—Runapa churin,

qamqa sumaqta qawaspayá allinta uyariway,

hinaspataqyá yuyaymanaspa cuentatapas qokuytaq tukuy ima qawachisqaymanta,

kaymanqariki apamusqa karqanki qawachinaypaqmi.

Chaynaqa qampas tukuy ima qawasqaykitayá willay Israel castakunaman.

5 Templopa hawa lawninpim rikurqani muyuriqnin murallata.

Chay runapa makinpi kaq tupuna kaspim kasqa kimsa metro tumpa maschan,

chay runa murallata tupuykuptinmi anchon kasqa chay kaspin sayayniyoq,

altoman sayayninñataqmi kasqa hina chay tupuna kaspin sayayniyoqllataq.

6 Chaymantam chay tupuq runaqa pasarqa templopa intipa qespimunan lawpi zaguan punkuman hinaspam gradasninta seqaspan tupurqa temploman yaykuykunata,

chayqa kasqa chay tupuna kaspin sayayniyoqmi.

7 Chay murallapa zaguan punku yaykunapa iskay lawninpim kasqa templo cuidaqkunapa cuartonkuna,

anchonpas largonpas chay cuartokunapa sayayninqa kasqa chay tupuna kaspi sayayniyoqkamallam.

Huk cuartomanta huknin cuartoman rakinaqpa sayayninmi kasqa iskay metro parten tumpa maschan.

Templo lawman qawaq corredorman yaykunañataqmi kasqa chay tupuna kaspi sayayniyoq.

8 Uku lawman yaykuna corredortapas tupuptinmi anchon kasqa chay tupuna kaspi sayayniyoq.

9 Chay corredorpa largonta tupuptinñataqmi kasqa tawa metro sayayniyoq,

templo lawman lloqsina iskay lawninpi pilarkunañataqmi kasqa huk metro anchoyoqkama.

Chay zaguan punkupi corredorqa templo lawmanmi qawarqa.

10 Chay intipa qespimunan lawpi tarikuq zaguan punkupiqa kaylaw-waklawpim kasqa chay sayaykamalla kimsa cuartochakuna,

chaykunapa waqtankunapi perqapas kasqa chay sayaykamallam.

11 Chaymantam chay tupuq runaqa chay zaguan punkupa anchontapas tupurqataq hinaptinmi kasqa pichqa metroyoq,

chay zaguan yaykunapa anchonñataqmi kasqa soqta metro parten.

12 Cuartokunapa ñawpaqninpim kasqa taksa perqakuna,

chay perqakunaqa kasqa parte metrokamam,

chay cuartochakunaqariki kasqa largonpas-anchonpas kimsa metro tumpa maschankamam.

13 Chay tupuq runaqa tupurqataqmi chay zaguanpa huklaw kuchunmanta huknin kuchunkamapas,

chaypa sayayninqa kasqa chunka kimsayoq metro tumpa maschanmi.

14 Chay pilarniyoq corredorpa sayaynintam tantearqa kimsa chunka hukniyoq metro maschanpaq.

Chaypa waqtankunañataqmi kasqa patiopa muyusqan.

15 Chay zaguan punkupi tarikuq wasipa largonqa yaykuykunamanta corredor ukupi tukunankamam kasqa iskay chunka soqtayoq metro tumpa maschan.

16 Zaguan cuidaqkunapa cuartochankunaqa kasqa ukuman qawaq rejillasqa ventanayoqkamam,

chaypi tarikuq corredorpas kasqa ukulawninmanta muyuriqninpi ventanayoqkamam.

Chay cuartochakunapa waqtanñataqmi adornasqa kasqa palmera sacha dibujokunawan.

17 Chaymantam chay tupuq runaqa pusaykuwarqa templopa hawa lawnin patioman.

Chay patiopa muyuriq patankunaqa kasqa loza pampayoqmi hinaspapas cuartochakunapa muyuykusqanmi.

Chay cuartochakunaqa kimsa chunkapunim chay loza pampayoq lawman qawarqaku.

18 Chay urayneqpi lozayoq pampaqa tupanakusqa chay zaguan punkupa wasinkunapim,

chay lozayoq pampapa anchonqa kasqa chay zaguan punkupi wasipa largon largoyoqmi.

19 Chay runaqa uray lawnin punkumanta qallaykuspanmi tupurqataq uku law patiopa qallariyninkamapas,

chaypa sayayninmi kasqa pichqa chunka iskayniyoq metro tumpa maschan,

hina chay sayayllam kasqa intipa qespimunan lawpipas hinaspa norte lawpipas.

