Gog sutiyoq runapa contranpi willakuymanta
38
Tayta Diosmi rimapayawaspan niwarqataq kaynata:
2 —Runapa churin,
qamqa Magog nacionta qawarispayá ñoqamanta willakuy Gog sutiyoq runapa contranpi,
payqariki Mesec hinaspa Tubal lawpi kamachikuqmi.
3 Paymanyá ñoqa Señor Diospa nisqayta kaynata niy:
“Mesec hinaspa Tubal lawpi kamachikuq Gog sutiyoq runa,
ñoqaqa qampa contraykipim kachkani.
4 Qamtaqa ñoqapunim muyurichisqayki,
kakichuykitapas ganchokunawan hapirachispaymi horqorusqayki llapa tropaykikunatawan kuskata,
horqorusaqtaqmi caballokunatapas chaynataq sillakuqninkunatapas.
Paykunaqariki tukuy ima armayoqmi nana-nanaq kachkanku,
taksapas-hatunpas harkachikunayoqmi hinaspa makinkupi espadayoqmi paykunaqa kachkanku.
5 Paykunawantaqmi kachkan Persia,
Cus hinaspa Put nacionniyoq tropakunapas,
llapallankum kachkanku harkachikunayoq hinaspa cascoyoqkama.
6 Llapa tropantinmi paykunawantaq kachkan Gomerpa castankunapas chaynataq karu-karu norte lawpi Bet-togarma llaqtayoq tropakunapas.
Paykunaqariki nana-nanaqmi qanwan lloqsichkanku.
7 Yaw Gog,
qamyá alistakuy,
preparakuyá chay nana-nanaq qanwan kaqkunapiwan.
Qanmi kanki paykunapa waqaychaqninqa.
8 Unay tiempokunamantam otaq watakunapa tukupaynintam qayasqa kaspa guerrakunamanta samariykuq nacionman yaykunki.
Chay nacionniyoq runakunaqa tukuy hinastinmantam huñunakurunku Israel nacionpa orqonkunapi.
Chay orqokunaqariki unaypaq purmachisqañam karqa ichaqa llapa runakunam huklaw nacionmanta horqosqa kaspanku chaypiqa hawkaña kawsakuchkanku.
9 Puyu tapaykuchkaq hinaraq paykunaman chayaruspam wayra-para hina pawaykunki.
Chaynataqa ruranki yanapasuqniki runakunapiwan nana-nanaq runakunawanmi.
10 “Ñoqa Señor Diosmi nini kaynata:
Chay tiempopiqa mana allinkunata tanteaspam hukmankunata piensanki.
11 Qanmá kaynata ninki:
‘Ñoqaqa mana murallasqa llaqtayoqkunapa nacioninta rispam guerrawan hapimusaq.
Confianzallawanña hawka kawsakuq runakunapa contranpim sayarimusaq,
paykunaqariki yachachkanku mana murallayoq,
mana punkuyoq hinaspa mana cerrojoyoq llaqtakunapim.
12 Salteamuspam tukuy imankutapas qechumusaq.
Achka nacionmanta huñunakuruspa purmachisqa llaqtakuna hatariqkunatapas guerrawanmi hapimusaq.
Paykunaqariki kachkanku animalsapa hinaspa tukuy imayoqmi.
Yachachkankupas kay pachapa chawpinpi hinaraqmi’ nispa.
13 Saba lawmanta,
Dedan lawmanta kaqkunapas hinaspa Tarsis lawmanta kaqkunapas chaypi kaq llaqtachakunapiwanmi kaynata tapusunki:
‘¿Qamqa hamurqanki suwakunaykipaqchum?
¿Tropaykikunatapas huñurqanki qori-qollqekunata,
ganadokunata,
tukuy imakunata hinaspa achka-achka imakunatapas salteaspa hapikuykunaykipaqchu?’
nispa.”
14 —Runapa churin,
Gog sutiyoq runamanyá willay ñoqa Señor Diospa kayna nisqayta:
“Israelpa castan runaykuna hawkaña kawsakuptinmi qamqa chayraq cuentata qokurunki.
15 Qanmi norte lawpi nacionnikimanta hamunki achkallaña runakunapiwan hinaspa achkallaña caballopi sillasqa tropakunapiwan kuska.
16 Yaw Gog sutiyoq runa,
qamqa allpata puyu tapaykuq hinaraqmi Israel runaykunapa contranpi sayarinki.
Chay tukupay tiempokunapim nacionniypa contranpi qamta pusamusqayki,
nacionkuna qawachkaptinkum qanwan reqsichikusaq ñoqaqa chuya kasqayta.
17 “Ñoqa Señor Diosmi nini kaynata:
Israel nacionpi ñawpa tiempokuna ñoqamanta willakuqkunawan rimachispayqa qanmantam rimachirqani,
paykunamá ñawpa tiempopi achka watapuni willakurqaku qamtaqa Israel nacionman pusamunaymanta.”
Gog sutiyoq runa castigasqa kasqanmanta
18 —Ñoqa Señor Diosmi nini kaynata:
Israel nacionpa contranpi Gog sutiyoq runa hatariptinmi llumpa-llumpayta piñakurusaq.
19 Chaynaqa sientikuspaymi llumpa-llumpay piñakuywan jurani chay tiempopiqa Israel nacionpi huk hatu-hatun pacha kuyuy kananmanta.
20 Lamar qochapi challwakunapas,
alton pawaq animalkunapas,
purun animalkunapas,
qasqonpa puriq animalkunapas chaynataq kay pachapi yachaq llapallan runakunapas ñoqapa ñawpaqniypim katkatatanqaku,
orqokunapas pampamanmi wichimunqa,
qaqakunapas wichiptinmi murallasqa perqakunapas lliw tuñiykunqa,
nispa.
21 Ñoqa Señor Diosmi nini kaynata:
Gog sutiyoq runapa contranpim llapa orqokunapi hatarichisaq guerrata,
soldadokunam wañuchinqa soldadomasillanta.
22 Ñoqaqa paypa contranpi castigoytam cumplisaqpuni,
paytaqariki castigasaq peste onqoypiwan runa wañuchiywanmi,
paykunamanqa kachaykusaqtaqmi loco paratapas,
rumi hinaña runtu-paratapas chaynataq azufreyoq nina paratapas.
Chaykunataqa paypa hawanmanwan tropankunapa hawanmanmi chayachisaq.
23 Chaynapim kikiypuni hatunchakuspay chuya kayniyta nana-nanaq nacionkunaman qawachikusaq hinaptinmi yachanqaku Tayta Dios kasqayta.