Gog sutiyoq runa vencerachikusqanmanta
39
—Runapa churin,
qamqa Gog sutiyoq runamanyá ñoqa Señor Diospa nisqayta kaynata niy:
“Mesec hinaspa Tubal lawpi kamachikuq Gog sutiyoq runa,
ñoqaqa qampa contraykipim kachkani.
2 Qamtaqa muyurichispaymi aysasqayki,
norte lawmantaraqmi qamtaqa Israel nacionpi orqokunaman yaykunaykipaq pusasqayki.
3 Ichoq makikipi apasqayki flechana arcoykitapas wichirachisaqmi,
alleq makikipi aptarayasqayki flechakunatapas pampamanmi sikwarachisqayki.
4 Chaynapim qamqa llapallan tropaykikunapiwan hinaspa qanwan riq runakunapiwan Israel nacion orqokunapi wañurunki,
chaypim qamkunataqa mikusunaykichikpaq qoykusqaykichik aycha mikuq tukuy rikchaq alton pawaq animalkunaman chaynataq purun animalkunamanpas.
5 Arí,
qamqa wañunki llutan pampapimá.
Chaynatam ñoqa Señor Dios nini.
6 Ñoqaqa kañasaqtaqmi Magog naciontapas chaynataq lamar qochapa patanpi hawka kawsakuqkunatapas.
Chaynapim yachanqaku Tayta Dios kasqayta.
7 Ñoqaqa Israel runaykuna ukupim reqsichisaq chuya sutiyta,
chaynapim chuya sutiytaqa manaña piwanpas penqachisaqchu.
Huklaw nacionniyoqkunapas yachanqakum Israel nacionpi chuya Diosqa ñoqa Tayta Diospuni kasqayta.
8 Ñam chayamuchkanña,
chayqariki cumplikunqapunim,
chay punchawkunamantamá ñoqaqa willakurqani.
Ñoqa Señor Diosmi chaynata nini.
9 “Israel llaqtakunapi yachaq runakunam lloqsimuspanku kañanqaku guerrapi peleananku armankuta.
Kañanqakum taksa-hatun harkachikunankutapas,
flechana arconkutapas,
flechankutapas,
mazonkutapas chaynataq lanzankutapas.
Chaykunawanqa yantapaqñam servichikunqaku qanchis watapuni.
10 Manañam purunmantapas yantataqa apamunqakuñachu,
montetapas manam rinqakuñachu yanta pallaqpas,
paykunaqariki yantamantam kañanqaku chay armakunataña,
paykunañam saqueanqa ñawpaq saqueaqninkutapas hinaspam paykunañataq suwanqaku chay ñawpaq suwaqninkutapas.
Ñoqa Tayta Diosmá chaynata nini.”
Gog sutiyoq runa pampanankumanta
11 —Gog sutiyoq runamanqa Israel nacionpimá chay tiempopi qosaq pampakunanpaq huk sitiota,
chay sitioqariki kachkan intipa qespimunan lawpim otaq Hatun Qochaman riq Puriqkunapa Qechwanpim.
Chay sitiopi Gog sutiyoq runa llapa tropanpiwan pampakusqanraykum llapa puriqkuna mana pasayta atinqakuchu.
Chayraykum chay sitiotaqa sutichanqaku Hamon Gog Qechwawan.
12 Israel castakunam allpanku limpiasqa kananpaq paykunata pampanqaku qanchis killapuni.
13 Chay nacionniyoq llapallan runakunam paykunata pampaysinqa,
chay punchawpi hatunchasqa kaptiymi paykunapaqpas kanqa mana qonqay atina punchawtaq.
Ñoqa Tayta Diosmi nini chaynata.
14 Chay qanchis killa pasaruptinmi llamkapakuq runakunata minkakunqaku rispanku muyumunankupaq chaynapi pampapi kaq chay wañuq tropakunapa puchuq ayankunata pampamunankupaq,
chayraqmi chay nacionqa allin limpiasqa kanqa.