20 Chay tupuq runaqa tupurqataqmi templopa hawa pationman yaykuna norte lawpi zaguan punkutapas,

tupurqaqariki largontawan anchontam.

21 Chaypipas kasqataqmi kaylaw-waklawpi kimsa cuartochakuna,

chaykunapa waqtanpi perqakunapas hinaspa corredorpas kasqa punta kaq zaguan punkupi wasipa sayaynin sayayniyoqllam.

Chay punta kaq zaguanqariki tarikurqa intipa qespimunan lawpim.

Chaypa largonqariki kasqa iskay chunka soqtayoq metro tumpa maschanmi,

anchonñataqmi kasqa chunka kimsayoq metro tumpa maschan.

22 Ventanankunapas,

corredorninpas hinaspa palmera sacha dibujonkunapas kasqa intipa qespimunan lawman qawaq zaguan punku wasipi tarikuq sayaynin sayayniyoqllam.

Chayman seqanankupaqmi kasqa qanchis gradaskuna,

chay gradaskunapa ñawpaqninpiñataqmi kasqa huk corredor.

23 Ukupiña tarikuq templopa pationman yaykunapa chimpanpim kasqa chay norte lawpi zaguan punku,

hukninñataqmi kasqa intipa qespimunan lawpi.

Hinaptinmi chay huknin zaguanmanta hawa zaguanman tupuptin kasqa pichqa chunka iskayniyoq metro tumpa maschan.

24 Chaymantam chay tupuq runaqa pusawarqataq surlawman,

chaypipas kasqataqmi huk zaguan punku.

Chaypipas tupurqam chaypi tarikuq cuartokunapa waqtantawan corredorninta,

chaypa sayayninqa kasqa chay wakin zaguan punkukunapa sayaynin hinallam.

25 Chay zaguan punku wasiqa corredornintinmi kasqa muyuriqninpi ventanayoq wakin zaguan punku wasi hina.

Chaypa largonqariki kasqa iskay chunka soqtayoq metro tumpa maschanmi,

anchonñataqmi kasqa chunka kimsayoq metro maschan.

26 Chaypiqa kasqataqmi qanchis gradaskunapas.

Chaypa ñawpaqninpipas kasqam corredor.

Chay wasipi tarikuq cuartochakunapa waqtan perqakunapiñataqmi kasqa palmera sacha dibujokuna.

27 Ukupiña tarikuq templopa pationman yaykunapa chimpanpim tarikurqa chay surlawpi zaguanqa,

chay huknin zaguanmanta hawa zaguanman tupuptinmi kasqa pichqa chunka iskayniyoq metro tumpa maschan.

28 Pusaykuwarqataqmi templopa uku pationmanña yaykuna zaguanninta,

chay surlawpi tarikuq zaguan punku wasita tupuykuptinmi kasqa chay wakin zaguan punku wasi hina sayayniyoqlla.

29 Punku cuidaqkunapa cuartonkunapas,

chaypa waqtanpi perqakunapas hinaspa corredorninpas chay wakinpa sayaynin sayayniyoqllam kasqa.

Chay wasipaqariki corredornintinpam kasqataq muyuriqninpi ventanankunapas.

Chay wasipa largonqariki kasqa iskay chunka soqtayoq metro tumpa maschanmi,

anchonñataqmi kasqa chunka kimsayoq metro tumpa maschan.

30 Chay templomanña yaykuna uku patiopa corredorninkunam kasqa chunka kimsayoq metro tumpa maschan largoyoq,

anchonñataqmi kasqa yaqa kimsa metro.

31 Chay corredorqa qawarqa hawa lawpi pationmanmi,

chaypi tarikuq cuartochakunapa waqtan perqakunapiñataqmi kasqa palmera sacha dibujokuna,

kasqataqmi pusaq gradaskunapas.

32 Ñoqataqa templopa ukulaw pationtam pusawarqataq intipa qespimunan lawman,

chaypi tarikuq zaguan punku wasita tupuykuptinmi chaypa sayayninqa kasqa wakin zaguan punku hina sayayniyoqlla.

33 Punku cuidaqkunapa cuartonkunapas,

chaypa waqtanpi perqakunapas hinaspa corredorninpas chay wakinpa sayaynin sayayniyoqllam kasqa.

Chay wasipaqariki corredornintinpam kasqataq muyuriqninpi ventanankuna.

Chay wasipa largonqariki kasqa iskay chunka soqtayoq metro tumpa maschanmi,

anchonñataqmi kasqa chunka kimsayoq metro tumpa maschan.

