Rey Faraonqa hatun lagartowan tupachisqa kasqanmanta
32
Chunka iskayniyoq watapa chunka iskayniyoq kaq killanpi hinaspa chay killapa punta kaq punchawninpim Tayta Dios huktawan rimapayawaspan kaynata niwarqa:
2 —Runapa churin,
Egipto nacionpa reynin Faraonmanyá kay aya takita takipuy:
“Qamqa nacionkunapi leonmanmi rikchakunki.
Qamqa lamar qochapi manchakuypaq
hatun animal hinam kanki.
Qamqa mayuykikunapim challpuqyanki.
Qamqa yakukunatapas chakikiwanmi putkayachinki.
Chay mayukunataqa mitullatañam rurarunki.”
3 —Huktawanmi ñoqa Señor Dios nini kaynata:
Achkallaña runakuna huñunasqa kachkaptinmi
qampa hawaykiman mastariykusaq mallayta.
Paykunawanmi aysachisaq chay mallayta.
4 Qamtaqa pampamanmi wischuykusqayki.
Qamtaqa chakrakunamanmi chamqaykusqayki.
Hinaptinmi alton pawaq llapallan animalkuna
qampa hawaykipi tiyanqaku.
Chaynapim tukuy hinastinpi purun animalkuna
qanwan saksaykunqaku.
5 Orqokunapim aychaykitapas masasaq.
Puchuruq aychaykiwantaqmi
qechwakunatapas huntaykachisaq.
6 Pampakunatapas yawarnikiwanmi parqosaq.
Chaytaqa orqokunakamam chayachisaq.
Qanwanmá wayqokunatapas huntariykachisaq.
7 Qamta puchukarachispaymi ñoqaqa
cielokunatapas tutay-tutayta rurarusaq.
Cielokunapi lucerokunatapas
ñoqataqmá wañurachisaq.
Puyukunawanmi tapaykusaq intipa kanchaynintapas.
Manañam kanchinqachu killapa achkiriyninpas.
8 Ñoqaqa qamraykumá tutayarachisaq
cielokunapi llapallan kanchaqkunatapas.
Ñoqaqa qamraykumá tutay-tutayta
rurarusaq nacionnikitapas.
9 Qamta puchukarachisqayta yacharuspankum
huklaw nacionniyoq runakunapas llumpayllataña
hukmanyarunqaku.
Qamta puchukarachisqayta yacharuspankum
mana reqsisqayki nacionniyoqkunapas llumpayllataña
hukmanyarunqaku.
10 Qamraykum huklaw nacionniyoq achkallaña
runakunatapas muspaypi hinataña rurarusaq.
Qamraykum reyninkupa chukchantapas
manchakuymanta sayarirachisaq.
Paykunapa ñawpaqninpi espadayta horqoykuptiymi
chaynaqa rikurirunqaku.
Qam wichiykuptikim paykunaqa wañuy patanpiña kaspa
sapakama katkatatanqaku.
11 Chaynaqa ñoqa Señor Diosmá nini kaynata:
Babilonia nacionpa reyninmi
qampa contraykipi espadawan peleanqa.
12 Valeroso soldadokunapa wañuchisqanmi
nana-nanaq runaykikunaqa wañunqa.
Lliw nacionkunapi manchakuypaq runakunapa wañuchisqanmi
nana-nanaq runaykikuna wañunqa.
Paykunamá tukurunqaku
Egipto nacionpa hatunchakuqllaña kayninta.
Paykunamá chinkarachinqa
Egipto nacionpi nana-nanaq runakunata.
13 Ñoqaqa chinkarachisaqmi
achkallaña yakukunapa hichpanpi kaq animalkunata.
Hinaptinmi chay yakutaqa runakunapa chakinpas
manaña putkayachinqachu.
Hinaptinmi chay yakutaqa animalkunapa atakanpas
manaña putkayachinqaku.
14 Chayraqmi ñoqaqa yakunkunatapas chuyayaykachisaq.
Chayraqmi mayunkunatapas aceiteta hina puririchisaq.
Chaynatam nini ñoqa Señor Dios.
15 Ñoqapuni Egipto nacionta purmarachiptiymi,
tukuy imankunatapas chaymanta qechuruptiymi,
chaypi yachaqkunatapas wañurachiptiymi
chayraq yachanqaku ñoqa Señor Dios kasqayta.
16 “Chaynaqa kay takiqariki aya takim,
huklaw nacionniyoq warmikunapas chaynatamá takinqaku.
Egipto nacionmanta hinaspa chaypi nana-nanaq yachaqkunamantam chaynataqa takinqaku.
Chaynatamá ñoqa Señor Dios nini.”
Wañuqkunapa kasqanman Egipto nacion uraykunanmanta
17 Chunka iskayniyoq watapa chunka iskayniyoq kaq killanpi hinaspa chay killapa chunka pichqayoq kaq punchawninpim Tayta Dios huktawan rimapayawaspan niwarqa:
18 Runapa churin,
qamqa
Egipto nacionpi nana-nanaq runakunamantayá waqay.
Qamqa Egipto nacionpi kamachikuqkunamantayá
nacionkunapi warmikunapiwan waqay.
Wañuqkunapa kananman uraykuqkunatawan kuskatayá
uraykachiychik paykunataqa.
19 ¿Pitataq masyanki
sumaq kaynikiwanqa?
