41
Chay tupuq runaqa pusaykuwarqa templo ukumanñam.
Chaypim tupuykurqa punkupa waqtanpi qawanakuq perqakunata.
Chay huknin perqapa anchonmi kasqa kimsa metro tumpa maschan,
hina chayna sayayniyoqllam kasqa chimpanpi kaq perqapas.
2 Santuarioman yaykuna punkupa anchonqa kasqa pichqa metro tumpa maschanmi,
chay punkupa waqtankunapi hapiqnin perqakunañataqmi kasqa iskay metro parten tumpa maschan.
Chaymantañataqmi tupuykurqa santuariopa largonta hinaptinmi chaypa sayayninqa kasqa iskay chunka hukniyoq metro,
anchonñataqmi kasqa chunka metro parten.
3 Chaymantañataqmi pasaykuspan tupurqa ukuman yaykuq punkupa perqanpa anchonta hinaptinmi chaypa anchonqa kasqa huk metro tumpa maschan,
hina chay kikin punkunñataqmi kasqa kimsa metro tumpa maschan anchoyoq,
chay punkupa waqtankunapi hapiqnin perqakunañataqmi kasqa kimsa metro parten tumpa maschan.
4 Chaymantañataqmi tupurqa templopa uku lawninpi cuartopa largonta hinaptinmi sayayninqa kasqa chunka metro parten,
anchonpas hina chayna sayayniyoqmi kasqa.
Hinaptinmi chay tupuq runa niwarqa:
—Kay cuartoqa Chuyay-chuyay Sitiowan sutichasqam —nispa.
Templopa waqtanpi cuartochakunamanta
5 Chay runaqa tupurqataqmi templopa perqankunatapas hinaptinmi chay perqapa anchonqa kasqa kimsa metro tumpa maschan.
Chay templopa muyuriqninpiñataqmi kasqa cuartochakuna,
chay sapakama cuartokunapa anchonqa kasqa iskay metro tumpa maschanmi.
6 Chay cuartokunaqa kasqa hawanpi seqella iskay altosniyoqkamam,
chay sapa seqepim kasqa kimsa chunka cuartochakuna,
sapa altospam kasqa huk patak chaynapi cuartokunapa qerunta hapiptin chay qerukunaqa manaña templopa perqanpa ukunman yaykunanpaq.
7 Templopa muyuriqninpi kaq cuartokunapa anchonqa kasqa aswan anchom sapa altospi,
templota muyuriq wasipa perqanqa kasqa ancho gradas hinam.
Sapa altosmi anchoyasqa seqasqanman hina.
Pampamantam seqasqa huk gradas chawpi kaq altosninta iskay kaq altosman chayanankama.
8 Chaymantam qawarirqani chay templo muyurimuq wasipa patak hina hoqarikuq cimientonta,
chay patak hina hoqarikuq cimientonpa hawanpimá chay cuartochakunaqa tiyasqa.
Chay patakpa sayayninqa kasqa kimsa metro tumpa maschanmi.
9 Cuartokunapa hawa kaq perqanpa anchonñataqmi kasqa iskay metro parten tumpa maschan.
Kasqataqmi huk callejonpas templopa waqtanpi cuartokunamanta hinaspa sacerdotekunapa cuartonkunamanta rakinaq.
10 Chay callejonqa templopa muyuriqninpimá kasqa,
chay callejonpa anchonñataqmi kasqa chunka metro parten.
11 Chay cuartokunapa punkunkunaqa qawasqa chay callejon lawmanmi,
huknin punkum qawasqa norte lawman,
hukninñataq surlawman.
Chay callejonman tupaq cimientonñataqmi kasqa iskay metro parten tumpa maschan anchoyoq.
Intipa seqaykunan lawpi kaq wasimanta
12 Intipa seqaykunan lawpim callejonpa chimpallanpi kasqataq huk hatun wasi,
chay wasipa anchonqa kasqa kimsa chunka soqtayoq metrom,
largonñataqmi kasqa tawa chunka qanchisniyoq metro,
chay wasipa perqankunapa anchonqa kasqa iskay metro parten tumpa maschanmi.
