Llaqta cuidaqpaqqa imam ruranan kasqanmanta
33
Tayta Diosmi rimapayawaspan niwarqataq kaynata:
2 —Runapa churin,
qamqa llaqtamasikikunatayá rimapayaspa niy kaynata:
“Sichum huk kaqnin nacionman guerrata apachiptiyqa,
chay nacionpi runakunam akllanmanku huk kaqnin runata chaynapi chay llaqtata cuidananpaq.
3 Chay llaqtaman enemigo tropakuna hamuqta rikuruspanqa cornetantam tocanman chay llaqta runakuna yachanankupaq.
4 Chay runa cornetanta tokachkaptin pipas mana kasukuqqa chay hamuq enemigopa wañuchisqanmi kanqa,
chay wañusqanmantaqa kikillanmi culpayoq kanqa.
5 Payqariki cornetata uyarichkaspam mana kasukurqachu,
chayraykum wañusqanmantaqa kikinpuni culpayoq kanqa.
Kasukuspanqa vidantachá salvarunman karqa.
6 Ichaqa sichum enemigokuna hamuchkaqta chay llaqta cuidaq qawanman hinaspa mana cornetanta tocanmanchu runakuna alistakunankupaq hinaptinqa,
chay enemigo hamuqkuna pitapas wañurachiptinqa chay runam wañurunman hina huchallanpi,
ichaqa chay runapa wañusqanmantaqa llaqta cuidaqtam cuentata mañasaq.”
7 —Runapa churin,
qamtam churaykuyki llaqta cuidaqta hina Israelpa castankunapaq,
qamqa uyariwaspaykim ñoqapa kamachisqayta paykunaman willakunki.
8 Ñoqam mana allin ruraq runata niyman:
“Wañunkipunim” nispa ichaqa chay mana allin kawsasqanmanta wanakunanpaq chay runata mana rimapayaptikiqa hina huchallanpim wañukunqa,
ichaqa chay wañukusqanmantaqa qamtam cuentata mañasqayki.
9 Ichaqa sichum chayna kawsasqanmanta wanakunanpaq rimapayachkaptikipas mana wanakuspanqa kikinmi wañunqa chay mana allinkuna rurasqanmanta,
qamqa manam culpayoqchu kanki.
Huchallikuq runaqa kikillan culpayoq kasqanmanta
10 —Runapa churin,
Israelpa castankunatayá rimapayay kaynata:
“Qamkunam rimarqankichik:
‘Ñoqaykuqa mana kasukuq hinaspa huchasapallaña kasqaykuraykum llasa-llasaqllaña qepiyoq kachkaniku,
chayraykum ñoqaykuqa puchukaruchkanikuña,
chaynaqa ¿imaynamá kawsaymankuraqqa?’
nispa.”
11 Paykunamanyá ñoqa Señor Diospa nisqayta niy kaynata:
“Ñoqaqa vidayrayku juraspam nikichik:
Mana allin ruraq runapa wañunantaqa manam munanichu.
Ñoqaqa munani mana allin kawsasqanmanta wanakuspan kawsanantam.
Yaw Israel castakuna ¡mana allin kawsasqaykichikmanta wanakuspayá kutirikamuwaychik!
¿Imanasqamá wañuwaqchik chay huchaykichikraykuqa?
nispa.”
12 —Chaynaqa runapa churin,
qamyá llaqtamasikikunaman niy kaynata:
“Allin ruraq runa mana kasukuqña rikuriruptinqa,
allin rurasqankunapas manam salvanqachu.
Sichum mana allin ruraq runa chay rurasqanmanta wanakuptinqa,
chay mana allin rurasqanmantaqa manam wañunqachu.
Allin ruraq runa huchallikuruspanqa manam kawsanqachu chay allin rurasqanraykupas.
13 Sichum allin ruraq runata niyman:
‘Qamqa kawsankipunim’ nispa hinaptin payñataq allin rurasqanpi hapipakuspan mana allin rurayta qallaykunman hinaptinqa allin rurasqanpas qonqasqa kaptinmi huchallikusqanmanta payqa wañunqapuni.
14 Sichum mana allin ruraq runata niyman:
‘Qamqa wañunkipunim’ nispa hinaptin payñataq huchanmanta wanakuspan allin arregloman hina allintaña ruraspan,
15 prenda hapisqantapas dueñonmanña kutiykachipuspanqa chaynataq mana allinta amaña rurananpaq decretoykunaman hina kawsaspanqa kawsakunqapunim,
manam wañunqachu.
16 Hucha rurasqanqa manam yuyasqañachu kanqa.
Payqariki allin arregloman hina allintaña rurasqanraykum kawsakunqapuni.
17 Segurochá llaqtamasikikunaqa ninqaku:
‘Señorqa rurachkan manam allin arregloman hinachu’ nispa,
ichaqa paykunamiki manaqa kawsachkanku allin arregloman hinachu.
