Chakisqa tullukunamanta
37
Tayta Diosmi hapiykuwaspan Espiritunwan huntasqata lloqsichiwarqa hinaspam churaykuwarqa tullukunapa huntallaña kasqan qechwa pampaman.
2 Paymi tukuy hinastinpi muyurichimuwarqa kaynaman-waknaman.
Chaypi tullukunaqa kasqa chay qechwa pampa tapaykuqmi hinaspa pasaypaq chakisqakamam.
3 Chaymantam Tayta Dios niwarqa:
—Runapa churin ¿yaqachum kay tullukunaqa huktawan kawsarinman?
—nispa.
Chaymi ñoqañataq nirqani:
—Señor Dios,
qamllam chaytaqa yachanki —nispa.
4 Tayta Diosmi chay chakisqa tullukunaman ninaypaq niwarqa kaynata:
5 —Tullukuna,
ñoqa Señor Diosmá kaynata nikichik:
“Kawsanaykichikpaqmi samayta huktawan qoykusqaykichik.
6 Ankuykichikkunatam churaykusaq,
aychaykichiktapas huntaykachisaqmi,
aychapa hawanpi qarantapas mastariykusaqmi hinaspam kawsanaykichikpaq samayta huktawan qoykusqaykichik.
Chaynapim yachankichik Tayta Dios kasqayta.”
7 Paypa kamachiwasqanman hinamá willakurqani.
Chaynata willakuchkaspam uyarirqani qapariyllawanña tullukuna taqrararaqta,
tullukunam tupaqninman hina tinkinakurqa.
8 Qonqayta qawariykuptiymi tullukunaqa kachkasqa ankuyoqña,
aychankunapas rikuriytam qallaykurqa,
chaypa hawanmanñataqmi aycha qarapas mastarikurqa ichaqa mana samayniyoqraqmi karqaku.
9 Chaymantam Tayta Dios niwarqa:
—Runapa churin,
qamqa ñoqa Señor Diospa nisqaytayá kawsachiq samayta kaynata niy:
“Kawsachiq samay,
tukuy hinastinmanta pukumuspayá kawsarichiy kay wañusqakunata” nispa.
10 Paypa kamachiwasqanman hina rimariptiymi chay kawsachikuq samayqa chay wañusqakunaman yaykuruspa kawsarirachirqa chaymi sayarirurqa nana-nanaq tropakunaña.
11 Chaymantam Tayta Dios niwarqa:
—Runapa churin,
kay tullukunaqa Israel casta llapallan runakunamanmi rikchakun.
Israel castakunam rimachkanku:
“Tullunchikqa chakisqañam kachkan.
Ñoqanchikpaqqa tukuy imam tukurunña ¿imapiñataq confiakuchwanpas?”
nispa.
12 Chaynaqa runapa churin,
qamyá ñoqa Señor Diospa nisqayta kaynata willakuy:
“Runallaykuna,
sepulturaykichikta kichaykuspam kikiypuni qamkunataqa chaymanta horqomusqaykichik hinaspam kutichisqaykichik Israelpa allpanman.
13 Runallaykuna,
sepulturaykichikta kichaykuspa chaymanta horqoptiymi yachankichik Tayta Dios kasqayta.
14 Kawsanaykichikpaqmi espirituyta qoykusqaykichik hinaspam kikikichikpa allpaykichikpi churaykusqaykichik chaynapim yachankichik kikiy Tayta Dios rimasqayta hinaspa cumplisqayta.
Ñoqa Tayta Diosmá chaynata nini.”
Juda nacionqa Israel nacionwan hukllawanakusqanmanta
15 Tayta Dios rimapayawaspanmi niwarqataq kaynata:
16 —Runapa churin,
huk kaspita hapiykuspayá chaypa hawanpi qellqay:
“Kayqa Juda castapaqwan hukllawakuqnin wakin Israel castapaqmi” niqta.
Huk kaspitapas hapispayá chaypa hawanpipas qellqay:
“Kayqa Joseypa rantinpi kaq Efrain castapaqwan hukllawakuqnin wakin Israel castapaqmi” niqta.
17 Chay iskaynin kaspita tupanarachispayá hukllawaruy makikipi.
18 Llaqtamasiki runakuna:
“Willawaykuyá ¿ima ninantaq kayqa?”
nispa tapusuptikiñataqmi
19 ñoqa Señor Diospa nisqayta kaynata ninki:
“Ñoqam hapisaq Efrainpa makinpi kaq Joseypa kaspinta,
chay kaspipimiki paywan hukllawasqa kachkan Israel wakin castakunapas.
Chay kaspitam Judapa kaspinwan kuskata hukllaman makiypi hukllawarusaq” nispa.
20 Chaynaqa Ezequiel,
paykuna qawachkaptinyá chay qellqasqayki kaspita hapirayay.
21 Ñoqa Señor Diospa nisqaytayá kaynata niy:
“Israelpa mirayninkunataqa ñoqam horqomusaq maymanña risqanku nacionkunamantapas,
tukuy hinastinmanta huñumuspam allpankuman kutichisaq.
22 Ñoqaqa Israel nacion orqo allpakunapim paykunataqa huk nacionllataña rurarusaq hinaptinmi huk reyniyoqllaña kanqaku,
manañam iskay nacionniyoqñachu nitaq iskay gobiernoyoqñachu kanqaku.
23 Manañataqmi paykunaqa huchallikunankupaqqa taytacha-mamachakunatapas chaynataq millakuypaq kaqkunatapas adoranqakuchu nitaqmi mana kasukuqpas kanqakuñachu.
Ñoqam paykunataqa salvaykusaq huchallikunankupaq tukuy imaman urmaykusqankumanta,
paykunataqa limpiaykuptiymi ñoqapa runaykunaña kanqaku,
ñoqañataqmi paykunapa Diosnin kasaq.
24 Serviqniy Davidmi kanqa paykunapa reynin,
payllaña llapankupa michiqnin kaptinmi leyniyman hina kawsaspa decretoykunata kasukunqaku.
25 Paykunaqa serviqniy Jacobman qosqay nacionpiñam yachanqaku.
Chaypimá abuelonkupas yacharqaku,
hina chaypitaqmi wiñaypaq yachanqaku churinkunapas hinaspa mirayninpa-mirayninkunapas.
Serviqniy Davidñataqmi wiñaypaq kanqa paykunapa kamachiqnin.
26 Hawka kawsakunankupaqmi ñoqaqa paykunawan rurasaq huk contratota,
chay contratoqa kanqa wiñaypaqmi.
Paykunataqa allin takyaqta ruraspam achka-achkaman mirachisaq hinaspam paykunapa chawpinpi santuarioytapas wiñaypaq churasaq.
27 Chaynapim paykunawan yachaspa paykunapa Diosnin kasaq,
paykunañataqmi kanqa runaykuna.
28 Ñoqapa santuarioy paykunapa chawpinpi wiñaypaq tarikuptinmi wakin nacionkunapas yachanqaku Israel castakunataqa kikiypaq sapaqchakusqayta.”