6 —Chaynaqa Israel allpakunamanta ñoqa Señor Diospa nisqaytayá orqokunaman,

moqokunaman,

qechwakunaman chaynataq wayqokunaman niy kaynata:

“Wakin nacionkunapa penqayman churasqan kasqaykichikraykum llumpayllataña piñakuruni chay nacionkunapaq.

7 Chayraykum ñoqa Señor Dios juraspay nini chay muyuriqnikichikpi nacionkunaqa penqayman churasqa kanankumanta.

8 Israel nacionpi orqokuna,

qamkunam ichaqa kallmasapallaña sachayoq kankichik.

Qamkunaqa Israel runaykunapaqmi sumaqllataña rurunkichik,

paykunapa kutimunanqariki hichpamuchkanñam.

9 Yanapaptiymi qamkunaqa kankichik yapusqa hinaspa tarpusqa.

10 Ñoqapunim mirachisaq chaypi yachaq Israel llapallan castakunatapas.

Llaqtakunapas runakunapa mosoqmanta yachasqanmi kanqa.

Purmachisqa raqaykunapas huktawan hatarichisqam kanqa.

11 Chaypi tarikuq runakunatapas hinaspa animalkunatapas ñoqapunim mirachisaq.

Chaynapim paykunaqa nana-nanaqta sumaqllataña miranqaku.

Ñawpaq tiempopi hinaraqmi qamkunataqa chaypi kawsachisqaykichik.

Qamkunataqa ñawpaq tiempomantapas aswan allintaraqmi rurasqaykichik.

Chaynapim yachankichik Tayta Dios kasqayta.

12 Israel nacionpi orqokuna,

Israel runaykunatañam chaykunapiqa purichisaq.

Paykunañam qamkunataqa dueñochakunqa herencian kanaykichikpaq.

Manañam wawa-churinkutapas wañuchinkichikchu.

13 “Ñoqa Señor Diosmi nini kaynata:

Orqokuna,

runa mikuq kasqaykichikmantam rimanku.

Qamkunaqa nacionnikichikpi wawa-churikunatapas wañurachinkichiksi.

14 Ichaqa amañamá runakunataqa mikunkichikñachu nitaqmi nacionnikichikpi wawa-churikunatapas wañuchinkichikñachu.

Ñoqa Señor Diosmi chaynata nini.

15 Manañam huklaw nacionniyoqkunapa kamikuynintawan insultontaqa uyarichisqaykichikñachu.

Nacionnikichikpi wawa-churikunataqa manañam wañuchinkichikñachu.

Ñoqa Señor Diosmi chaynata nini.”

16 Tayta Dios rimapayawaspanmi niwarqataq kaynata:

17 —Israel castakuna nacionninkupi yachaspaqa mana allinta kawsaspam chaynataq mana allinta ruraspam millakuyllapaqtaña rurarurqaku,

ñoqapa qayllaypi imaynam kawsasqankuqa karqa killanwan onqoq warmipa qachan hinam.

18 Chayraykum llumpay piñakuywan castigarqani,

chaynataqa rurarqani runamasinkutapas chay nacionpi wañuchisqankumanta chaynataq taytacha-mamachakunawan chay nacionta millakuypaq rurasqankumantam.

19 Chayraykum chayna mana allin kasqankumanta hinaspa mana allin rurasqankumanta castigaspay tukuy hinastinman cheqerachirqani,

paykunataqa huklaw nacionkunamanmi wischururqani.

20 Maylaw nacionmanña rispapas ñoqapa chuya sutiytam penqayman churarqaku.

Runakunamá kaynata nirqaku:

“Kay runakunaqa Tayta Diospa runankuna kachkaspapas nacionninkumantam lloqsimurqakuraq” nispa.

21 Israel castakunaqa maymanpas chayasqanku nacionpim ñoqapa chuya sutiyta penqayman churarqaku,

chayraykum chuya sutiymanta sientirqani.

22 —Chaynaqa ñoqa Señor Diospa nisqaytayá Israelpa castankunaman niy kaynata:

“Israel castakuna,

manam qamkunaraykuchu rurasaq kay rurasqaytaqa aswanqa chuya sutiyraykum.

