramun.
29 Qasantam pasaramun.
Geba llaqtapim samarun.
Rama llaqtapi runakunam katkatatanku.
Rey Saulpa kasqan llaqtapi kaqkunam ayqekuchkanku.
30 Sumaq Galim llaqtapi yachaqkuna,
qapariychik.
Lais llaqtapi yachaqkuna,
uyariychik.
Anatot llaqtapi yachaqkuna
¡imaynaraq kankichik!
31 Madmena llaqtamantam lluptichkanku.
Gebim llaqtapi yachaqkunam pakakuchkanku.
32 Kunanpunim sayarirunña Nob llaqtapi enemigoqa.
Sion llaqtapi yachaqkunatam amenazachkan enemigoqa.
Moqopi Jerusalen llaqtatam amenazachkan enemigoqa.
33 Qawaychik,
Llapallan Kamachiq Señor Diosmi
manchakuypaq atiyninwan sachakunapa kallmanta qorurunqa.
Hatun kuchusqa sachakunata hinam wichiykachinqa.
Ancha hatunnin sachakunatam pampaman wikutirunqa.
34 Montepi achkallaña sachakunatam hachawan chaqorunqa.
Libano Orqopi sachakunam paypa atiyninrayku sirirunqa.