Templopa lliw sayayninmanta
13 Chaymantam chay tupuq runaqa tupurqa templopa lliw largonta hinaptinmi kasqa pichqa chunka iskayniyoq metro parten.
Tupurqataqmi callejontawan qepapi kaq hatun wasitapas chaynataq perqantapas hinaptinmi lliw kasqa pichqa chunka iskayniyoq metro parten.
14 Templopa uyanñataqmi intipa qespimunan lawman qawaq callejonpiwan kasqa pichqa chunka iskayniyoq metro parten anchoyoq.
15 Tupurqataqmi callejonpa chimpanpi templopa qepanpi kaq hatun wasitapas chaynataq kaylaw-waklaw perqakunatapas,
chaypa sayayninqa kasqa pichqa chunka iskayniyoq metro partenmi.
Templopi imakunapas tarikuqmanta
Templopi kaq hawa santuariom ukupi kaq Chuyay-chuyay sutiyoq cuartopiwan hinaspa corredorpiwan
16 tablakunawan tableasqa kasqa.
Punkupa patakninkunapas,
rejillayoq ventanankunapas chaynataq templopa muyuriqninpi kimsantin seqepi balconkunapas tableasqam kasqa,
chaynaqa kasqa pampamanta ventanakamam.
Chay ventanakunañataqmi kasqa kaspi rejillayoqtaq.
17 Chay runaqa tupurqataqmi punkupa hawantapas hinaspa templo ukupi cuartotapas chaynataq muyuriqninpi ukuntin-hawantin uyantapas.
18 Chay tableasqa tablakunapiñataqmi tallasqa kasqa querubin sutiyoq angelkunapiwan palmera sachapa dibujon,
chay querubinkunaqa sapakamam kasqa iskay uyayoqkama.
19 Huknin uyanmi kasqa runapa uyan kaqlla hinaspam qawachkasqa palmera sachapa dibujon lawman,
huknin uyanñataqmi kasqa leonpa uyan kaqlla,
chaypas qawachkasqa huklawninpi palmera sachapa dibujonmanmi,
chaynaqariki kasqa templopa lliw muyuriqninpim.
20 Pampamanta punkupa hawankamam kasqa chay tallasqa querubin sutiyoq angelkunapa dibujonkunaqa,
hina chaynallam kasqa palmera sachapa dibujonkunapas,
chaynaqariki kasqa santuariopa muyuriq perqankunapim.
21 Santuarioman yaykuq punkupa pilarninmi kasqa tawa waqtayoq kullu.
Tablawan rurasqa altarmanta
Chuyay-chuyay sutiyoq cuartopa chimpanpiñataqmi kasqa
22 tablamanta altar rurasqaman rikchakuq,
chaypa waqtankunaqa kasqa huk metro tumpa maschan sayayniyoqmi,
sayayninñataqmi kasqa huk metro parten tumpa maschan.
Chay altarpaqa esquinankunapas,
pampanpas hinaspa waqtankunapas tablamantam kasqa.
Hinaptinmi chay runa niwarqa:
—Kayqa Tayta Diospa qayllanpi mesam —nispa.
Templopa punkunkunamanta
23 Santuariopam kasqa iskayman kichakuq punkunkuna,
hina chaynallataqmi kasqa Chuyay-chuyay sutiyoq cuartopa punkunkunapas.
24 Sapa punkupañataqmi kasqa iskay hojankuna,
sapa hojañataqmi kasqa visagranpi kuyuq.
25 Chay santuariopa punkunkunapim kasqa tallasqa querubin sutiyoq angelkunapa dibujonkuna chaynataq palmera sachakunapa dibujonkunapas,
chay dibujokunaqa kasqa templopa perqankunapi dibujokuna kaqllam.
Hawa kaq corredorpa hawanpiñataqmi kasqa tablamanta qawiñakuna.
26 Corredorpa kaylaw-waklawninpipas kasqa rejillayoq ventanakunam,
chay ventanakunapiqa tallasqam kasqataq palmera sachapa dibujonkuna.
Templopa waqtanpi kaq cuartochakunapas kasqa qawiñayoqkamam.