18 Sichum allin ruraq runa manaña chayna allinta ruraspanqa,
chay huchanraykum wañunqapuni.
19 Sichum mana allin ruraq runa mana allin rurasqanmanta wanakuspa allin arregloman hinaña allinta ruraspanqa chay allin rurasqanraykum kawsakunqapuni.
20 Qamkunaqa nirqankichiktaqmi kaynata:
‘Señorqa rurachkan manam allin arregloman hinachu’ nispa.
Ichaqa Israel castakuna,
ñoqaqa sentenciasqaykichik sapakamatam imaynam kawsasqaykichikman hina.”
Jerusalen llaqta tuñichisqa kasqanmanta
21 Preso pusasqa kasqaykumanta chunka iskayniyoq watapa chunka kaq killanpi hinaspa chay killapa pichqa kaq punchawninpim ñoqaman hamurqa huk runa.
Chay runaqa ayqekamusqa Jerusalen llaqtamantam.
Paymá niwarqa:
—Jerusalen llaqtaqa enemigopa makinmanñam wichiykun —nispa.
22 Jerusalen llaqtamanta lluptimuq ñoqaman chayaramusqanpa chisi tutantam mana rimaq kasqayrayku Tayta Diospa atiynin ñoqapa hawaypi karqa,
chay runapa chayamuwasqan madrugawñam huktawan rimariykachiwarqa,
chaynapim ñoqaqa rimaqña karqani.
Israel castakunapa huchallikusqankumanta
23 Tayta Diosmi rimapayawaspan niwarqataq kaynata:
24 —Runapa churin,
Israel nacionpi kaq purmasqa llaqtakunapi yachaqkunam nichkanku kaynata:
“Abrahamqa sapallan kachkaspanpas kay allpatam dueñochakurqa,
ñoqanchikqariki paymantaqa achkasum kachkanchik hinaptinqa segurochá kay allpataqa dueñochakunanchikpaq qowarqanchik” nispa.
25 Chaynaqa ñoqa Señor Diospa nisqaytayá niy kaynata:
“Qamkunaqa aychatam mikunkichik yawarnintinta,
taytacha-mamachakunata yupaychaspataqmi runakunatapas wañuchichkankichik.
¿Chayna kachkaspachum kay nacionpa dueñon kaytaraq munachkankichik?
26 Qamkunaqa guerrallaman atipakuqmi kachkankichik,
qamkunaqa runamasikichikpa warminwanmi huchapakuchkankichik.
¿Chayna kachkaspachum kay nacionpa dueñon kaytaraq munachkankichik?”
27 —Ñoqa Señor Diospa nisqaytayá paykunaman niy kaynata:
“Ñoqaqa kikiyrayku juraspam nini:
Purmasqa llaqtakunapi yachaqkunaqa guerrapim lliw wañunqaku,
chakrakunapi yachaqkunatapas purun animalkunawanmi mikurachisaq,
amparakuna wasikunapi hinaspa machaykunapi yachaqkunapas peste onqoywanmi wañurunqa.
28 Chay naciontaqa purmarachispam chunnichkaqtaña saqerusaq,
kallpanchakuspa hatunchakunaykichik kaqpas manañam kanqachu,
Israel nacionpi orqokunapas chunnichisqañam karunqa chaynintaqa manaña pipas pasananpaq.
29 Chaynaqa chay naciontam purmarachispa chunnichkaqtaña saqerusaq,
chaynataqa rurarusaq millakuypaq kaqkunata rurasqankuraykum.
Chaynapim yachanqaku Tayta Dios kasqayta.”
30 —Runapa churin,
qampa llaqtamasikikunam perqakunapa waqtanpi hinaspa wasikunapa punkunpi qampa contraykipi rimanakunku:
“Rispayá uyarimuychik Tayta Diospa imam rimasqanta” nispa.
31 Chaynaqa imaynam hamunankuman hinamá runaykunaqa hamusuchkanki hinaspam ñawpaqnikipi tiyaykuspanku uyarisuchkanki,
ichaqa manam chay uyarisqankutapas kasukunkuchu.
Paykunaqa yacharuspapas kuyanakuqkunapa takinta hinallam rimarqarinku,
paykunaqa qollqellamantam piensakuchkanku.
32 Qamqa paykunapaqmi kachkanki kuyanakuqkunapa takinkuna takiq hinalla,
paykunaqa sumaqllaña takiqpaq hinaspa arpa tocaqpaqmi hapisuchkanki.
Paykunaqa uyarisuspaykipas rimasqaykitaqa manam kasukunkuchu.
33 Ichaqa kay nisqaykunaqa cumplikunqapunim,
cumplikuruptinñam yachanqaku ñoqamanta willakuq paykuna ukupi kasqanta.