ISAIASPA QELLQASQAN LIBRO
Juda nacionpi runakuna ancha huchallikuq kasqankumanta
1
Juda nacionpim qatinasninpi gobiernarqa Rey Uzias,
Rey Jotam,
Rey Acaz hinaspa Rey Ezequias.
Paykunapa gobiernasqan tiempopim Amozpa churin Isaiasman revelacionninpi Tayta Dios rimapayarqa Juda nacionpa chaynataq Jerusalen llaqtapa contranpi:
2 Cielokuna,
uyariychik Tayta Diospa nisqanta.
Kay pacha,
qampas uyariy paypa kayna nisqanta:
Uywarqanim hatunyanankama churiykunataqa,
ichaqa contraypim hatarirunku paykunaqa.
3 Bueyespas reqsinmi dueñontaqa.
Asnopas reqsinmi mikunan artesantaqa.
Reqsinmá dueñonpa churasqan artesataqa.
Israelpa castan runaykunaqa manam reqsiwankuchu.
Israelpa castan runaykunaqa manam entiendewankuchu.
4 Ay ¡imaynaraq kankichik,
kay nacionpi huchasapa runakuna!
Ay ¡imaynaraq kankichik,
mana allin ruraykunawan intusqa runakuna!
Yaw,
mana allinlla ruraq miraykuna.
Yaw,
huchalla ruraq churikuna.
Tayta Diosmantam karunchakurunkichik.
Israelpa yupaychasqan Chuya Diosmantam rakikurunkichik.
Israelpa yupaychasqan Chuya Diostam qepancharunkichik.
5 ¿Imanasqataq castigachikuytaraq munankichik?
¿Imanasqataq manaña kasukuq rikurirunkichik?
Heridayoqmi kachkankichik enteron umaykichikpi.
Llapallaykichikmi llakisqa kachkankichik sonqoykichikpi.
6 Chaki pampaykichikmanta umaykichikkamam qamkunapiqa
mana imaykichikpas kanchu sanoqa
aswanqa toqyasqa heridakunallam kachkan.
Punkisqa,
kichasqa heridakunallam kachkan.
Manam pipas chaykunataqa hampirqachu.
Manam pipas chaykunataqa watarqachu.
Manam pipas aceitellawanpas llusiykurqachu.
7 Nacionnikichikmi chunnichkan.
Llaqtaykichikkunam rupachkan.
Chakraykichikpi tarpusqaykichiktam
forasterokunaña qayllaykichikpi mikuchkan.
Forasterokunapa purmachisqanku hinam
chakraykichik chunnichisqa kachkan.
8 Sion Moqopi llaqtam sapallanña qeparun.
Uvas huertapi chuklla hinam sapallanña qeparun.
Pepino tarpusqapa chawpinpi hatus hinam
sapallanña qeparun.
Enemigopa muyurirusqan llaqta hinam
sapallanña rikurirun.
9 Sichu Llapallan Kamachiq
Tayta Dios
mana saqeykuwaptinchikqa,
otaq ñoqanchikmanta as runallatapas
mana puchuykachiptinqa
kunallanmi Sodoma llaqta hina
kachkachwanchik karqa.
Chaynallataqmi Gomorra llaqtamanña
rikchakuchwanchik karqa.
Tayta Diostaqa imaynam adoranamanta
10 Sodoma llaqtapi hina kamachikuqkuna,
uyariychik Tayta Diospa palabranta.
Gomorra llaqtapi hina runakuna,
entiendeychik Diosninchikpa yachachikuyninta.
11 Tayta Diosmi nin:
¿Imapaqtaq valen
achkallaña animalkuna wañuchipuwasqaykichikpas?
Amiruniñam carnerokunata wañuchipuwaspa
wiran kañapuwasqaykichiktapas.
Malta torokunapa yawarnin
chaqchusqaykichiktaqa millakuruniñam.
Carnerokunapa chaynataq chivatokunapa
yawarnin chaqchusqaykichiktaqa millakuruniñam.
12 Qamkunam hamuwankichik ñoqawan tupanaykichikpaq,
ichaqa ¿pitaq kamachisurqankichik
temploypa pationta sarutyanaykichikpaq?
13 Kawsaykunamanta yanqapaq ofrendataqa
amaña apamuwaychikñachu.
Chay ofrendakunapa qosnintaqa
manañam aguantaniñachu.
Mosoq killakunapi fiestakunapaqmi
runakunata huñunkichik.
Samana punchawkunapi fiestakunapaqmi
runakunata qayankichik.
Chaywanpas manañam aguantanichu chay fiestakunataqa.
Manañam aguantanichu huchallikuq runapa fiestankunataqa.