Qamkunaqariki chuya sutiytam penqayman churarqankichik maylaw nacionman rispapas.

23 Llapa nacionkunapi penqayman churasqaykichik sutiytam paykuna qawachkaptin ñoqaqa huktawan chuyayachisaq.

Chaynata ruraptiymi yachanqaku Tayta Dios kasqayta.

Ñoqa Señor Diosmi chaynata nini.

24 Ñoqapunim qamkunataqa horqomusqaykichik chay llapallan nacionkunamanta,

qamkunataqa chaykunamanta huñumuspam allpaykichikman kutichisqaykichik.

25 Chuya yakuwan mayllaspam qamkunataqa imawanpas qachachakusqaykichikmanta limpiasqaykichik,

taytacha-mamachakunamantam chuyanchasqaykichik.

26 Qamkunamanqa mosoq sonqotaña churaykuspaymi qoykusqaykichik mosoq espiritutaña.

Ñoqaqa rumi hina sonqoykichikta aychaykichikmanta qechuruspaymi llampu sonqotaña qamkunamanqa qoykusqaykichik.

27 Espirituytaña qoykuspaymi decretoykunata cumplichisqaykichik,

chaynapim leyniykunatapas kasukunkichik.

28 Abueloykichikkunaman qosqay allpapiña kawsakuspam runaykunaña kankichik,

ñoqañataqmi qamkunapa Diosnikichik kasaq.

29 Qamkunataqa librasqaykichikñam imawanpas ama qanrachakunaykichikpaq.

Kamachiptiymi trigopas mana pisiqña kanqa,

manañam huktawanqa yarqaytaqa apachimusqaykichikchu.

30 Qamkunapa sachaykichiktapas sinchillatañam ruruchisaq,

chakraykichikpi cosechakunatapas achkallamanñam mirachisaq hinaptinmi nacionkunapiqa manaña yarqaymanta penqasqañachu kankichik.

31 Chaynapim qamkunaqa yuyarinkichik mana allin kawsasqaykichiktawan mana allin rurasqaykichikta hinaspam millakunkichik chay mana allin rurasqaykichikmantawan millakuyllapaqña rurasqaykichikmantapas.

32 Israel castakuna,

qamkunayá sumaqta yachaychik,

kaykunataqa rurachkani manam qamkunaraykuchu.

Qamkunaqa penqakuymantayá kurkuykachaychik mana allin kawsasqaykichikmanta.

Ñoqa Señor Diosmi chaynata nini.

33 “Ñoqa Señor Diosmi nini kaynata:

Mana allin rurasqaykichikkunamanta limpiaruspaymi yachanaykichik llaqtakunapi huktawan kawsachisqaykichik,

purmasqa raqaykunapas huktawan hatarichisqam kanqa.

34 Chunniruq chakrakunapas manaña chunnispam llapallan puriqkuna qawachkaptin tarpusqaña kanqa.

35 Paykunam ninqaku:

‘Kay purmaruq chakraqa kunanqa rikchakuchkan Eden huertamanraqmi,

purmachisqa,

chunnichisqa hinaspa tuñichisqa llaqtakunapas kunanqa murallasqa hinaspa runakunapa yachasqan llaqtakunaraqmi kachkasqa’ nispa.

36 Chaynapim muyuriqnikichikpi kaq nacionkuna yachanqaku tuñichisqa kaqkunataqa ñoqa Tayta Dios hatarichisqayta,

yachanqakutaqmi purmachisqa chakrakunapipas tarpuchisqayta.

Ñoqa Tayta Diosmi nini chaynata,

ñoqaqa chaynatamá rurasaq.

37 “Ñoqa Señor Diosmi nini kaynata:

Chaywanpas ñoqaqa Israel castakunapa qayakusqanraqmi kasaq kaykuna ruranaypaq,

paykunataqa achkallamanñam mirarachisaq ovejakunata mirachichkaq hina.

38 Imaynam Jerusalen llaqtapi nana-nanaq ovejakuna tarikun hatun fiestakunapi ñoqa Diospaq sapaqchasqa kanankupaq,

chaynam purmasqa llaqtakunapas nana-nanaq runakunapa huntaykusqan kanqa.

Chaynapim yachanqaku ñoqaqa Tayta Dios kasqayta.”