Dios mana yupaychaqkunawan uraykuspayá
chutarayay qamqa.
20 —Egipto nacionniyoq runakunaqa guerrapi wañuqkunawan kuskam wañunqaku.
Arí,
wañunankupaqmi espadaqa listollaña kachkan,
chaynaqa chay naciontayá pusarikuy chaypi nana-nanaq runakunatawan.
21 Wañuqkunapa kasqanpi kaq kallpasapa runakunam Egipto nacionmanta rimarinqa:
“Kunanqa ñam uraykaramunkuña,
Diosta mana yupaychaq guerrapi wañuqkunawan kuskam paykunaqa chutarayachkanku” nispa.
Chaynatamá ninqaku Egipto nacion yanapaq runakunamantapas.
22 —Chaypitaqmi kachkan Asiria nacionpas llapallan tropankunapa sepulturanwan muyuriykachikuspa,
paykunaqariki guerrapi wañuqmi karqaku.
23 Paykunaqa pampasqa kachkanku sepulturapa aswan ukunpiraqmi,
paypa tropankunañataqmi kachkan chay sepulturanpa muyuriqninkunapi,
chay tropakunaqariki manaraq wañuchkaspankum llapa runakunata manchachirqa,
kunanmi ichaqa guerrawan llapallanku wañurunkuña.
24 —Chaypitaqmi kachkan Elam nacionpas llapallan soldadonkunapa sepulturanwan muyuriykachikuspa,
paykunaqariki guerrapi wañuruspam Dios mana yupaychaqkunawan uraykurqaku uku-pachaman.
Chay soldadokunaqariki manaraq wañuchkaspankum llapa runakunata manchachirqaku,
kunanmi ichaqa penqakuyllawanña kachkanku chay wañuqkunapa kasqanman uraykuqkunawan kuska.
25 Elam nacionqa chutarayachkan llapallan wañusqa soldadonkunapa chawpinpim,
chay soldadonkunaqariki Dios mana yupaychaq kaspankum guerrapi wañurqaku.
Paykunaqa manaraq wañuchkaspam llapa runakunata manchachirqaku,
kunanmi ichaqa penqakuyllawanña kachkanku chay wañuqkunapa kasqanman uraykuqkunawan kuska,
paykunaqa churasqa kachkanku wañuchisqa runakunawan kuskam.
26 —Wañusqakunapa kasqanpitaqmi kachkan Mesec lawpi hinaspa Tubal lawpi yachaqkunapas,
chaypiqa kachkanku llapallan soldadonkunapa sepulturanwan muyuriykachikuspam,
paykunaqariki Dios mana yupaychaq kaspankum guerrapi wañurqaku.
Paykunaqa manaraq wañuchkaspam llapa runakunata manchachirqaku.
27 Paykunapas Dios mana yupaychaq valeroso soldadokunawan kuskam chutarayachkanku.
Chay soldadokunapas guerrapi wañuruspam llapa armantin wañusqakunapa kasqanman uraykurqa.
Wañuruptinkum espadankutapas paykunapa sawnanman churarqaku,
ichaqa paykunapa mana allin rurasqankuqa hinallaraqmi tullunkupipas kachkan.
Chay kallpasapa runakunaqariki manaraq wañuchkaspam llapa runakunata manchachirqaku.
28 —Egipto nacionpa reynin Faraon,
qampas chaynallataqmi Dios mana yupaychaq hinaspa guerrapi wañuqkunawan kuska chutarayachkanki.
29 —Hina chay wañusqakunapa kasqanpitaqmi kachkan Edom nacionpas,
chaypiqa kachkan reyninkunapiwan chaynataq llapallan kamachiqninkunapiwan kuskam.
Paykunaqa llumpay kallpasapallaña kachkaspankupas guerrapi wañuqkunawan kuskam chutarayachkanku.
Paykunapas Dios mana yupaychaqkunawan kuskam otaq wañusqakunapa kasqanman uraykuqkunawan kuskam sepulturapi chutarayachkanku.
30 —Hina chaypitaqmi kachkan norte lawpi llapallan kamachikuqkunapas,
Sidon llaqtapi llapallan yachaqkunawan kuskam chaypiqa kachkanku.
Paykunaqa kallpasapallaña hinaspa manchakuyllapaqña kachkaspankupas guerrapi wañuqkunawan kuskam penqakuyllawanña uraykurqaku,
chaynaqa paykunapas Dios mana yupaychaq kaspam guerrapi wañuqkunawan kuska chutarayachkanku,
paykunaqa penqakuywantaqmi kachkanku wañusqakunapa kasqanman uraykuqkunapiwan kuska.
31 —Llapa chay runakunata Rey Faraon qawaykuspanmi sonqonta tiyaykachinqa llapa tropankunapa wañusqanmanta.
Payqariki llapallan tropankunapiwanmi guerrapi wañurqa.
Chaynatam nini ñoqa Señor Dios.
32 Arí,
ñoqamá Faraontaqa kawsaptinraq llapa runakunapa manchakuyninta rurarqani,
chayraykum paypas chutarayachkan Dios mana yupaychaqkunawan kuska otaq guerrapi wañuqkunawan kuska,
hina chaynallataqmi kachkanku paypa llapallan soldadonkunapas.
Chaynatam nini ñoqa Señor Dios.