2 —Runapa churin,

qamyá Israel casta kamachikuqkunapa contranpi ñoqa Señor Diospa nisqayman hina niy kaynata:

“¡Imallapiraq rikukunkichik oveja michiqkuna hina Israel castakunapa kamachiqninkunaqa!

Qamkunaqariki ovejakunata michinaykichik kachkaptinmi kikillaykichikta michikuchkankichik.

3 Qamkunaqa lechetapas lluklluykachispam mikunkichik,

qamkunaqa millwantapas rutukuykuspam chaywan pachakunkichik hinaspam wiran ovejakunatapas nakakuykuspa mikukunkichik,

manam chay ovejakunataqa michinkichikchu.

4 Eqoyaruq ovejakunatapas manam qamkunaqa hampiykunkichikchu,

onqoruq ovejakunatapas manam qamkunaqa hampiykunkichikchu,

chakin pakikuruq ovejakunatapas manam qamkunaqa wataykunkichikchu,

chullaruq ovejakunatapas manam qamkunaqa kutiykachinkichikchu,

chinkaruq ovejakunatapas manam qamkunaqa maskaykunkichikchu aswanqa chay ovejakunataqa mana llakipayarispam maqayllawanña michirqankichik.

5 Chaynapimá chay ovejakunaqa mana michiqniyoq cheqesqa kallachkanku.

6 Ovejaykunaqa orqokunapim hinaspa alto moqokunapim pantaypi purillachkanku,

tukuy hinastinman cheqesqam paykunaqa kallachkanku,

manam pipas kanchu maskaykuqninqa nitaq tapukuqllanpas.

7-9 “Llapallan michiqkuna,

vidayrayku juraspa ñoqa Señor Diospa nisqaytayá uyariychik:

Ovejaykunaqa mana michiqniyoq kasqanraykum pipapas mana maskasqan suwasqa hinaspa purun animalkunapa mikusqan kachkanku.

Ñoqapa michiqniykunaqa ovejaykunata michinankupas kachkaptinmi kikillankuta michikuchkanku.

10 Ñoqa Señor Diosmá nikichik:

Michiqkuna,

ñoqaqa contraykichikpim kachkani,

ovejaykunata qamkunamanta mañaruspaymi qarqorusqaykichikña ovejaykunapa michiqnin manaña kanaykichikpaq,

chaynapim qamkunaqa manaña kikillaykichiktachu michikunkichik.

Ovejaykunata manaña mikukunaykichikpaqmi qechurusqaykichikña.

11 “Ñoqa Señor Diosmá nikichik kaynata:

Kikiypuniñam ovejaykunata maskamuspay nanachikusaq.

12 Imaynam huk michiq ovejankunawan nanachikun,

chaynam ñoqapas ovejaykunata nanachikusaq,

paykunatam libraykusaq tukuy hinastinpi cheqesqa kasqankumanta.

Paykunaqariki cheqesqam karqaku yana puyupa tapaykusqan punchawpi.

13 Paykunataqa ñoqamá horqomusaq huklaw nacionniyoq runakunapa chawpinmanta,

hukllaman huñuykuspa kikinkupa allpanman pusamuspaymi Israel nacion orqokunapi michisaq,

paykunataqa michisaqmá qechwakunapipas hinaspa runakunapa yachanan allpapipas.

14 Sumaqllaña pastokunapi michiptiymi paykunapaqa kanchankupas kanqa Israel nacionpa orqonkunapiña,

chaypi sumaq kanchakunapiña samaspankum mikunqakupas Israel orqokunapi wiñaq sumaq pastokunataña.

15 Kikiyña ovejaykunapa michiqnin kaspaymi paykunataqa samaykachisaq.

Chaynatam ñoqa Señor Dios nini.

16 Chinkaruq ovejakunatapas maskaykusaqmi,

chullaruq ovejakunatapas kutirichimuspaymi wataykusaqtaq chakin pakisqa ovejakunatapas,

eqoyaruq ovejakunatapas ñoqaqa yanapaykusaqmi.