14 Mosoq killakunapi fiestaykichikkunataqa
pasaypaqtam cheqnipakuruniña.
Hatun fiestaykichikkunapaq huñunakuynikichiktapas
llumpa-llupaytam amiruniña.
Llasaq carga hinam ñoqapaq chaykunaqa.
Amiruniñam chaykuna apaytaqa.
15 Makikichikta hoqarispa mañakamuwaptikichikpas
qamkunamantam asurichini ñawiykunatapas.
Achka kutita mañakamuwaptikichikpas
manam uyarikichikchu qamkunataqa.
Yawarwan qachachasqam kachkan makikichikqa.
16 Mayllakuspa limpiakuychik.
Mana allin ruraynikichikta qayllaymanta asurichiychik.
Mana allin rurayta saqeychik.
17 Allin rurayta yachaychik.
Allin arreglo rurayta maskaychik.
Ñakarichiqtapas allintaña rurananpaqyá yachachiychik.
Mana tayta-mamayoqta defiendeychik.
Viudakunapa asuntonman sayapakuychik.
18 Ñoqa Tayta Diosmi nini:
Kunanyá ñoqaman hamuychik.
Kunanyá ñoqawan tanteanakusunchik.
Cochinilla hina guindoña huchaykichik kaptinpas
ritita hinam yuraqyachisaq.
Morado colorniyoqña huchaykichik kaptinpas
yuraq millwata hinam yuraqyachisaq.
19 Sichum kasuwayta munaspaykichikqa
allpapa allin ruruntam mikunkichik.
20 Sichu mana kasuwanaykichikpaq hikutakuspaykichikqa
guerrawanmi tukusqa kankichik,
chaynatam ñoqa Tayta Dios nikichik.
Jerusalen llaqtapi runakunata Tayta Dios limpiananmanta
21 ¿Imaynanpimá chuchumikayarunkiqa
confiakunay llaqta kachkaspaqa?
Ñawpaqtaqa runaykikunam allin arreglota ruraqku.
Allin kaqkunallata ruraspankum paykunaqa kawsaqku.
Kunanqa runamasinku wañuchiqllañam
runaykikunaqa kachkanku.
22 Qollqekipas chulluchisqa
qollqepa puchuqnin qacha hinañam rikurirun.
Sumaqllaña vinoykipas
yaku hinañam rikurirun.
23 Kamachiqnikikunam pasaypaq mana kasukuqkuna.
Kamachiqnikikunam suwakunapa amigonkuna.
Llapallankum qollqewan rantichikunku.
Regalokunallatam paykunaqa maskanku.
Mana piyniyoqkunatapas manam allintaqa arreglankuchu.
Viudakunapa asuntontapas manam nanachikunkuchu.
24 Chayraykum Llapallan Kamachiq ñoqa Tayta Dios nini.
Chayraykum Israelpa yupaychasqan kallpasapa Diosnin nini:
Kunanmi ichaqa cuentata mañasaq contraparteykunamanta.
Kunanmi ichaqa vengakusaq chay enemigoykunamanta.
25 Yapamantam atiyniywan qamkunata castigasqaykichik.
Chulluchisqa qollqepa puchuqnin qachata hinam limpiasqaykichik.
Chulluchisqa metalpa mana valeqninta hinam rakisqaykichik.
26 Ñawpaq tiempopi hinam
churasaq qamkunapaq juezkunata.
Qallariyninpi hinam
churasaq qamkunapaq consejaqnikichikkunata.
Chaykunata qanwan ruraptiymi kaqllamanta runakuna:
“Allinkuna ruraq runakunapa yachanan llaqta” nispa sutichasunki.
Chaykunata qanwan ruraptiymi kaqllamanta runakuna:
“Tayta Diospa confiakunan llaqta nispa” sutichasunki.
27 Sion Moqopi yachaqkunatam
allin arreglokunata ruraspay librasaq.
Sion Moqopi yachaq wanakuqkunatam
allinkunata ruraspay librasaq.
28 Mana kasukuqkunawan huchasapakunaqa
ñutusqam kanqaku.
Ñoqamanta karunchakuqkunaqa
chinkachisqam kanqaku.
29 Penqarikunqakum
kuyasqanku encina sachakunamanta.
Uyankupas pukayanqam
diosninkuta adoranankupaq akllasqanku huertakunamanta.
30 Rapinkuna wichirachisqa encina sacha hinam kankichik.
Manaña yakuyoq huerta hinam kankichik.
31 Kallpasapa runapas qopa hinañam karunqa.
Rurasqankunam nina chispa hinaña rikurirunqa.
Manaña pipas amachaqnin kaptinmi kuskankuña ruparunqa.