Edom nacionpa contranpi willakuymanta
35
Tayta Diosmi rimapayawaspa niwarqa kaynata:
2-3 —Runapa churin,
Seir Orqota qawarispayá chaypa contranpi willakuy ñoqa Señor Diospa kayna nisqayta:
“Seir Orqo,
ñoqaqa kachkani contraykipiñamiki.
Qamtaqa atiyniywanmi castigarusqayki.
Qamtaqa purmachkaqtañam saqerusqayki.
Qamtaqa chunnichkaqtañam saqerusqayki.
4 Tuñirachisaqmi qampi kaq llaqtakunataqa.
Llumpay purmasqañamá karunki qamqa.
Señor Dios kasqaytam yachankichik qamkunaqa.
5 “Qamqa kachkanki Israel castakunapa wiñaypaq enemigonmi,
qamqa guerrawanraqmi paykunata hapirqanki mana allin rurasqankumanta castigasqaña kallachkaptinkupas.
6 Chayraykum ñoqa Señor Dios vidayrayku juraspa nini kaynata:
Qamtaqa wañuymanña qoykuptiymi wañuypa qatikachasqanña kanki,
wañuyta kuyakurusqaykiraykum wañuyllaña qatikachasunki.
7 Ñoqaqa chay Seir Orqotaqa purmachkaq chunniqmanñam tikrarusaq,
wañurachisaqtaqmi chayninta kaynaman-waknaman puriqkunatapas.
8 Chaylawpi kaq orqokunapas wañusqakunapa huntarisqanmi kanqa,
moqokunapas,
qechwakunapas chaynataq wayqokunapas guerrapi wañuq runaykikunapa wichiykusqanmi kanqa.
9 Qamtaqa wiñaypaqmi chunnichkaqmanña tikrarusqayki,
llaqtaykikunapipas manañataqmi pipas yachanqañachu.
Chaynapim yachanki Tayta Dios kasqayta.
10 “Qanmi nirqanki:
‘Israel castakunapa iskaynin nacionninqa enteron allpantinmi ñoqapaña rikurirunqa,
manam imananchu Tayta Diospa chaypi kasqanpas’ nispa.
11 Ichaqa ñoqa Señor Diosmi kikiyrayku juraspay kaynata nini:
Ñoqaqa rurasaq qampa piñakuynikiman hinaspa sientekuspa imam rurasqaykiman hinam,
qamqariki cheqnikuyllawanñam rurarqanki Israel castakunapa contranpi,
chaynaqa qamta castigaruptiymi chayraq paykunaqa reqsiwanqaku.
12 Qamqariki yachankim Israel orqokunapa contranpi despreciowan rimasqaykita ñoqa Tayta Dios uyarirusqaytaqa.
Qanmi nirqanki:
‘Wak orqokunaqa purmasqaña kaspam ñoqanchikmanña qosqa kachkan tukuparunanchikpaq’ nispa.
13 Qamqa mana upallaykuspam ñoqapa contraypi rimarqanki,
mana sayaykuspa contraypi rimasqaykitam ñoqaqa uyariruni.
14 “Chaynaqa ñoqa Tayta Diosmi nini kaynata:
Qamta purmarachiptiyqa kay pachapi llapallan runakunam kusikunqaku.
15 Israel castakunapa dueñochakusqan allpakuna purmachisqa kaptinmi kusikurqanki,
chaynatapunim qanwanpas rurasaq.
Seir Orqoqa purmachisqañam kanqa.
Edom nacionpi tukuy imapas purmachisqañam kanqa.
Chaynapim yachanqaku Tayta Dios kasqayta.”