34 Chay corredorqa qawarqa hawa lawpi patiomanmi,

chaypi tarikuq cuartochakunapa waqtan perqakunapiñataqmi kasqa kaylaw-waklawpi palmera sacha dibujokuna,

kasqataqmi pusaq gradaskunapas.

35 Ñoqataqa pusaykuwarqataqmi norte lawpi tarikuq zaguan punku wasimanpas,

chay wasita tupuykuptinmi chaypa sayayninqa kasqa wakin hina sayayniyoqlla.

36 Punku cuidaqkunapa cuartonkunapas,

chaypa waqtanpi perqakunapas hinaspa corredorninpas chay wakinpa sayaynin sayayniyoqllam kasqa.

Chay wasipaqariki muyuriqninpim kasqataq ventanankuna.

Chay wasipa largonqariki kasqa iskay chunka soqtayoq metro tumpa maschanmi,

anchonñataqmi kasqa chunka kimsayoq metro tumpa maschan.

37 Chay corredorqa qawarqa hawa lawpi patiomanmi,

chaypi tarikuq cuartochakunapa waqtan perqakunapiñataqmi kasqa kaylaw-waklawpi palmera sacha dibujokuna,

kasqataqmi pusaq gradaskunapas.

38 Kasqataqmi huk cuartopas zaguan punku corredorman punkuyoq,

chay cuartopim mayllarqaku lliw kañana ofrenda animalkunata.

39 Chay zaguan punku wasipa corredorninpim kasqa kaylaw-waklawpi iskay mesakuna,

chaypa hawanpim wañuchisqaku lliw kañana animalkunata chaynataq hucharayku hinaspa culparayku animalkunatapas.

40 Norte law punkuman seqana lawpa hawa lawninpim kasqa iskay mesakuna,

waklawninpipas zaguan punku corredornin lawpim kasqataq iskay mesakuna.

41 Chaynaqa tawa mesakunamá kasqa zaguanpa waklawninpipas chaynataq zaguanpa kaylawninpipas,

chaynaqariki llapallan mesakunaqa kasqa pusaqmi,

chaykunapa hawanpim wañuchisqaku ofrecenanku animalkunata.

42 Diosman ofrecespa lliwta kañapunankupaqmi kasqa labrasqa rumimanta tawa mesakuna.

Chay mesaqa kasqa yaqa huk metro largoyoqmi,

chaynataqmi anchonpas kasqa yaqa huk metrotaq,

altoman sayayninñataqmi kasqa parte metro tumpa maschan.

Chay mesakunapimá churasqaku imakunapas necesitasqankuta chaynapi lliw kañana animalkunatapas chaynataq wakin animalkunatapas wañuchinankupaq.

43 Chay wasipa ukunpa muyuriqninpiñataqmi kasqa allin takyachisqa iskay puntayoq ganchokuna,

chay mesakunapa hawanpiqa kasqa ofrenda aychakunam.

44 Templopa uku pationmanña yaykuna zaguanpa hichpanpim kasqa iskay cuartokuna,

hukninqa tarikusqa norte lawpim surlawta qawastin,

hukninñataqmi kasqa surlawpi norte lawta qawastin.

45 Hinaptinmi chay tupuq runa niwarqa:

—Kay surlawman qawaq cuartoqa templopi llamkaq sacerdotekunapaqmi.

46 Kay norte lawman qawaq cuartoñataqmi altarpi llamkaq sacerdotekunapaq,

paykunaqariki kanku sacerdote Sadocpa mirayninmi,

paykunallamiki Leviypa castankunamantaqa Tayta Diosman asuykunankupaq hina kachkanku —nispa.

47 Chay tupuq runaqa tupurqataqmi chay uku lawpiña tarikuq templopa pationtapas,

chaypa largonqa kasqa pichqa chunka iskayniyoq metro tumpa maschanmi,

hina chayna sayayniyoqllataqmi kasqa anchonpas,

tawantin waqtanmá kasqa hina chayna sayayniyoqlla.

Huk altarpas kasqataqmi chay templopa chimpanpiqa.

48 Chaymantam payqa pusaykuwarqataq templopa corredorninmanpas hinaspam tupuykurqa punkupa waqtanpi perqakunata,

chaypa anchonqa sapakamapam kasqa yaqa kimsa metro.

Chaynaqa chay punkupa kaylaw-waklawnin anchonqa kasqa huk metro parten tumpa maschanmi.

49 Chay corredorpa largonqa kasqa chunka metro tumpa maschanmi,

anchonpa sayayninñataqmi kasqa yaqa soqta metro,

chaymanqa seqasqa chunka gradaskunam.

Chay yaykuna perqapa kaylaw-waklaw waqtanqa kasqa huk pilarniyoqkamam.