15 Chay muyumuq runakunam huk kaqnin runapa tullunta rikuruspan chaypa waqtanpi huk señalta sayachinqaku chaynapi pampaqkuna hamuspan Hamon Gog Qechwapi pampanankupaq.
16 Chaypitaqmi kanqa huk llaqta Hamona sutiyoq.
Chaynatamá limpianqaku chay naciontaqa.
17 —Runapa churin,
qanmá alton pawaq animalkunata hinaspa purun animalkunata ñoqa Señor Diospa nisqayta kaynata ninki:
“Hamuspayá huñunakamuychik,
qamkunapaq nakapusqay mikunaykichikpaqyá tukuy hinastinmanta huñunakamuychik,
kay wañuchisqaykunataqa ofrecechkani Israel nacionpa orqonkunapim.
Qamkunaqa aychata mikuspam yawarnintapas tomankichik.
18 Valeroso soldadokunapa aychantam qamkunaqa mikunkichik,
kay pachapi kamachikuqkunapa yawarnintam qamkunaqa tomankichik,
paykunaqa llapallankum rikchakunqaku Basan lawpi allin cebasqa carnerokunaman,
malta carnerokunaman,
chivatokunaman hinaspa torokunaman.
19 Qamkunaqa wirantapas mikunkichik saksanaykichikkamam,
yawarnintapas tomankichik sinkanaykichikkamam,
chay wañuqkunataqariki qamkunaman ofrecenaypaqmi wañuchirqani.
20 Qamkunaqa convidasqay mesapi hinam saksanaykichikkama mikunkichik caballokunapa aychanta,
sillakuqkunapa aychanta,
valeroso soldadokunapa aychanta hinaspa guerrapi peleaq llapallan runakunapa aychanta.
Chaynatam ñoqa Señor Dios nini.”
Israel nacionpaq Tayta Diospa llakipayakuyninmanta
21 —Chaynapimá ñoqaqa huklaw nacionpi runakunaman atiyniyta qawachisaq,
llapallan nacionkunam qawanqaku sentenciaspayqa cumplisqayta.
Qawanqakutaqmi imaynam paykunataqa atiyniywan castigasqaytapas.
22 Israel castakunapas chay punchawmantapunim yachanqaku yupaychasqanku Tayta Dios kasqayta.
23 Huklaw nacionniyoq runakunapas yachanqakum Israelpa castankunaqa mana allin rurasqankurayku huklaw nacionkunaman qarqosqa kasqankuta.
Paykunataqariki traicionawasqankuraykum qepanchakururqani hinaspam enemigonkuman qoykurqani,
chaynapim paykunaqa enemigonkuwanpas guerrapi vencerachikurqaku.
24 Millakuypaq rurasqankuman hinam hinaspa mana kasukuq kasqankuman hinam paykunataqa qepanchakururqani.
25 —Chayraykum ñoqa Señor Dios nini kaynata:
Jacob castakunataqa maymanpas preso risqankumantam kutichimusaq,
llakipayarisaqñam Israelpa llapallan castankunamantaqa hinaspam chuya sutiymantapas sientisaqtaq.
26 Paykunaqa manaña pipa manchachisqan allpankupiña hawka kawsakuspam chayraq qonqanqaku ñawpaqtaqa penqayllapaqña kawsasqankuta chaynataq tukuy imapi traicionawaspanku contraypi sayarisqankuta.
27 Paykunataqariki ñoqam horqomusaq llapa runakunapa chawpinmanta hinaspam huñumusaqtaq enemigonkupa nacionninmantapas,
chaynapim achka nacionkuna qawachkaptin Israel castakunaqa chuya kasqayta reqsichiwanqaku.
28 Paykunataqariki ñoqam huklaw nacionkunaman qarqorurqani,
chaywanpas mana hukllatapas puchuchispam kikiypuni allpankuman kutichimusaq,
chaynapim paykunaqa yachanqaku yupaychasqanku Tayta Dios kasqayta.
29 Manaña paykunata qepanchakuspaymi Israelpa mirayninmanqa Espirituywanña huntaykusaq.
Ñoqa Señor Diosmá chaynata nini.