Isaipa mirayninmanta kaq runa imaynam gobiernananmanta
11
Kuchusqa sachapa kullunmanta
ikllimuchkaq hinam runa nacemunqa.
Sachapa sapinmanta wiñamuchkaq hinam
Isai castamanta nacemunqa.
2 Paymi Tayta Diospa Espiritunwan huntasqa kanqa
ancha yuyaysapa kananpaq,
ancha entiendeq kananpaq,
ancha yuyaywan consejananpaq,
ancha atiyniyoq kananpaq,
ancha yachaysapa kananpaq
hinaspa Tayta Diosta respetananpaq.
3 Tayta Diosta respetaptinkum payqa kusikunqa.
Manam qawasqallanman hinachu pitapas juzganqa.
Manam uyarisqanman hinallachu pitapas sentencianqa.
4 Wakchakunatam derechonkuman hina allinta arreglanqa.
Kay pachapi humildekunatam
Diospa munasqanman hina defiendenqa.
Palabrankunam azote hina kanqa
kay pachapi runakunata castigananpaq.
Samayninmi espada hina kanqa
mana allin ruraqkunata wañuchinanpaq.
5 Allinkuna rurayninmi pachan hina kanqa.
Confiakuna kayninmi chumpin hina kanqa.
6 Hinaptinqa atoqwan malta carnerom hawkaña kawsanqa.
Uturunguwan uña cabram kuskaña waqtapanqaku.
Leonwan malta toropas kuskañam wiñanqaku.
Warmachapa pusasqanñam chaykunaqa kanqaku.
7 Vacawan ukumarim kuskankuña pastota mikunqaku.
Chaykunapa wawankunapas kuskañam waqtapanqaku.
Leonkunapas bueyes hinam pajataña mikunqaku.
8 Cobra nisqanku culebrapa uchkunpa hichpanpim
ñuñuq wawa pukllanqa.
Vibora nisqanku culebrapa uchkunmanmi
chayraq anukasqa wawa makinta haywarinqa.
9 Sapaqchasqay enteron orqopiqa
manañam pipas mana allintaqa ruranqachu.
Sapaqchasqay enteron orqopiqa
manañam pipas dañanqachu.
Imaynam yaku pasaypaqta tapaykun lamar qochata,
chaynam enteron kay pachapi runakunapas
reqsiwanqaku ñoqa Tayta Diosta.
10 Sachapa sapin ikllimuq hinam
chay tiempopi Isaipa mirayninmanta rikurimunqa.
Nacionkunapaq bandera hinam kanqa.
Paytam maskanqaku nacionkunamanta runakuna.
Paypa samasqan sitiom kancharinqa.
Preso riqkuna libre kutimunankumanta
11 Chay tiempopim Señorqa
yapamanta atiyninta qawachinqa.
Puchuq runankunata
reclamamuspanmi atiyninta qawachinqa.
Reclamamunqam runankunata
Asiria nacionmantawan Egipto nacionmanta.
Reclamamunqam runankunata
Patros nacionmantawan Cus nacionmanta.
Reclamamunqamá runankunata
Elam nacionmantawan Sinar lawmanta.
Reclamamunqamá runankunata
Hamat llaqtamantawan lamar qochapa patanpi kaq nacionkunamanta.
12 Señalta hinam banderata nacionkunapaq sayachinqa.
Huklaw nacionkunaman Israel casta
qarqosqakunatam huñumunqa.
Judá nacionmanta cheqechisqakunatam
enteron kay pachamanta huñumunqa.
13 Tukunqañam Efrain castapa envidioso kaynin.
Tukunqañam Juda nacionpa cheqnikuq kaynin.
Efrain castaqa manañam Juda castamanta envidiakunqachu.
Juda castapas manañam Efrain castata cheqninqachu.
14 Aswanqa iskayninkuñam Filistea runakunapa
contranpi pawanqaku.
Intipa seqaykunan law qepankumantam paykunata atacanqaku.
Intipa qespimunan lawpi runakunatam saqueanqaku.
Paykunam munaychakunqaku Edom runakunapi.
Paykunam munaychakunqaku Moab runakunapi.
Paykunamanmi Amon runakuna sujetakunqaku.
15 Egipto nacion lawpi lamar qochapa partentam chinkachinqa.
Atiyninwanmi rupachkaq wayrata Eufrates Mayuman pukuchinqa.
Chay mayutam qanchis mayuchakunaman rakirunqa.
Usutankuta manaña chutukuspam runakuna chimparunqa.
16 Imaynam hatun ñan karqa
Israel castakuna Egipto nacionmanta hamunanpaq,
chaynam kanqa hatun ñan
Asiria nacionpi puchuqkuna hamunanpaq.