Wirasapakunatawan kallpasapakunatam ichaqa puchukarachisaq hinaspam iguallataña michisaq.

17 “Ovejallaykuna,

qamkunatam ichaqa ñoqa Señor Dios nikichik kaynata:

Ñoqaqa allin arregloman hinam juzgasqaykichik carnerokunatapas chaynataq chivatokunatapas.

18 ¿Allinpaqchum hapinkichik allinnin pastota mikukuruchkaspapas puchuqnintañataq saruparuyta?

¿Allinpaqchum hapinkichik chuyan yakuta tomakuruchkaspapas puchuqnintañataq putkacharuyta?

19 Ovejaykunaqa mikullankupas qamkunapa saruparusqaykichik pastotañam,

tomallankupas qamkunapa putkacharusqaykichik yakutañam.

20 Chayraykum ñoqa Señor Dios nikichik kaynata:

Ñoqam allin arregloman hina juzgasaq wirasapa ovejakunatapas chaynataq tulluyasqa ovejakunatapas.

21 Qamkunaqa eqoyasqa ovejakunatam waqtaykichikwan hinaspa waqraykichikwan tanqa-tanqarispa huklawman cheqerachinkichik.

22 Ovejaykunataqa kikiypuniña libraykuptiymi engañakuqkunapas manaña engañanqachu,

allin arregloman hinañam juzgasqaykichik animalpurata.

23 Ñoqaqa ovejaykunata michinanpaqmi hatarichisaq huk michiqta,

payñam ovejaykunataqa michinqa,

chay ovejaykunapa michiqninqariki kanqa serviqniy Davidmi,

payñamá michiqninku kaspa ovejaykunataqa michinqa.

24 Ñoqa Señor Diosmi paykunapa Diosninqa kasaq,

serviqniy Davidñataqmi kanqa paykunapi kamachikuq.

Ñoqa Tayta Diosmi nini chaynata.

25 Ovejaykunawanmi contratota rurasaq hawkaña kawsakunankupaq,

daño ruraq purun animalkunatapas nacionninkumanta chinkarachiptiymi ovejaykunaqa chunniqpipas mana manchakuspaña kawsakunqaku,

montekunapipas mana manchakuspañam puñukunqaku.

26 “Paykunata bendecispam bendeciykusaqtaq moqo allpaykunapa muyuriqnintapas,

para tiempopim parachimusaqpuni,

chay paraqa hatun bendicionmi kanqa.

27 Chakrapi sachakunapas sumaqllatañam rurunqa,

chakramanta cosechasqanku sumaqllaña kaptinmi runaykunaqa chakrankupiña hawka kawsakunqaku.

Yugo pakichkaq hina servichikuqnin runakunamanta runaykunata libraptiymi yachanqaku Tayta Dios kasqayta.

28 Huklaw nacionniyoq runakunaqa manañam suwakunqakuñachu runaykunamantaqa nitaqmi purun animalkunapas runaykunataqa mikunqañachu.

Manaña pipapas manchachisqanmi paykunaqa hawkaña kawsakunqaku.

29 Tarpuqkunapa chakrankuta ancha reqsisqataña ruraruptiymi chay nacionpi yachaqkunaqa manaña yarqaymantaqa kanqakuñachu,

huklaw nacionniyoq runakunapas paykunataqa manañam penqapayanqachu.

30 Chaynapim ovejaykunaqa yachanqaku yupaychasqanku ñoqa Tayta Diosqa paykunawan kasqayta,

yachanqakumá Israel castakunaqa runaykuna kasqanta.

Ñoqa Señor Diosmá chaynata nini.

31 Runaykunaqa kankichik ovejaykuna hinam,

qamkunaqa michinaypi kaq ovejaykuna hinam kankichik,

ñoqañataqmi qamkunapa Diosnikichik kani.

Chaynatam nini ñoqa Señor Dios.”